13/07/2026
Pub စားသောက်ဆိုင်မီးလောင်မှုကြောင့် သန့်စင်ခန်းထဲပိတ်မိသူများအပါအဝင် ၂၇ ဦးသေဆုံး
======
ဇူလိုင် ၁၃၊ ၂၀၂၆
ထိုင်းနိုင်ငံ၊ ဘန်ကောက်မြို့ Chatuchak ခရိုင်၊ Lad Phrao လမ်းပေါ်က လူကြိုက်များတဲ့ Rong B**r Na Ladprao စားသောက်ဆိုင်နဲ့ Pub မှာ မနေ့က ဇူလိုင် ၁၂ ရက် ၊ ညသန်းခေါင်ယံ ၁၁ နာရီ ၅၇မိနစ်ခန့်တွင် မီးလောင်မှုဖြစ်ပွားခဲ့ပြီး နောက်ဆုံးထုတ်ပြန်ချက်အရ သေဆုံးသူ ၂၇ ဦး အထိရှိလာတယ်လို့ ထိုင်းနိုင်ငံ သဘာဝဘေးအန္တရာယ်ကာကွယ်ရေးနဲ့ လျော့ပါးသက်သာရေးဌာန (DDPM) က ပြောပါတယ်။
အဆိုပါမီးလောင်မှုကြောင့်သေဆုံးသူ အမျိုးသား ၉ ဦးနဲ့ အမျိုးသမီး ၁၈ ဦး ပါဝင်ပြီး အများစုက လူငယ်တွေဖြစ်တယ်လို့ သိရပါတယ်။ ဒဏ်ရာရသူ ၁၈ ဦးကိုတော့ Chulalongkorn၊ Rajavithi၊ Rama IX၊ Paolo Kaset၊ Phramongkutklao၊ Petchavej နဲ့ Police Hospital တို့မှာ ပို့ဆောင်ကုသပေးနေပါတယ်။
အသက်ရှင်လွတ်မြောက်လာသူတွေနဲ့ အခင်းဖြစ်ချိန်မှာ သီချင်းဆိုဖျော်ဖြေနေတဲ့ ဂီတသမားတစ်ဦးရဲ့ ပြောဆို
ချက်အရ “မီးက စင်မြင့်အနီးရှိ လျှပ်စစ်ဘရိတ်ကာ (circuit breaker) ဒါမှမဟုတ် လျှပ်စစ်ပစ္စည်းထားတဲ့နေရာကနေ စတင်ခဲ့တာ”လို့ သိရပါတယ်။ အဲဒီနောက် ပေါက်ကွဲသံကြားရပြီး မည်းနက်တဲ့ မီးခိုးတွေက ဆိုင်တစ်ခုလုံးကို မြန်မြန်ဆန်ဆန် ဖုံးလွှမ်းသွားခဲ့ပါတယ်။ မီးတောက်တွေလည်း အချိန်တိုအတွင်း ပျံ့နှံ့သွားတာကြောင့် ဆိုင်ထဲမှာရှိတဲ့သူတွေ အများအပြား ထွက်ပြေးဖို့ မမီခဲ့ကြပါဘူး။
သေဆုံးသူအများစုကို အိမ်သာထဲမှာ တွေ့ရှိခဲ့ပါတယ်။ မီးခိုးတွေထူလာချိန်မှာ လုံခြုံမယ်ထင်ပြီး အိမ်သာထဲ ဝင်ပုန်းခဲ့ကြပေမယ့် မီးခိုးကြောင့် အပြင်မထွက်နိုင်တော့ဘဲ ပိတ်မိသေဆုံးခဲ့တယ်လို့ အာဏာပိုင်တွေက ယူဆနေပါတယ်။
အဆိုပါ မီးလောင်မှုဟာ ည ၁၁နာရီ ၅၇ မိနစ်ခန့်တွင် စတင်ဖြစ်ပွားခဲ့ပြီး Fire and Rescue Thailand”ကယ်ဆယ်ရေးအဖွဲ့များ အချိန်မှီရောက်ရှိလာကာ ဇူလိုင်
၁၃ရက်နေ့၊ မနက် ၁နာရီ ၃၂ မိနစ် ခန့်တွင် မီးကိုထိန်းချုပ်ငြိမ်းသတ်နိုင်ခဲ့ပါတယ်။
လက်ရှိမှာ မီးလောင်ရတဲ့အကြောင်းရင်းကို ဆက်လက်စစ်ဆေးနေပြီး အစောပိုင်းအချက်အလက်တွေအရ လျှပ်စစ်ပိုင်းဆိုင်ရာ ချို့ယွင်းမှု ဖြစ်နိုင်တယ်လို့ သိရပါတယ်။ ဒါ့အပြင် Pub မှာ အရေးပေါ်ထွက်ပေါက်၊ မီးသတ်ဆေးဘူး၊ မီးသတိပေးစနစ်နဲ့ မီးငြှိမ်းသတ်ရေးစနစ်တွေ စံချိန်စံညွှန်းနဲ့ ကိုက်ညီမှုရှိ၊ မရှိကိုလည်း ဆက်လက်စစ်ဆေးနေပါတယ်။
အာဏာပိုင်တွေက သေဆုံးသူတွေရဲ့ အတည်ပြုအချက်အလက်တွေကို ဆက်လက်စစ်ဆေးနေပြီး စုံစမ်းစစ်ဆေးမှုရလဒ်တွေကို ထပ်မံထုတ်ပြန်ပေးသွားမယ်လို့ DDPM က ပြောပါတယ်။
ကိုကား-The Pattaya News
