10/09/2025
តាំងពីតូចក្រូចឆ្មាមក ម៉ែតែងតែនិយាយប្រាប់កូនថា "កូនត្រូវខិតខំរៀនសូត្រ ក្រេបយកចំណេះវិជ្ជា ឲ្យចេះដឹងខ្ពង់ខ្ពស់ គ្រួសារយើងជាកសិករ គ្មានទ្រព្យឯណាចែកទុកឲ្យកូនទេ មានតែចំណេះវិជ្ជាប៉ុណ្ណោះ សម្រាប់ទុកជាស្បៀងជាប់ខ្លួនដល់កូននាថ្ងៃខាងមុខ"។ ម៉ែតែងតែនិយាយថា ម៉ែមិនចង់ឲ្យកូនមានវាសនាដូចម៉ែឡើយ កាលពីមុន ម៉ែបានរៀនត្រឹមតែថ្នាក់ទី 2 ប៉ុណ្ណោះ សម្រេចចិត្តជួយធ្វើការ ធ្វើស្រែ ធ្វើចម្ការ ចិញ្ចឹមជ្រូក ដាំចេក ដាំក្រូច ជួយគ្រួសារ។អ្នកម៉ែជាកូនច្បង ប្អូនជាស្រី ថែមទាំងនៅក្មេង ទើបម៉ែត្រូវទទួលបន្ទុកការងារខាងលើដោយខានពុំបាន។ ម៉ែរៀនសូត្របានតិចណាស់ ទើបត្រូវហត់នឿយចាប់តាំងពីក្មេងរហូតដល់ចាស់ ប្រើកម្លាំងកាយប្តូរយកប្រាក់កាស់បន្តិចបន្តួចយកមកចិញ្ចឹមគ្រួសារ មិនដូចមិត្តផ្សេងទៀត គេបានឱកាសរៀនសូត្រខ្ពស់ ឥឡូវពួកគេនោះសុទ្ធតែខ្ពង់ខ្ពស់ មានមុខមាត់នៅក្នុងសង្គម និងមានបាន ដូច្នោះហើយ ម៉ែមិនចង់ឲ្យកូនមានវាសនាដូចម៉ែឡើយ។ រាល់ពាក្យសម្តីទូន្មានរបស់ម៉ែ ជាកម្លាំងចិត្ត លើកទឹកចិត្ត និងកម្លាំងជំរុញដល់កូនឲ្យខិតខំរៀនសូត្ររហូតមក។ ម្យ៉ាងទៀត ម៉ែចង់ឲ្យកូនក្លាយជាមនុស្សល្អ មានក្រមសីលធម៌ និងចេះគោរពចាស់ទុំ ដោយសារមនុស្សយើង មានចំណេះវិជ្ជាហើយ ត្រូវមានសីលធម៌និងជាមនុស្សល្អផងដែរ ដូចពាក្យចាស់លោកពោលថា "ងើយស្រក ឱនដាក់គ្រាប់" ដូច្នោះដែរ។ កូនបានល្អនៅថ្ងៃនេះ ដោយសារពាក្យទូន្មានរបស់អ្នកម៉ែ អរគុណដែលតែងតែបង្ហាត់បង្រៀនកូនឲ្យបានក្លាយជាមនុស្សល្អ។.......
អរគុណម៉ែ🙏🏻🤱🏻
