https://www.facebook.com/2030098137219721/

我欲乘風去旅行 The Wind Rider, 仁德區文華路二段66號, Tainan (2026)

04/11/2018

環球見聞．之八十六
精靈狩獵
自詡老司機有廿幾年經驗嘅小精靈訓練員如我，第一次參加 Pokemon Go Safari Zone 狩獵完滿大成功！

話說 Pokemon Go Safari Zone 已經唔係第一次攪，不過對上幾次都抽唔到入場券又或者唔啱時間去唔成。通常活動地點都會揀係一個特定地點/ 景點/ 公園等大家圍威喂。難得香港後花園台灣攪一次完全免費而且成個市咁大型嘅狩獵場，飛一程仲快過入新界大西北唔係唔去呀嘛？

其實 Safari Zone 喺第一代R/G/B/Y已版經出現。係遊戲入面，小精靈訓練員只要比入場費就可以喺入面捉到特別嘅小精靈。話說每次入 Safari Zone 都會得到30個狩獵球，但係限制步數500步，唔可以攻擊啲小精靈仲好易走佬，要靠另外買嘅誘餌去吸引注意。由於狩獵場好鬼死大，所以捉唔捉到心水小精靈就睇你彩數啦！

係 Gen 1 入面，只要係狩獵場揾到隱藏小屋就可以得到技能學習器03 Surf，唔記得沖浪比卡超係咪咁學到返嚟嘅呢？話說當時最難遇到嘅係4% 嘅 Scyther 飛天螳螂、Tangela 長藤怪、Pinsir 鉗刀甲蟲，仲有1% 嘅 Chansey 吉利蛋。同現實一樣，想捉到吉利蛋都唔係咁易。

講返台南 Safari Zone，適逢11月蟲月活動成地都係鉗刀甲蟲，閃光版我都捉咗8隻，真係好廉價！其實近幾次 Safari 都主打地區限定寵，對上一次係首爾舉行就帶嚟非洲限定嘅 Tropius 熱帶龍，而今次就係大西洋島國地區限定嘅 Relicanth 古空棘魚。

當然，最吸引各地訓練員飛去開 party 嘅當然唔少得極稀有嘅 Unown 未知圖騰。玩開 Pokemon Go 嘅訓練員都知道 Unown 真係唔係正常人可以捉到嘅。除非你極之好彩或者好神心留意住各大平台嘅報料，仲要指定時間之內飛的去捉，否則唔可能有。今次台南 Safari Zone 賣大包，帶嚟 "Tainan Zone" T、A、I、N、Z、O、E 7款圖騰嚟湊熱鬧，真係皇恩浩盪。要知道，未知圖騰總共有英文字母26款外加感歎號同問號，如果你想野外收集完成就真係太天真。

天氣實在太好入秋都仲係熱到 High high，但都難阻一眾小精靈訓練員嘅熱情。除咗台灣各地嘅訓練員一家大細外，整個台南周街都係香港人日本人，鬼都有唔少，好多 fans 著哂 PKM tee 戴埋飾物好有氣氛真係好正。主場館多人嘅程度可以話維園年宵都比唔上！

經過2日狩獵勁癲，捉到手軟每日要差兩次電。成積非常唔錯有54隻 Relicanth，53隻 Unown，仲有各種閃光版16隻。每日一次嘅 Special Trade 用南半球獨有嘅 Chatot 聒噪鳥同東南亞獨有嘅 Torchoal 煤炭龜換嚟 Unown M 同西半球獨有嘅 Illumise 甜甜螢！

幾時再嚟下一次？

https://www.cna.com.tw/news/firstnews/201811030118.aspx

25/08/2018

環球見聞．之八十五
再見澳洲
因為第一日租車嗰時遲咗出貨，所以行程比預期慢咗半日。原本雄心壯志想唔走回頭路由 Uluru 經 Kings Canyon 帝王谷直上 Alice Spring 愛麗斯泉，但聽講過咗帝王谷之後嘅路都係 Unsealed Road，小小露營車根本行唔到。

