23/10/2026
មន្រ្តីជំនាញមន្ទីរបរិស្ថានខេត្តក្រចេះ ចុះបង្ក្រាបទីតាំងរុករករ៉ែខុសច្បាប់មួយកន្លែង ដកហូតវត្ថុតាងជាច្រើននៅស្រុកសំបូរ
ខេត្តក្រចេះ ៖ ថ្ងៃទី២៣ ខែតុលា ឆ្នាំ២០២៦ ក្រោមការបញ្ជាផ្ទាល់ និងការណែនាំពីលោក គា បូ ប្រធានមន្ទីរបរិស្ថានខេត្តក្រចេះ ក្រុមការងារមន្រ្តីជំនាញដឹកនាំដោយលោក សាំង សុខន អនុប្រធានការិយាល័យដែនជម្រកសត្វព្រៃ រួមជាមួយប្រធានស្នាក់ការ និងមន្រ្តីឧទ្យានុរក្សចំនួន ៦នាក់ បានចុះទប់ស្កាត់ និងបង្ក្រាបបទល្មើសរុករករ៉ែខុសច្បាប់ចំនួន ០១កន្លែង។
ប្រតិបត្តិការនេះបានធ្វើឡើងនៅ ចំណុចអូរឃ្មង (កូអរដេអូ 574274-1424681) ស្ថិតក្នុងភូមិសាស្ត្រឃុំកំពង់ចាម ស្រុកសំបូរ ខេត្តក្រចេះ។
លទ្ធផលនៃប្រតិបត្តិការ និងវត្ថុតាងចាប់យកជាលទ្ធផលនៃការចុះទប់ស្កាត់នេះ ក្រុមការងារបានចាត់វិធានការរដ្ឋបាល និងចាប់យកវត្ថុតាងរួមមាន ម៉ាស៊ីនគោយន្តម៉ាកយ៉ាងដុងចំនួន ៤គ្រឿង។ក្បាលបូមចំនួន ៤គ្រឿង ។ ទុយោប្រវែង៦០ម៉ែត្រ។
បច្ចុប្បន្ន វត្ថុតាងទាំងខាងលើត្រូវបានក្រុមការងារដឹកយកមករក្សាទុកជាបណ្តោះអាសន្ននៅ ស្នាក់ការគម្ពោតគយ ដើម្បីកសាងសំណុំរឿង និងអនុវត្តតាមនីតិវិធីច្បាប់បន្ត។
ពាក់ព័ន្ធនឹងប្រតិបត្តិការបង្ក្រាបនេះ លោក គា បូ ប្រធានមន្ទីរបរិស្ថានខេត្តក្រចេះ បានគូសបញ្ជាក់ពីការលំបាក និងផលវិបាកធ្ងន់ធ្ងរថា ការចុះប្រតិបត្តិការបង្ក្រាបបទល្មើសរុករករ៉ែខុសច្បាប់នៅតាមតំបន់ព្រៃការពារ និងដែនជម្រកសត្វព្រៃ គឺជួបប្រទះនូវឧបសគ្គនិងការលំបាកជាច្រើន ដូចជា ភូមិសាស្ត្រស្ថិតនៅតំបន់ដាច់ស្រយាល ផ្លូវលំបាកក្នុងការធ្វើដំណើរ និងការឆ្លើយតបកិច្ចសហការពីមុខសញ្ញាខិលខូចដែលតែងតែលួចលាក់ធ្វើសកម្មភាពនៅពេលយប់ ឬពេលគ្មានសមត្ថកិច្ច។ ទោះបីជាយ៉ាងណាក៏ដោយ មន្រ្តីឧទ្យានុរក្សរបស់យើងនៅតែប្តេជ្ញាចិត្តខ្ពស់ក្នុងការបំពេញភារកិច្ចការពារធនធានធម្មជាតិ។
លោកប្រធានមន្ទីរបានបន្ថែមទៀតថា សកម្មភាពរុករករ៉ែមាសខុសច្បាប់នេះ បង្កផលប៉ះពាល់យ៉ាងធ្ងន់ធ្ងរដល់បរិស្ថាន រួមមាន ការបំផ្លិចបំផ្លាញដល់ប្រព័ន្ធអេកូឡូស៊ី និងជម្រកសត្វព្រៃតាមរយៈការជីកកកាយដីព្រៃ។ការរំខានដល់លំហូរទឹកធម្មជាតិ និងហានិភ័យនៃការបំពុលប្រភពទឹកសាធារណៈដោយសារសារធាតុគីមីប្រើប្រាស់ក្នុងការលាងរ៉ែ។ការបាត់បង់គម្របព្រៃឈើ និងការគំរាមកំហែងដល់សុវត្ថិភាពធនធានធម្មជាតិក្នុងតំបន់ការពារ។
យ៉ាងណាមន្ទីរបរិស្ថានខេត្តក្រចេះប្តេជ្ញាបន្តយកចិត្តទុកដាក់ខ្ពស់ និងបង្កើនការល្បាតទប់ស្កាត់បទល្មើសធនធានធម្មជាតិគ្រប់ប្រភេទ ដើម្បីធានាបាននូវការអភិរក្សព្រៃឈើ និងជីវចម្រុះប្រកបដោយនិរន្តរភាពក្នុងខេត្តក្រចេះ៕ ខ្លីខ្លឹមដេលី