09/10/2026
Ook dit gaan verby…
…letterlik.
Die vorige bal het nie by haar verbygegaan nie. Hierdie bal het wel.
Eers was die viering hare. En toe moes sy iemand anders se vreugde aanskou.
En voor my speel een die mees belangrike lesse wat sport ons kinders oor die lewe leer af: niks bly vir altyd dieselfde nie. Niks kan as vanselfsprekend aanvaar word nie.
Want van die een oomblik na die volgende kan die hele prentjie omkeer. Die een wat nou oorwinningskrete uiter, is volgende keer die een wat die teleurstelling sluk.
Jy kan alles reg doen. Jy kan hard werk, gefokus bly, aanhou oefen, jou beste gee. En dan, daar gaan die bal verby. Daar verander die telbord.
En ander kere kan dit alles in ‘n oomblik in louter vreugde uitspeel met die telbord in jou guns.
Vier dan. Vier voluit. Vier met dankbaarheid.
Maar ook met nederigheid, want hierdie oomblik gaan verby.
Wanneer die bal wél verby jou gaan, wanneer jy die opponent se viering moet aanskou: kies om te blý. Kies hoop. Kies om aan te hou werk. Kies om weer op te daag. Want ook hierdie oomblik gaan verby.
Wat deurgaans bly, is wat jy leer en wie jy is terwyl jy deur hierdie oomblikke leef.
Leer dus om met dankbaarheid, nederigheid en hoop die beste van elke geleentheid te maak.
Want ook dit sal verbygaan.
❤️💔
