01/06/2026
Dr. Artan Haxhiu – mjeku që po jep shembull përkushtimi dhe profesionalizmi
Në korridoret e ORL-së në spitalin “Dr. Sami Haxhibeqiri” të Mitrovicës, çdo ditë dëgjohet një emër që tashmë ka fituar respektin dhe mirënjohjen e qytetarëve, Dr. Artan Haxhiu. Me një qetësi profesionale dhe një buzëqeshje që i bën pacientët të ndihen më të sigurt, ai po kryen një punë të jashtëzakonshme, duke i dhënë kështu qytetit një shembull të vërtetë të përkushtimit mjekësor.
Por puna e tij nuk ndalet vetëm brenda mureve të spitalit. Dr. Haxhiu, specialist i ORL-së, shërben edhe në Qendrën Kryesore të Mjekësisë Familjare të qytetit, duke i ardhur në ndihmë pacientëve aty ku ata kanë më shumë nevojë. Ky përkushtim i dyfishtë është bërë temë bisedash në mesin e qytetarëve, të cilët shpesh thonë me krenari se “Mitrovica ka fat që ka një mjek si Artani.”
Ai nuk është thjesht një mjek, është një figurë që ka fituar zemrat e njerëzve përmes profesionalizmit, sjelljes së mirë dhe gatishmërisë për të ndihmuar pa kursyer kohë e energji. Në një kohë kur shëndetësia shpesh përballet me sfida, Dr. Haxhiu është shembull se si dashuria për profesionin mund të sjellë ndryshimin.
I lindur dhe rritur në Mitrovicë, Artani vjen nga një familje e njohur intelektuale, ku vlerat e ndershmërisë dhe humanizmit janë trashëguar brez pas brezi. Sot, ai po i shndërron këto vlera në punë konkrete për të mirën e komunitetit, duke treguar se dashuria për qytetin tënd nuk është vetëm ndjenjë, por edhe veprim.
Në çdo vizitë, në çdo konsultë dhe në çdo trajtim, Dr. Artan Haxhiu po lë gjurmë, jo vetëm në shëndetin e pacientëve, por edhe në kujtesën e qytetit.