先前喺 Cober Pedy 試過偷跑一段碎石路去 Breakaways 架車已經就嚟頂唔順，啲碗碗碟碟震到嗌哂救命。遺憾冇得睇超大嘅隕石坑 Gosses Bluff Crater。喺帝王谷同 West MacDonnell 嘅一系列山谷之間最後都係揀咗帝王谷，雖然問啲鬼都覺得 West Mac 多啲嘢睇但係大前提佢哋大把時間。

北領地之旅最後一個景點帝王谷其實都好正，號稱難度五星嘅行山路線 Rim Walk 由谷底上山環繞帝王谷一周需時四個鐘。一開始急上坡直踩上頂，其實唔難而且視野開闊可以沿途睇住山谷平原身心舒泰。上到頂可以飽覽成個帝王谷景色真想大嗌 I am the King of the World！

離開山脊就會進入由沙岩山丘組成嘅迷宮 Maze of Weathered Sandstone Domes，感覺上有少少似雲南嘅石林不過係紅色嘅版本。最有趣嘅角度一定係天望落嚟，因為直升機源源不斷出 Trip，我都唔執輸趁中間空檔放下飛機。果真望落嚟就好似一粒粒蛋糕唧花咁好怪雞，平望真係好難想像會係咁。背後嘅原理就好似一件豆腐𠝹開一格格之後，長年累月風沙侵蝕結果就冧樓變成一粒粒啦。

逃出迷宮後穿過鐵橋行過木梯落到山谷之中嘅秘景 Garden of Eden，原住民們視為神聖之地嘅水泉真係名副其實世外桃源。被山谷圍繞嘅水池格外平靜，水泉中間嘅孤島更顯蒼涼。波平如鏡嘅湖面反映一摺摺緒紅色嘅山谷，好似會通往另一個世界咁，遊人們都靜嚶嚶生怕打擾彼岸嘅生靈。

正午太陽高照，伊甸園位處陰間最適合野餐。簡簡單單煎蛋三文治，補充能量又可以再上路。去到帝王谷最高點，忍唔住要試下回音有幾大。喺谷邊其實超怯，警告牌話對上一次山崩已經係1930年代，如果山體滑坡就真係係咁先。

回程落山我最掂。由於同行嗰位小朋友應該畏高要扶太后咁扶落山，於是我一個箭步飛落去。天口太熱㷫熻熻，上車開大冷氣慢慢等。結果全程唔駛四個鐘，贏呀！澳洲嘅退休生活都要迎嚟句號，再見啦。

08/08/2018

環球見聞．之八十四
大頭仔
其實要講靚嘅話，我覺得卡塔丘塔 Kata Tjuta 贏烏魯魯 Uluru 幾條街。同樣係 Anangu 人嘅聖地，與烏魯魯遙遙相對望擁有5億年歷史嘅卡塔丘塔卻冇乜人識。

從高空望落嚟，卡塔丘塔就好似一堆散亂嘅碎石一地都係。事實上由三十六個山丘組成嘅 Kata Tjuta 喺原住民語意思亦解作 Many Heads 好多個頭。其實遠睇我覺得似一對貓腳仔僕喺度好得意。

卡塔丘塔嘅結構好特別，係由不同岩石類型嘅石春同巨石組成礫岩，再由紅色嘅砂岩結合而成。近看之下就好似一粒粒果仁朱古力，又或者如果大家有見過貓屎咖啡嘅話，根本就係一模一樣。

上次提過，Anangu 嘅文化上男人同女人分得好開，而卡塔丘塔就似乎係屬於男性嘅聖地。佢哋相信，卡塔丘塔嘅巨石上仍然住有創造祖先嘅靈魂。

有關卡塔丘塔嘅創造故事大都圍繞棲息喺山頂上嘅蛇王 Wanambi。傳說蛇王只會喺旱季落山君臨天下，佢嘅吐息可以捲起龍捲風懲罰犯惡嘅人。外來人對 Wanambi 應該所知無多，因為大部份故事都係秘而不宣，係族中亦只傳男不傳女。若果女人不慎知曉呢啲秘密，甚至會招致殺生之禍。

我哋扔低唔愛大自然嘅小朋友看車，徑自挑戰難度四星嘅風之谷 Valley of the Winds 路線其實唔難。由大石頭之間嘅山谷拾級而上，去到中心嘅風之谷實在好行。沿途遠景近景都靚，而且隨住太陽落山角度紅色嘅大石頭又跟住變，心情舒暢。

