10/06/2026
Qabsoomidda Shirwaynaha Hay’adaha Garsoorka JSL Oo La muddeeyey
Hargeysa (HT)- Gudoomiyaha Maxkamada Sare Ahna Gudoomiyaha Guddida Caddaalada JSL, Garyaqaan Aadan Xaaji Cali, ayaa maanta shaaciyey wakhtiga la qabanayo shirweynaha Garsoorka Somaliland.
War-saxaafadeed uu ku saxeexan yahay Guddoomiyaha Maxkamadda Sare oo ku taariikheysan maanta, ayaa u qornaa sidan:
"Gudoomiyaha Maxkamada Sare Ahna Gudoomiyaha Guddida Caddaalada JSL;
Markuu arkay:- Shirwaynihii Caddaalada ee qabsoomay taariikhdu markay ahayd 02/12/2025 - 3/12/2025 ujeedadiisuna ahayd horumarinta hay’adaha caddaalada, la islana qaatay in Shirweynihii Garsoorkana la qabto.
Markuu arkay:- wareegtada ka soo baxday xafiiska madaxwaynaha ee ku taariikhaysan 03/02/2026 ujeedadeeduna tahay dhaqan galinta qorshaha dib u habaynta hay’adaha bahda caddaalada 2026-2029.
Markuu arkay:- qodobka 99 ee dastuurka JSL oo sheegaya in dhismaha hay’adaha garsoorku ka kooban tahay maxakamadaha iyo xafiisyada xeerilaalinta una madaxbanaan yihiin hawshooda garsoor iyaga oo raacaya xeerarka oo kaliya.
Markuu arkay:- in loo baahan yahay shaacinta isla markaana ay lagama maarmaan tahay qabashada shirwaynaha hay’ada garsoorka JSL.
Markuu arkay:- shirkii ay galeen madaxda hay’adaha garsoorku layskuna qaatay in la qabto shirwaynaha hay’ada garsoorka, lana soo magacaabo guddida qaban qaabada shirwayanaha hay’ada garsoorka.
Markuu la Tashaday:- Xeer Ilaaliyaha Guud ee Qaranka JSL.
Markuu la Tashaday:- Madaxweynaha JSL.
Markuu ku qancay:- dhamaan asbaabaha sare ku xusan.
Gudoomiyaha maxkamada sare ahna gudoomiyaha guddida caddaaladu wuxuu soo saaray go’aankan hoos ku xusan
1. Shaacinta qabsoomida Shirwaynaha Hay’ada Garsoorka in la qabto taariikhdu markay tahay 28/06/2026-29/06/2026.
2. In mudada shirwaynaha Hay’adda Garsoorku soconayo ay tahay mudo laba cisho ah.
3. In mudo saddex cisho gudohood lagu soo magacaabi doono guddida qaban qaabada shirwaynaha hay’ada garsoorka.
4. Waxaa la farayaa Guddida qabanqaabada in qabsoomida shirweynaha Hay’adda Garsoorka in ay uga shaqeeyaan sida ugu hufan una haboon.
5. Waxa la farayaa dhaman madaxda garsoorka (Maxkamadaha iyo Xeerilaalinta) gobolada in loo diyaar garoobo Shirweynaha Garsoorka.
ALLAA MAHAD LEH
Adam Xaaji Cali Axmed
GUDOOMIYAHA MAXKAMADA SARE,
AHNA GUDOOMIYAHA GUDDIDA CADDAALADA JSL.
