11/08/2026
"Xeerka Saxaafadda Somaliland (Xeer Lr. 27/2004) waa xeer dhaqangal ah oo lagu soo shaqaynayay in ka badan labaatan sannadood. Xeerkani wuxuu awoodda diiwaangelinta saxaafadda si cad u siinayaa Diiwaanhayaha Guud ee Qaranka, oo ka tirsan Xafiiska Xeer-ilaaliyaha Guud. Xafiiskaasi wuxuu tan iyo markii xeerku dhaqan galay ahaa hay’adda dawladeed ee diiwaangelisa warbaahinta dalka.
Qodobka 6aad ee Xeerka Saxaafaddu wuxuu dhigayaa sidan:
“b) Cid kasta oo damacsan inay aasaasto hay’ad saxaafadeed, waxa waajib ku ah inay iska diiwaangeliso Xeer-ilaalinta Guud ee Qaranka, ka dib marka ay soo dhammaystirto shuruudaha xeerku tilmaamayo.”
Sida ku cad qeexidda xeerka:
“
Saxaafad” macnaheedu waa abuuridda hawlqabad kasta oo saamaynaya maskaxda iyo fikradaha dadweynaha oo dhan, sida: wargeysyada, joornaalada, qoraalo xiliyeedyo, wakaaladaha wararka, raadiyaha, telefishanka, filimada la daawado, (filimo & video), masawirada, kartoonada, buugaga, miyuusiga iyo wax kasta oo loogu talo galo isku xidhiidhinta wadareed (mass communication).”
Haddaba, iyada oo qodobada xeerku sidaas u cad yihiin, isla markaana aanu ahayn xeer cusub balse uu yahay xeer muddo ka badan labaatan sannadood lagu soo dhaqmayay, waa gef sharci oo cad in Wasaaradda Warfaafintu sheegato inay diiwaangelinayso warbaahinta. Tallaabadaasi waxay dhinac marinaysaa xeer dhaqangal ah, waxaanay ku xadgudbaysaa awood sharci oo loo igmaday xafiis kale oo dawladeed.
Sidaas darteed, waxaan ku baaqayaa:
1.In warbaahinta Somaliland aanay u hoggaansamin tallaabadan sharci-darrada ah, taas oo mustaqbalka xukuumaddu u adeegsan karto cabudhinta iyo xakamaynta warbaahinta.
2.In warbaahintu iska diiwaangeliso xafiiska sharcigu awoodda u siiyay, kaas oo ah Xafiiska Xeer-ilaaliyaha Guud ee Qaranka.
3.In Wasaarada Warfaafintu ku ekaato gudashada hawlaha badan ee horyaalla, halkii ay kaga mashquuli lahayd inay la wareegto shaqo iyo awood uu sharcigu siiyay hay’ad kale."
Waxa qoray Xildhibaan Maxamed Xuseeen Jaamac (Rambo) oo ka tirsan golaha wakiilada Somaliland.