日落去觀景台睇石頭變色，我覺得靚過烏魯魯。同場有啲高級團又香檳又芝士，想點姐？我哋都有露營車自帶雪糕，開住張摺凳嘆住食，輸人唔輸陣。

好在揀係冬天嚟，都仲有30度高温烏蠅不斷滾攪你。影嘅所有相都要忍住痕唔好同佢哋搏鬥住。好難想像如果夏天嚟北領地，我應該會痴線。

01/08/2018

環球見聞．之八十三
世界中心
十幾廿年前嘅愛情劇目，總要以陰陽相隔嘅催淚生死戀公式嚟包裝。無事重温朔太郎同亞紀嘅青澀純愛白血病故事，而約定之地世界中心烏魯魯 Uluru 正正就喺眼前。

烏魯魯嘅原住民皮詹加加拉人 Pitjantjatjara 稱自己為 Anangu。佢哋有一套神秘嘅歷史同法律，靠一系列有趣嘅創造故事 Tjukurpa/ Creation Story 嚟傳頌。Anangu 口耳相傳將種種故事及其所包含嘅智慧流傳俾子孫，有一啲故事只會係男性中流傳，反之亦然；有啲故事只會喺特定時間日子傳頌，可能要花上一輩子先知道；亦有一啲係秘而不宣，窮一生都唔會知曉。但正因為好多故事都同水源、找尋食物、人生道理、法律等息息相關，亦伴隨舞蹈、詠唱同作畫，呢啲故事先可以流傳至今。

節錄兩個創造故事：

從前，有兩個部落嘅靈魂祖先分別被邀請去參加一個豐盛嘅宴會。赴宴途中，靈魂祖先們遇到一條睡眼惺忪而又美麗嘅蜥蜴女。被美色吸引下，祖先們分心而錯過咗宴會時間。

宴會主人因為兩族失約而非常憤怒，以頌唱將邪惡嘅靈魂附身到泥塑上而成為一隻澳洲野犬 Dingo。佢派遣野犬去找悔氣，並引發一場激烈嘅戰爭。最後兩族嘅族長都喺呢場戰爭中戰死，大地都為之悲慟。大地喺族長們嘅血泊之中升起一座大山，成為今日嘅烏魯魯。

準時赴約嘅重要性。

******

藍舌蜥蜴男 Lungkata 因聽講烏魯魯土地肥沃所以由北方嚟到呢度，並喺烏魯魯嘅水坑 Mutitjulu 西面發現一個洞穴並安住落嚟。

有一日，鳳頭鸚鵡男 Panpanpalala 正喺水坑狩獵一隻鴯鶓 Emu 並且用長矛打中獵物。受傷狂奔嘅鴯鶓被剛巧喺附近嘅 Lungkata 發現，當時鴯鶓身上仍留有 Panpanpalala 嘅矛。明知鴯鶓係另一個獵人嘅獵物之下，Lungkata 仍然將佢據為己有。Lungkata 正要分肢鴯鶓嘅身體去煮嘅時候，始意識到獵人好快就會跟住足跡追到嚟。驚惶失措下，蜥蜴男將鴯鶓肉收好以免被人發現。

當 Panpanpalala 跟住受傷嘅鴯鶓腳印終於趕到目的地嘅時候，卻發現獵物不翼而飛。鳳頭鸚鵡男追問 Lungkata 鴯鶓嘅去向，蜥蜴男卻否認自己有見過任何鴯鶓走過。Panpanpalala 繼續前行尋找獵物，但好快就發現 Lungkata 殺死鴯鶓留低嘅痕跡。知道自己被騙嘅鸚鵡男沿著蜥蜴男嘅腳印嚟到水坑 Mutitjulu，正好見到 Lungkata 將鴯鶓肉拖返洞穴中。

憤怒嘅 Panpanpalala 為報一箭之仇，喺洞穴出口點火誓要燒死 Lungkata。喺濃煙同火焰夾擊下，走頭無路嘅藍舌蜥蜴男從烏魯魯嘅山上滾落嚟迎接自己嘅死亡。

