17/03/2026
MNDAA လၢတ်ႈႁႂ်ႈ KIA ပူတ်းပႅတ်ႈၵိၵ်ႉလၢၼ်ႇ ၸိူဝ်းမီးၼိူဝ်သဵၼ်ႈတၢင်းလူင်မိူင်းႁူမ်ႈတုမ်ၸိုင်ႈတႆး ပွတ်းႁွင်ႇ ဢၼ်ပႃးဝႆႉ ၼမ်ႉၽၵ်းၵႃ ၼၼ်ႉ ၼႆ ၽူႈပၼ်ၶၢဝ်ႇလၢတ်ႈ
■ လွင်ႈပၼ်ႁႅင်းတဵၵ်းတဵင် လၢတ်ႈတၢင်းၵၢၼ် တႄႉ ပႆႇမီး၊ တေႃႈလဵဝ် ပႆႇမီးလွင်ႈလႅၵ်ႈလၢႆႈသင်သေ သိုပ်ႇပႂ်ႉလၢၼ်ႇဝႆႉယူႇ ၼႆ KIA လၢတ်ႈ
17/3/ 2026 - ၶၢဝ်ႇၵူၼ်းမိူင်း
ၸုမ်းၵူဝ်းၵၢင်ႉ (MNDAA) ၼႆႉ လႆႈလမ်းလၢတ်ႈ မိူဝ်ႈဝၼ်းထီႉ 16 လိူၼ်မၢတ်ႉၶျ် ၼၼ်ႉဝႃႈ ႁႂ်ႈပူတ်းပႅတ်ႈၵိၵ်ႉလၢၼ်ႇ ၸုမ်းသိုၵ်းၶၢင် (KIA) ၸိူဝ်းမီးၼိူဝ် သဵၼ်ႈတၢင်းလူင်မိူင်း ႁူမ်ႈတုမ် လႄႈ ၼႂ်းပိုၼ်ႉတီႈ ၼမ်ႉၽၵ်းၵႃ ၊ ၸႄႈဝဵင်းၵူတ်ႉၶၢႆ ၸိူဝ်းၼႆႉ ၊ ၸိုင်ႈတႆးပွတ်းႁွင်ႉ ၼၼ်ႉၼႆ ၽူႈၾၢင်ႉ ၶၢဝ်ႇ ပွတ်းႁွင်ႉ မၢင်ၸိူဝ်း လၢတ်ႈၼႄဝႆႉယဝ်ႉ။
"မိူဝ်ႈဝႃးယၢမ်းဝၢႆးဝၼ်းၼၼ်ႉ ၸုမ်းတပ်ႉၶိုၵ်ႉတွၼ်း MNDAA လႄႈ တပ်ႉတရုၼ်း (Drones) ဢဵၼ်ႁႅင်းမွၵ်ႈ (60) ၼႆႉ လႆႈလမ်းတဵၵ်းတဵင်လၢတ်ႈဝႃႈ ႁႂ်ႈပူတ်းပႅတ်ႈၵိၵ်ႉ လၢၼ်ႇ KIA တင်းမူတ်း ၸိူဝ်းမီးတီႈ ဝၢၼ်ႈၼမ်ႉၽၵ်းၵႃ၊ မၢၼ်ႈလွႆ၊ ၼမ်ႉဢုမ် ၼိူဝ်သဵၼ်ႈတၢင်းလူင်မိူင်းႁူမ်ႈတုမ်
ၸိုင်ႈတႆးပွတ်းႁွင်ႉ ၼၼ်ႉ ၼႆယဝ်ႉ။
တႄႇဢဝ် မိူဝ်ႈဝႃးၵၢင်ၶမ်ႈမႃး ၽၢႆႇ KIA လႆႈတႄႇႁၢင်ႈ ႁႅၼ်းသိုၵ်းမႃးယဝ်ႉလႄႈ ၵူၼ်းမိူင်း ၼမ်ႉၽၵ်းၵႃၶဝ် တိုၵ်ႉမီးလွင်ႈမႆႈၸႂ် ၵူဝ်တေမီးမႃး ပၢင်တိုၵ်း ၼႂ်းၵႄႈ MNDAA လႄႈ KIA ယူႇ ၼႆ လႆႈၶၢဝ်ႇငိၼ်းဝႆႉ" ၼႆ ၽူႈပၼ်ၶၢဝ်ႇ ပွတ်းႁွင်ႉ လၢတ်ႈဝႃႈၼင်ႇၼႆ။
