31/08/2026
في العالم الكل فصل الخريف هو الفصل اللي تتساقط فيه أوراق الاشجار، يقولو زادة فصل الكآبة... 🍂🍂🍂
كان عنا 😃
هو فصل الخير و الدنيا المتحركة.... كل شي في بلادنا مربوط بالخريف
اللي باش يعرس يستنى بعد الخريف، اللي باش يبني يبدأ بعد الخريف.... اللي يسال واحد يخلص بعد الخريف..... حتى اللي ناوي يسافر ولا يداوي ولا حتى يخلي فلوس الحج يستنى للخريف
الخريف هو شهور الخدمة عندنا،
الشوانط تبدأ و الكراهب معبية بالخدامة و تسمع كان التعشيق(عاشق في النبي، صلو عليه)
و كيران المعامل و الصطافاتات تسمع منها كان التزغريت و الجو بالنساء و البنات الماشيين و مروحين من الخدمة.
الحوانت تتعمر بالسلعة خاطر الدولاب داير و الناس الكل جارية فيديهم الفلوس.....
القْاراجات كيف تتعدا من قدامهم تسمع منها كان الضحك و التنبير....
حتى فوق طواول الفرز متاع التمر..... تتخطب الصبايا و تتحل مشاكل عقد و تسمع الدباير من النساء لبعضهم..... تتربط علاقات جديدة و تتقرب ناس لبعضها عمرهم ولاكانوا يتخيلو يكونو صحاب.....
الحركة تبدأ من الفجاري.... و تشوف كان اللي من الفجر على رزقه ساري.... اللي يستنا في فطيرة ولا هاز فيده كسرونة هريسة وخبزات سخان وقاصد ربي للجر..
في الخريف الناس في قبلي عينيهم.. ترجع فيها اللمعة ...
في الدنيا الكل في الخريف تطيح الأوراق كان عند الڨبلاوية ... في الخريف تطيب #الدقلة و تتحرك العجلة.
ربي يوصل بالسالم و يجعل السوق خير من السلعة ...🤗
و ربي يخلص لوحال 💚