貪字得個貧。而家仍可以喺水坑 Mutitjulu 附近清晰見到燒成巨炭嘅 Lungkata 同埋留嚟洞穴外嘅鴯鶓大脾。可惜出事地點被 Anangu 們視為神聖之地，唔可以影相。

27/07/2018

環球見聞．之八十二
瞬間看地球
澳洲嘅中心點呢舊紅色大石，除咗在世界中心呼喚愛而聞名之外，其實對外國人嚟講最出名嘅當然係佢變化幻千嘅顏色啦。隨住太陽嘅角度強弱、陰晴風雲變色，Uluru 都會隨之而變化。由紅轉黃再轉橙，啡變紫再變黑...好似一個善變嘅女人心。
第一次用相機影縮時，唔係好識控制幾多秒一張先會順，而且日出日落高光反差極大要不時調較相機設定，好錯。日出時風很大差啲可以吹郁個人，所以腳架擺呢擺去在所難免。好在揾到一個 Software 可以一次過整理成批相，如果唔係點樣可以後製七百幾張原圖？
獻丑為大家呈上世界中心 Uluru、Kata Tjuta、Kings Canyon 嘅日出日落星星轉。

24/07/2018

環球見聞．之八十一
瘋狂麥斯
庫伯佩地 Coober Pedy 除咗貓眼石之外，仲有令人心動嘅末世地貌等你發掘。距離小鎮半個鐘車程嘅布雷克威沙漠 Breakaways、彩畫沙漠 Painted Desert 以及月亮平原 Moon Plain，組成80年代 Mel Gibson 舊版 Mad Max 嘅異域世界。

原住民 Antakirinja Matuntjara Yankunytjatjara 視呢度為神聖嘅地方，布雷克威嘅原住民語名 Umoona 有長壽嘅意思，皆因附近生長嘅一種長生樹。而英文 Breakaways，則形容呢度嘅山脈同小山丘形態，好似一張張無端崩塌斷開嘅長枱。

呢啲長桌山被稱為 Mesa，即西班牙文枱嘅意思。就如其名，長桌山嘅山頂又長又平坦，而山腰通常都係垂直而陡峭嘅山崖，遠望就好似張枱一樣。組成長桌山嘅不同岩石層以水平打疊，從遠處都可以見到不同岩層紋理同顏色整齊排列。

喺幾百萬年前，呢度可能係一個地勢平坦嘅平原，抗蝕性比較低嘅岩層日積月累被風沙及惡劣天氣洗擦而剝落，剩餘較強韌嘅岩層可以屹立不倒。就如潷雪糕一樣，一個個山丘形成獨特嘅地貌。

爬上 Mesa 睇日落，底部嘅碎石又鬆又斜每一步都隨時跣低。風大得狠吹到頭到痛，陣風突然來襲足以吹走一個小朋友。幾經艱苦手腳並用爬到上頂嘩一聲。砂岩、石英岩、玄武岩、矽質岩、石灰岩、熔岩... 唔同嘅岩層都閃耀著多姿多彩嘅顏色，日落金光下就如一個土系調色盤。

睇住太陽漸漸變黃再變紅，沙漠上嘅山丘不斷隨之變色直到太陽照射唔到。蛋黃落下之後，整個天空又折射出一沒紫紅。大自然本身就已經係最靚嘅寶石。

22/07/2018

環球見聞．之八十
澳至尊之寶
嚟到全球出產最多澳寶貓眼石嘅庫伯佩地 Coober Pedy，自然就要動手去淘下寶！放眼整個沙漠一撻二撻爛地小山丘，其實有超過七十個礦場二十五萬個礦洞。周街都係警告牌叫你小心誤墮礦坑！

庫伯佩地嘅名源自原住民語 kupa-piti，即男仔們嘅水井。雖然有不同嘅原住民族會遷徙途經呢度，但係喺發現貓眼石之前並冇人定居此處。無他，呢個鳥不生蛋嘅荒漠地區，夏天可以熱死人冬天可以凍死人！礦工們都住喺全天候恆温嘅地底山洞 dugouts 入面，一舉兩得又可以採礦又可以避開惡劣嘅天氣。