ၵပ်းၵၢႆႇလူၺ်ႈ လွင်ႈၼႆႉသေ ၽူႈမီးပုၼ်ႈၽွၼ်း ႁွင်ႈၵၢၼ်ပိုၼ်ၽၢဝ်ႇ KIA ၸဝ်ႈသိုၵ်းလူင် ၼေႃႇပူႇ လၢတ်ႈဝႃႈ "တေႃႈလဵဝ်တႄႉ ပႆႇၸႂ်ႈၸၼ်ႉ ဢၼ်ပၼ်လွင်ႈတဵၵ်းတဵင်ၵၼ်သေ၊ တိုၵ်ႉ ပႂ်ႉၸွမ်းၵိၵ်ႉလၢၼ်ႇဝႆႉတင်းမူတ်း ၼင်ႇၵဝ်ႇယူႇ။
ၽၢႆႇႁဝ်းၶႃႈတႄႉၵေႃႈ မိူၼ်ၵဝ်ႇယဝ်ႉ ၊ ၶဝ်ၵေႃႈ ပႆႇလႆႈလၢတ်ႈ ဢီႈသင် ၸူးႁဝ်း သေလွင်ႈလွင်ႈ ပဵၼ်တၢင်းၵၢၼ်" ၼႆယဝ်ႉ။
ၶၢဝ်ႇဢၼ်ဝႃႈ ၵူဝ်းၵၢင်ႉၸၢင်ႈၶတ်းၸႂ် ၶဝ်ႈၵုမ်းၵမ် ၼမ်ႉ ၽၵ်းၵႃ ၼၼ်ႉ ဢမ်ႇၶႂ်ႈလၢတ်ႈ သပ်းလႅင်းသင်သေတႃႉ၊ တေႃႈလဵဝ်တႄႉ ဢမ်ႇပႆႇမီးလွင်ႈလႅၵ်ႈလၢႆႈသင်သေလႄႈ တေလႆႈပႂ်ႉတူၺ်း ၶေႃႈတႅပ်းတတ်း ၵေႃမတီႇငဝ်ႈၸိုင်ႈ KIO ၵူၺ်း ၼႆ ၸဝ်ႈသိုၵ်းလူင် ၼေႃႇပူႇ လၢတ်ႈၼႄဝႆႉ။
ၸုမ်းသိုၵ်းၵူဝ်းၵၢင်ႉ (MNDAA) ၼႆႉ လႆႈဢဝ်ဢဵၼ်ႁႅင်းသိုၵ်းတင်းၼမ်သေ ၶဝ်ႈတိုၵ်း သိမ်းဢဝ် ဝဵင်းၵူတ်ႉၶၢႆ ဢၼ် ၸုမ်းဢူၺ်းလီ သိုၵ်းတဢၢင်း (TNLA) ၵုမ်းၵမ်ဝႆႉ ၼၼ်ႉ မိူဝ်ႈဝၼ်းထီႉ 14 လိူၼ်မၢတ်ႉၶျ် ၼၼ်ႉယဝ်ႉ။
လိူဝ်သေ ဝဵင်းၵူတ်ႉၶၢႆၼၼ်ႉ ၽၢႆႇ MNDAA လႆႈၶဝ်ႈတိုၵ်း သိမ်းဢဝ်ပႃး တပ်ႉၸုမ်း လႄႈ တီႈတင်ႈလၢၼ်ႇ TNLA ၸိူဝ်းႁိမ်းၼမ်ႉၽၵ်းၵႃ၊ မိူင်းၸီး၊ မိူင်းႁူမ်၊ ၵႃလၢႆႇ၊ ၼမ်ႉၶမ်း၊ မူႇၸေႊ (105) လၵ်း၊ ၵျိၼ်းၸိၼ်းၵျေႃႉ (လၢၼ်ႇလႅၼ်လိၼ်) ၸိူဝ်းၼႆႉ ၼႂ်းဝၼ်းထီႉ 14 တေႃႇ 16 လိူၼ်မၢတ်ႉၶျ် ၼၼ်ႉယဝ်ႉ။
