هذه الصفحة تهتم بكل ما يتعلق بمنطقة عين الباردة من مناظر طبيعية واخبار الجهة وكل ما هو جديد في عين الباردة ⛰️💚❤️
12/07/2026
للأسف، المشاهد هاذي ما تفرّحش. 🔥
حرق الزبلة بالطريقة هاذي في مدخل عين الباردة تصرّف خطير، خاصة في مكان فيه كابلات كهرباء. أي شرارة تنجم تتسبب في انقطاع الكهرباء على الحومة الكل، ولا حتى في كارثة لا قدّر الله إذا كان فما شكون مارّ من غادي.
إذا كان باش ننظّفوا منطقتنا، يلزم يكون ذلك بطريقة حضارية وآمنة، موش بتصرفات تنجم تضرّ الناس والبيئة. المسؤولية مسؤولية الجميع، وإن شاء الله نتعاونوا الكل باش نحافظوا على عين الباردة نظيفة وآمنة.
10/07/2026
يوم الأحد المقبل هو آخر يوم في حملة تنظيف وتهيئة مقبرة عين الباردة، فلا تحرموا أنفسكم أجر المشاركة ولو بساعة من وقتكم. ومن يرغب في المساهمة، فما زلنا بحاجة إلى شراء الدهان ولوازم الطلاء لإتمام العمل، وجزاكم الله خير الجزاء.
07/07/2026
🌿صباح الخير أحلى ناس عين الباردة، وأحلى متابعينا من كل بلاصة. 🌞
إن شاء الله نهاركم مبروك، مليان بالخير والفرحة والرزق، وربّي يديم عليكم الصحة والهناء.
تحيات صفحة عين الباردة ❤
06/07/2026
06/07/2026
الحملة الرابعة… نجاح جديد بفضل الله، وبفضل رجال وشباب عين الباردة. شكراً لكل من حضر، ساهم، شجّع، ودعا. والخير مازال متواصل… 💚💚💚
05/07/2026
الحملة تبدأ إنشاء الله مع الساعة الثالثة بعد الضهر 🚨🚨
03/07/2026
لا تحقرن من المعروف شيئًا...
قد يظن بعضنا أن إزالة الأعشاب عن المقبرة أو تنظيف طريق أو رفع حجر من الأرض عملٌ يسير، لكن عند الله قد يكون سببًا في مغفرة الذنوب ورفعة الدرجات.
قال رسول الله ﷺ:
«الإيمان بضع وسبعون شعبة... وأدناها إماطة الأذى عن الطريق.»
فجعل إزالة الأذى من شعب الإيمان.
وفي الحديث الصحيح أن رجلًا وجد غصن شوك في طريق المسلمين، فأزاحه عن الطريق، فشكر الله له فغفر له.
وفي رواية أخرى أن رجلًا رأى غصن شجرة يؤذي الناس في الطريق فقال: والله لأنحينَّ هذا عن المسلمين، فأُدخل الجنة.
فإذا كان إبعاد شوكة أو غصن سببًا لدخول الجنة، فكيف بمن يقضي ساعات في تنظيف مقبرة المسلمين، وإظهار قبورهم، وتيسير زيارتها، وإزالة ما يؤذي الناس فيها؟
وتأملوا أيضًا قول النبي ﷺ:
«أحب الناس إلى الله أنفعهم للناس.»
فلعل ساعةً من التعب في خدمة مقبرة المسلمين تكون أثقل في الميزان من أعمال كثيرة، ولا يدري أحدنا أي عمل يقبله الله فيكون سببًا لنجاته.
موعدنا بإذن الله:
📍 الحملة الرابعة لتنظيف مقبرة عين الباردة
🗓 يوم الأحد
🕓 مباشرة بعد صلاة العصر
قد تكون قبل الأخيرة، وربما الأخيرة، فلا تفوّتوا هذا الباب من أبواب الخير، واحتسبوا الأجر عند الله، فالدال على الخير كفاعله، ومن عجز عن الحضور فليساهم بما يستطيع من دعم أو نشر أو دعاء.
نسأل الله أن يتقبل منا ومنكم، وأن يجعل أعمالنا خالصة لوجهه الكريم.
01/07/2026
بداية الترسيم بالكتاب الصيفي لعين الباردة ❤️❤️
01/07/2026
أهلنا وأحبابنا، نحب قبل كل شيء نعتذر منكم على التأخير شوية في نشر الفيديو والصور، أما حبيت نستنى شوية باش نشارك معاكم المجهودات اللي صارت في الحملة التطوعية الثالثة لتنظيف مقبرة عين الباردة.
بصراحة، اللي صار حاجة تفرّح القلب، كي تشوف ناس تخلّي وقتها وتجي تخدم وتعاون في مكان عزيز علينا الكل، هذا شيء نفتخروا بيه ونرفعوله القبعة.
الحملة كانت لتنظيف المقبرة واقتلاع الأعشاب اللي كانت منتشرة ومغطية برشا أماكن، والحمد لله بالجهود متاع الناس اللي حضرت، رجعت المقبرة تظهر بشكل أحسن.
وبعد التنظيف بدينا زادة في دهن القبور، أما مازال العمل متواصل ومازال قدامنا برشا خدمة، وإن شاء الله الأسبوع الجاي نكملوا مع بعضنا ونواصلوا جمع التبرعات باش نتمّوا الأشغال، ونتمنّوا بإذن الله نهار الجمعة الجاية تكون المقبرة في أحسن حلة.
نحب نشكر من القلب الأخ مالك ولد حومتنا على تبرعه بستال مسكر، ونشكر كل إنسان ساهم ماديا أو حضر أو شجع بكلمة طيبة، ربي يباركلكم ويجزيكم خير.
وزادة إن شاء الله في المستقبل باش نخدموا على موضوع المحافظة على نظافة المقبرة أكثر، ومن بين الأفكار إننا نستعملوا دواء يساعد على نقص طلوع الحشيش والأعشاب الطفيلية، ومشكور الأخ مالك على استعداده للمساهمة في هذا الجانب.
والحاجة اللي تفرّح أكثر هي إنو في كل مرة نشوفوا ناس جديدة تلتحق، وجوه جديدة تحب تعمل الخير وتبحث على الأجر.
ربي يبارك فيكم الكل، في صحتكم ورزقكم وعائلاتكم، ويرحم موتانا وموتى المسلمين أجمعين، ويجعل كل مجهود وكل مساعدة في ميزان حسناتكم.
Be the first to know and let us send you an email when Ain Berda official عين الباردة posts news and promotions. Your email address will not be used for any other purpose, and you can unsubscribe at any time.