我哋住嘅 Caravan Park 提供免費嘅地下礦洞露營，不過網上評論話人聲嘈雜聲鼻鼾聲不斷喺洞內迴旋繞樑三日，超難受。

講返採礦，政府喺1999年起立法鼓勵小型作業，只要你申請礦牌就可以得到一個 Peg 棟牌劃地十五平方米自己慢慢掘。之但係用炸藥又要有炸藥牌，又要租機器呢...太麻煩啦！

參觀咗一個澳寶礦場，礦主教我哋點樣用兩支金屬棒去偵察埋藏地下嘅神秘石頭。可惜呢個古法實在唔多靠譜，無論水源、金屬物、磁場變化乜乜乜都有可能觸發兩支金屬棒交疊，所以要揾到大秘寶絕對要有啲彩數。

法例又規定，如果你喺人哋礦場範圍發現寶石，擁有權都係歸於礦主。與其落礦坑採礦，鎮上面有一個免費又安全嘅淘寶場地。一個二個小山丘堆滿採掘出嚟嘅碎石，只要你眼夠利運夠好自自然然就會揾到閃石。

哼邊有咁大隻青蛙隨街跳呀？我肯定礦場們一定已經笹選過，放眼閃嘅物體只有一地玻璃碎！嬲嬲哋其實去礦工們自己嘅加工店買好過！濕平模式起動買買買，點知買完一家再睇另一家平咗又靚咗！唯有再買溝番淡。

20/07/2018

環球見聞．之七十九
先民
最先喺富林德斯山脈 Flinders Ranges 居住嘅人類係一個叫阿得亞曼塔哈 Adnyamathanha 嘅民族。佢哋嘅名意為石群 Rock Group。直到現在，石群嘅後裔仍然居住喺度守衛祖先嘅家。

據出土嘅山洞壁畫、石刻同其他工藝品顯示，先民已經喺度住上超過五萬年。原住民們亦講述自己為全世界最古老嘅活文化。向維憑拿龐 Wilpena Pound 山腳嘅阿卡羅石 Arkaroo Rock 進發，尋找先民嘅痕跡。沿山腳健行一個鐘來到阿卡羅石，巨石被掏空形成一個有蓋小室，石外以鐵絲網包圍剛好保全大石嘅原形。

話說土著語名為 Akurra Adnya 嘅大石上，完整保存著一幅超過五千年歷史嘅壁畫。壁畫上描繪嘅係一個關於維憑拿龐始源嘅神話故事 Dreamtime Story。Dreamtime 嘅概念係澳洲原住民獨有，可以理解為佢哋先祖創世之時。而 Akurra 係一種原住民神話中描述嘅水蛇，佢哋相信水蛇係族民嘅 Dreamtime ancestor。

壁畫就畫喺石室內壁，可以清晰見到飛鳥、花草樹木、人、蛇、水等等嘅象形圖案。呢啲壁畫係以炭同紅、黃、白色赭石 Ochre，混和血、水同動物脂肪，再用手指或者手掌畫成嘅。

故事講述兩條巨蛇 Akurras 吞食一班聚集慶祝嘅人，太飽肚之下無法離開進而與一群獵人展開一場既激烈又漫長嘅戰爭。結果兩蛇雙雙戰敗陣亡，石化嘅身體化身為 Ikara，即係維憑拿龐嘅山脊。雄性嘅蛇頭成為富林德斯山脈嘅最高點 1170米嘅 St Mary Peak，土著語 Ngarri Mudlanha。而雌蛇嘅頭則成為1148米高嘅 Beatrice Hill，土著語Wilkalanha。Wilpena 嘅意思為屈曲嘅手指，而 Pound 則意解為聚集之處。

Dreaming Trail 係一條 Wilpena 嘅健行路線，沿途到訪發現唔同嘅古道、遺蹟，亦透過傳說、歌詞帶你深入了解原住民文化。今次只掂到皮毛，有機會再深入認識。