လွင်ႈဢၼ်ႁဵတ်းၼင်ႇၼႆၼႆႉ ၶွင်ႇသီႇသိုၵ်းမၢၼ်ႈ လႆႈယွၼ်းတၢင်းၸွႆႈထႅမ် တီႈလူင်ပွင်ၸိုင်ႈၶႄႇသေ လူင်ပွင်ၸိုင်ႈၶႄႇၵေႃႈ ပၼ်သုၼ်ႇယဝ်ႉလႄႈ MNDAA ၸင်ႇလႆႈၶဝ်ႈတိုၵ်း TNLA ၼႆ ႁၼ်ထိုင်ဝႃႈၼႆ ၼႆ ၽူႈလဵပ်ႈႁဵၼ်းၵၢၼ်သိုၵ်းၵၢၼ်မိူင်း ပွတ်းႁွင်ႉ ၵေႃႉၼိုင်ႈ လၢတ်ႈဝႃႈၼင်ႇၼႆ။
ၶွင်ႇသီႇသိုၵ်းမၢၼ်ႈ လႄႈ လူင်ပွင်ၸိုင်ႈၶႄႇ ၼႆႉ တွၼ်ႈတႃႇ တေပိုတ်ႇလႆႈ သဵၼ်ႈတၢင်းပၢႆးမၢၵ်ႈမီးၶဝ် သဵၼ်ႈတၢင်းလူင်မိူင်းႁူမ်ႈတုမ်ၼၼ်ႉ ၸၢင်ႈပဵၼ်လႆႈဝႃႈ ၶဝ်ၶတ်းၸႂ် ဢဝ်ပႅတ်ႈ KIA လႄႈ TNLA ၸိူဝ်းမီးၼိူဝ်သဵၼ်ႈတၢင်း ၼၼ်ႉၼႆယဝ်ႉ။
"ၽၢႆႇ KIA ၶဝ်တႄႉ တေတွပ်ႇတႅၼ်း ႁဵတ်းသၢင်ႈၶိုၼ်း ၸိူင်ႉႁိုဝ် ဢၼ်ဝႃႈၼၼ်ႉ တေလႆႈပႂ်ႉတူၺ်းယူႇ ၊ မိူဝ်ႈဝႃးတႄႉ ၵပ်းၵၢႆႇလွင်ႈ ဢၼ် ၽၢႆႇ MNDAA လမ်းလၢတ်ႈ ႁႂ်ႈပူတ်းပႅတ်ႈ ၵိၵ်ႉလၢၼ်ႇ KIA ၸိူဝ်းမီးႁိမ်း သဵၼ်ႈတၢင်းလူင်မိူင်းႁူမ်ႈတုမ် တင်းမူတ်းၼၼ်ႉ ၽၢႆႇ KIA တႄႉၵေႃႈ တေဢဝ် ၽႅၼ်ၵၢၼ်သိုၵ်း ဢၼ်လီသေပိူၼ်ႈသေ တွပ်ႇတႅၼ်း ႁဵတ်းသၢင်ႈၶိုၼ်းယူႇ ၼႆ လႆႈထတ်းသၢင်ဝႆႉယဝ်ႉ" ၼႆ ၽူႈပၼ်ၶၢဝ်ႇၼၼ်ႉ လၢတ်ႈဝႃႈၼင်ႇၼႆ။
ၽၢႆႇၶၢဝ်ႇၵၢၼ်သိုၵ်းၶၢင် မၢင်ၸိူဝ်းၵေႃႈ လႆႈထတ်းသၢင်ဝႆႉဝႃႈ သင်ၸိူဝ်ႉဝႃႈ ၵူဝ်းၵၢင်ႉ လၢတ်ႈႁႂ်ႈ KIA ပၼ် ၼမ်ႉ ၽၵ်းၵႃၼၼ်ႉသေ မႃးၵႄႈလိတ်ႈၵၼ် ၼင်ႇလၢႆးၵၢၼ်သိုၵ်းၸိုင် သွင်ၽၢႆႇ တေလႆႈထူပ်းလွင်ႈသုမ်းၵၢၼ်ႉယူႇၼႆယဝ်ႉ။
KIA ၼႆႉ ပဵၼ်ၸုမ်း ဢၼ်မေႃၸႅၵ်ႇၽႄ ချိန်ႇသထေး (Balance) ၵၢၼ်သိုၵ်း၊ ၵၢၼ်မိူင်းသေ တွပ်ႇတႅၼ်းလႄႈ ၶဝ်တေၸၢင်ႈတွပ်ႇတႅၼ်းလႆႈ လီသေပိူၼ်ႈ ၼႆ ႁၼ်ထိုင်ဝႃႈၼႆ ၼႆ ၽူႈလဵပ်ႈႁဵၼ်းၵၢၼ်သိုၵ်းၵၢၼ်မိူင်း ၼၼ်ႉ လၢတ်ႈဝႃႈၼင်ႇၼႆ။
