03/10/2023
ເຫດໂຈນເສຍຊີວິດ ຍ້ອນຖືກເຈົ້າຂອງຊັບຍິງ
--------------
ວັນທີ 3 ຕຸລາ 2023, ທ່ານ ພັທ ປັນຍາ ແສງວິຈິດ ຮອງກອງບັນຊາການແຂວງບໍ່ແກ້ວ ໄດ້ລາຍງານຊີ້ແຈງວ່າເຫດໄວລຸ້ນ 2 ຄົນ ຖືກຍິງເສຍຊີວິດ ຢູ່ບ້ານປາກງາວ ເມືອງຫ້ວຍຊາຍ ວ່າ: ເຊົ້າມືດເວລາປະມານ 2-3 ໂມງ ຂອງວັນທີ 10 ກັນຍາ 2023 ຜ່ານມາ, ມີຄົນຮ້າຍເຂົ້າມາງັດເຮືອນປະຊາຊົນ ສາມາດລັກລົດຈັກເວບຮ້ອຍ ສີແດງດຳ ໄດ້ 1 ຄັນ, ຕໍ່ ມາລັກງັດຮ້ານຂາຍເຄື່ອງຍ່ອຍຂອງພະນັກງານລັດ ໃນຂະນະນັ້ນເຈົ້າຂອງຮ້ານໄດ້ຍິນສຽງຈຶ່ງລຸກມາເບິ່ງພ້ອມທັງເອົາປືນ AK ທີ່ການຈັດຕັ້ງມອບໃຫ້ໄວ້ປ້ອງກັນຕົວ ແລະມາພົບເຫັນຄົນຮ້າຍ ຂະນະດຽວກັນຄົນຮ້າຍຮູ້ຕົວຈຶ່ງຈັບມີດແລ່ນເຂົ້າມາເພື່ອແທງໃສ່ເຈົ້າຂອງຮ້ານ, ເມື່ອເຫັນແນວນັ້ນ ເຈົ້າຂອງຮ້ານຈຶ່ງຈັບປືນແນໃສ່ແຕ່ບໍ່ໄດ້ຍິງ ເຮັດໃຫ້ຄົນຮ້າຍແລ່ນກັບອອກໄປຫາພັກພວກ.
ຈາກນັ້ນ, ມີພັກພວກຄົນຮ້າຍອີກຄົນ 1 ແລ່ນເອົາປືນສັ້ນມາຊິຍິງໃສ່ເຈົ້າຂອງຮ້ານ ແລະ ເຈົ້າຂອງຮ້ານ ກໍໄດ້ຍິງປຶນສວນປ້ອງກັນໂຕ 1 ນັດ ບໍ່ຮູ້ວ່າຖືກ ຫລື ບໍ່, ດັ່ງນັ້ນຄົນຮ້າຍໄດ້ຂີ່ລົດໜີໄປເພື່ອຫວັງເອົາຕົວຫລົບໜີ ມູ່ງໜ້າໄປທາງເທສະບານເມືອງຫ້ວຍຊາຍ, ທັງນີ້ທັງນັ້ນເຈົ້າຂອງຮ້ານກໍໄດ້ຍິງປືນໃສ່ອີກ 1 ນັດ ບໍ່ຮູ້ວ່າຖືກ ຫລື ບໍ່. ເຊົ້າມື້ຕໍ່ມາມີປະຊາຊົນທີ່ແລ່ນລົດໂດຍສານພົບເຫັນ ຈຶ່ງແຈ້ງເຈົ້າໜ້າທີ່ລົງກວດກາ ພົບຜູ້ເສຍຊີວິດເພດຊາຍ 2 ຄົນ.
ພາຍຫລັງເຈົ້າໜ້າທີ່ສືບສວນ-ສອບສວນ ຮູ້ວ່າ: ຜູ້ທີ 1 ຊື່ທ້າວ ຊົວວາງ ອາຍຸ 20 ປີ ຢູ່ບ້ານໄຊພັດທະນາ ເມືອງເມິງ ແຂວງບໍ່ແກ້ວ; ຜູ້ທີ 2 ຊື່ ທ້າວປໍລີ ອາຍຸ 20 ປີ ຢູ່ບ້ານຈອມຈຸກ ເມືອງຫ້ວຍຊາຍ ແຂວງບໍ່ແກ້ວ ເຊິ່ງຄົນຮ້າຍທີ່ເສຍຊີວິດ 2 ຄົນ ແມ່ນເປົ້າໝາຍເຄື່ອນໄຫວລັກຊັບພົນລະເມືອງຢູ່ຫລາຍຈຸດຫລາຍບ່ອນ ທີ່ມີຄຳສັ່ງຈັບຕົວຈາກອົງການໄອຍະການປະຊາຊົນ ແຂວງບໍ່ແກ້ວ ແຕ່ຍັງບໍ່ສາມາດຈັບຕົວໄດ້.
ຂໍ້ມູນ: ປກສ ແຂວງບໍ່ແກ້ວ