20/07/2018

環球見聞．之七十八
古老石山
富林德斯山脈 Flinders Ranges 係南澳最大嘅山脈，南向北伸展超過430公里。整個山脈最出彩嘅景色，就一定係維憑拿龐 Wilpena Pound。呢個大概八十平方公里大嘅環形谷地，喺高空望落去就好似鐮刀馬蹄形嘅露天劇場。用孤狗地球一睇，就好似遠古生物打鬥留下嘅一度度抓痕。

富林德斯山脈係由經不斷折疊同斷層嘅紅色石英岩沉積物組成組成。大概6億年前嘅寒武紀時期南澳經歷一系列嘅地殼運動，地殼板塊互相碰撞重疊，形成一條巨大嘅山脈。但原來經過幾億年嘅風化侵蝕後，呢度只不過係一片小山丘。未嚟之前，仲幻想呢度係一個地勢險要嘅山脈添。

1946年考古學家係山脈上嘅 Ediacara Hills 發現地球上最古老生物嘅化石，之後更係其他不同地點發現更多證據。為咗紀念係呢度發現嘅生物群化石，科學家以 Ediacaran 去命名呢個新嘅地質時期。我都想去考古呀！

經過琴晚一夜嘅雨咒後，今日終於放晴萬歲！第一晚嘅露營車之夜成功！又，係紅土地揸車要小心，因為袋獸們會睇準機會跳出嚟俾你 Road Kill！

19/07/2018

環球見聞．之七十七
粉紅少女心
澳洲有好多奇怪嘅自然風光，今次南澳-北領地之旅就要去好好探索一下。由阿得萊德 Adelaide 出發，第一站去嘅就係會誘發大家少女情懷嘅粉紅湖 Lake Lochiel。呢個草莓牛奶色嘅湖睇落夠哂甜夠哂膩，味蕾立即喚起 Arcor 牛奶糖嘅記憶，但其實佢係世上最咸嘅水體之一嚟㗎！

粉紅湖 Lake Lochiel 喺1836年被探險家 Granville Stapylton 發現。由1860年代至今粉紅湖每年大概產鹽20噸，好有商業價值。

湖嘅顏色可以因好多因素而改變。近年嘅新研究發現，澳洲大大小小嘅粉紅湖嘅水入面含有十幾種高度好鹽嘅細菌 Halobacteria 同微生水藻 Dunaliella algae。就係呢啲粉紅色、紅色或者三文魚色嘅微生物，組成粉紅湖嘅少女心。

最有趣嘅係，大概三份之一湖水樣本嘅 DNA 序列同一種叫 Salinibacter ruber 嘅細菌吻合。呢隻細菌以一種佈滿全身嘅粉紅色色素嚟轉化光源成為能量，所以你肉眼睇到嘅粉紅色，正正就係億億萬萬嘅細菌化身好得人驚！

粉紅湖嘅顏色，會因為陽光角度、陰晴、雨水等而變化。聽講要睇到最粉紅嘅湖色，就要趁雨後大量養份流入湖中，天陰陰嘅時候就最出色啦。今次有雨女同行，即刻落雨。

又其實肉眼睇冇咁粉，擁有上帝角度真好。

有人話呢編文似周柏豪玻璃杯碎潮文一樣無病呻吟，又係喎。

25/06/2018

環球見聞．之七十五
集結成書
話說一年時間很快過。澳洲退休生活接近尾聲，我呢個無業流氓其實日日都好充實。除咗煮嘢食打機跑下公園呢啲浪費青春嘅無聊事之外，其實我收收埋埋喺度整理緊我嘅環球見聞集結成書。痴線要排一本書真係無止境，我用咗兩個幾月先將旅程嘅第一站補完。唔知返屋企之前可唔可以將成個南美之旅編寫好呢？仲有之後嘅澳洲、摩洛哥、日本、菲律賓等等唔知點算？仲有之前嘅印度、尼泊爾、西藏、越南、柬埔寨、星馬等等等等呢？我要人幫我Proof-read 呀！

又，其實我玩玩下冇諗住出架。

我欲乘風去旅行 The Wind Rider

04/11/2018

25/08/2018

08/08/2018

01/08/2018

27/07/2018

24/07/2018

22/07/2018

20/07/2018

20/07/2018

19/07/2018

25/06/2018

Address

Website

Alerts

Shortcuts

Share

Category