ဝႄႈလွင်ႈၵႄႈလိတ်ႈ ၼင်ႇလၢႆးၵၢၼ်သိုၵ်းသေ ဢဝ်လၢႆး ၵၢၼ် ဢုပ်ႇဢူဝ်း ငူပ်ႉၺီႉၵၼ်သေ ႁႃၶေႃႈတွပ်ႇမၼ်း ၼၼ်ႉ ၶႅမ်ႉလႅပ်ႈသေပိူၼ်ႈလႄႈ တွၼ်ႈတႃႇ ၶေႃႈၶွင်ႉၶမ် လွင်ႈလႅၼ်လိၼ် ၼႂ်းၸိုင်ႈတႆးပွတ်းႁွင်ႉၼၼ်ႉ KIA, MNDAA, TNLA ၶဝ် လူဝ်ႇလႆႈ ႁူပ်ႉထူပ်း ၵႄႈလိတ်ႈၵၼ် ၼႆ လၢတ်ႈဝႃႈၼင်ႇၼႆ။
ယၢမ်းလဵဝ်တႄႉ ၽူႈမီးပုၼ်ႈၽွၼ်း MNDAA လႄႈ TNLA ၶဝ်ၼႆႉ လႆႈတႄႇ ႁူပ်ႉထူပ်း ဢုပ်ႇဢူဝ်းၵၼ် မိူဝ်ႈၼႆႉသေ လႆႈတူၵ်းလူင်းလွင်ႈၵိုတ်းသိုၵ်း ၸူဝ်ႈၵႅပ်ႉ တႄႇဢဝ် မိူဝ်ႈဝႃးၵၢင်ၶမ်ႈမႃးယဝ်ႉ ၼႆ ၽၢႆႇၶၢဝ်ႇတဢၢင်း လၢတ်ႈဝႃႈၼင်ႇၼႆ။
"လွင်ႈပၼ်ႁႅင်းတဵၵ်းတဵင် လၢႆးၵၢၼ်သိုၵ်း ၼႂ်းၵႄႈ ဢူၺ်းလီၵၼ် ၸိူဝ်းပဵၼ် ပၢင်တိုၵ်းၵၼ်ၼၼ်ႉ မၼ်းၸၢင်ႈပဵၼ် ၶေႃႈလီ တွၼ်ႈတႃႇ ၶွင်ႇသီႇသိုၵ်းမၢၼ်ႈယဝ်ႉ ၊ယွၼ်ႉၼၼ် လၢႆးၵႄႈလိတ်ႈလူၺ်ႈၵၢၼ်သိုၵ်းၼၼ်ႉ ၵိုင်ႇလီဝႄႈလွတ်ႈ တင်းမူတ်းယဝ်ႉ" ၼႆ ၽူႈလဵပ်ႈႁဵၼ်းၵၢၼ်သိုၵ်းၵၢၼ်မိူင်း ပွတ်းႁွင်ႉ ၼၼ်ႉ လၢတ်ႈဝႃႈၼင်ႇၼႆ။
---------
(ၶလယ 123 သိုၵ်းမၢၼ်ႈ တီႈၼမ်ႉၽၵ်းၵႃ ဢၼ် တပ်ႉၸုမ်းလုၵ်ႉၽိုၼ်ႉ ဢၼ် KIA ဢွၼ်ႁူဝ် သိမ်းဢဝ်လႆႈယဝ်ႉသေ သိမ်းလႆႈပႃး မၢၵ်ႇလူင် ႁွင်ႇဝိတ်ႉၸႃႇ ၶွင်သိုၵ်းမၢၼ်ႈ။ ၶႅပ်းႁၢင်ႈ- File)
#ၶၢဝ်ႇၵၢၼ်းသိုၵ်း #သိုၵ်းၶၢင်KIAပႃဢႅပ်ႉ #သိုၵ်းၶေႇၵူဝ်းၵၢင်ႉMNDAAထူဝ်ႇၽူးယႅၼ်ႈ #သိုၵ်းပလွင်ႈTNLAၼေႃႇသူမ်ႈ
