02/03/2026
အပင်အရွယ်အစားနဲ့ မလိုက်အောင် ဆေးဘက်ဝင်လှတာကြောင့် "ဆေးကျော်ကြီးပင်" လို့တောင် တင်စားခေါ်ဝေါ်ရတဲ့ထိ ဆေးဂုဏ်ကြီးမားတဲ့ အကြောတစ်ထောင်ပင်။
မြန်မာနိုင်ငံအထက်ပိုင်းဒေသတွေမှာ အများဆုံးတွေ့ရတဲ့ အကြောတစ်ထောင်ပင်ဟာ အလေ့ကျပေါက်တဲ့ သဘာဝပင်လေးတွေပါ။ ကချင်၊ ရှမ်းပြည်နယ်နဲ့ ပြင်ဦးလွင်ဘက်မှာဆိုရင် မိုးရာသီမှာ ပေါပေါများများ ပေါက်ရောက်တတ်ပါတယ်။ ရှမ်းမြောက်ဒေသ ဈေးတွေမှာဆိုရင် လတ်လတ်ဆတ်ဆတ် ရောင်းချတာရော၊ အခြောက်ခံထားတာတွေကိုပါ တွေ့နိုင်ပါတယ်။
အာယုဗေဒဆေးကျမ်းများမှာတော့ ဒီအပင်ကို အသက်ရှည်ဆေး အဖြစ် ဖော်ပြထားတဲ့အထိ အစွမ်းထက်ပါတယ်။ ရောဂါဝေဒနာမျိုးစုံအတွက် စနစ်တကျ အသုံးပြုမယ်ဆိုရင် အံ့ဩဖွယ် သက်သာပျောက်ကင်းနိုင်ပါတယ်။
ရောဂါအလိုက် အသုံးပြုပုံများ
၁။ ဆီးရောဂါဝေဒနာရှင်များအတွက်
ဆီးပူ၊ ဆီးကျင်၊ ဆီးအောင့် ဒါမှမဟုတ် ဆီးထဲသွေးပါပါက အကြောတစ်ထောင်ပင် ၃ ပင်ခန့်ကို အမြစ်ပါအောင် နှုတ်ယူပါ။ ရေသင့်ရုံနဲ့ သကြား (ထမင်းစားဇွန်း ၂ ဇွန်း) ထည့်ပြီး ကျိုချက်ပါ။ ရေဆာတိုင်း သောက်ပေးရင် သိသိသာသာ သက်သာပျောက်ကင်းစေပါတယ်။
၂။ အမျိုးသမီးရောဂါနှင့် လိပ်ခေါင်းအတွက်
ညောင်းကျ၊ ဒူလာ၊ မီးယပ်၊ လိပ်ခေါင်းနဲ့ သွေးဖြူဆင်းတဲ့ ဝေဒနာတွေအတွက် အရွက်တစ်လက်ဆုပ်စာကို မြေအိုးနဲ့ ပြုတ်ပါ။ ပွက်ပွက်ဆူလာတဲ့အခါ ထွက်လာတဲ့ အခိုးအငွေ့ကို စအိုကတစ်ဆင့် သွင်းပေးခြင်းဖြင့် ကျန်းမာရေး ပြန်လည်ကောင်းမွန်စေပါတယ်။
၃။ နားနှင့်ပတ်သက်သော ဝေဒနာများ
နားပြည်ယိုခြင်း၊ နားကိုက်ခြင်းနဲ့ နားအူခြင်းတို့အတွက် အရွက်ကို စင်ကြယ်အောင်ဆေးပြီး ထောင်းပါ။ ရလာတဲ့ သတ္တုရည်ကို စစ်ထုတ်ပြီး နားထဲသို့ တစ်နေ့ ၂ ကြိမ်မှ ၃ ကြိမ်အထိ ခတ်ပေးပါ။
၄။ ဝမ်းတွင်းအပူနှင့် အရေပြားပြဿနာများ
ဝမ်းတွင်းအပူများသူများ၊ အနာစပ်နဲ့ မိတ်ထွက်သူများအတွက် အရွက်ပြုတ်ရည်ကို သကြားခပ်ပြီး သောက်ပေးနိုင်ပါတယ်။
၅။ ဆူးစူးခြင်း (ဆူးကျန်ခြင်း)
ညှောင့်စူး၊ ဆူးစူးလို့ အတွင်းမှာ ဆူးငြောင့်ကျန်နေပါက အကြောတစ်ထောင်အရွက်ကို မီးကင်ပြီး အနာထိပ်မှာ အုံပေးပါ။ ဆူးဟာ အလိုလို ထွက်လာပါလိမ့်မယ်။
၆။ ငှက်ဖျားနှင့် နာတာရှည်အဖျား
ရက်ခြားဖျားတတ်တဲ့ ငှက်ဖျားရောဂါနဲ့ နာတာရှည်အဖျားတွေအတွက် အပင်ရဲ့ အရွက်နဲ့ အမြစ်ကို ပြုတ်သောက်ပါက အမြစ်ပြတ် ပျောက်ကင်းစေပါတယ်။
၇။ အဆုတ်နှင့် ချောင်းဆိုးရောဂါ
အဆုတ်ကြောင့် ချောင်းဆိုးသွေးပါသူများအတွက် အပင်ရဲ့ အစိတ်အပိုင်းငါးပါး (ပဉ္စငါးပါး) ကို ထောင်းပြီး ရလာတဲ့ သတ္တုရည်ကို တစ်ကြိမ်လျှင် ၁၂ ပဲသားခန့်၊ တစ်နေ့ ၂ ကြိမ် သောက်ပေးပါ။
၈။ အနာဟောင်း၊ အနာဆွေးများ
အနာမကျက်နိုင်ဘဲ ဖြစ်နေပါက အရွက်ကို မီးကင်ပြီး အုံပေးပါ။ အရွက်ခြောက်သွားရင် အသစ်လဲပေးခြင်းဖြင့် အနာကို လျင်မြန်စွာ ကျက်စေပါတယ်။
မိတ်ဆွေများအားလုံး အနာရောဂါဘေးမှ ကင်းဝေးပြီး ကျန်းမာကြပါစေ။
