17/09/2026
اھو سڀ پڙھي لڱ ڪانڊارجي ويا آھن ته ماڻھو ايڏا وحشي ۽ ظالم به ٿيندا آھن...
سنڌ جي راڄڌاني ڪراچيءَ جي ضلعي اولھ سرجاڻي ٽائون ۾ هڪ ماءُ ۽ ٽن معصوم ٻارن جو بي رحماڻو قتل، جوابدار گرفتار.
ڪراچي جي ضلعي ويسٽ پوليس، سرجاني ٿاڻي جي حد سيڪٽر 7-D ۾ هڪ عورت ۽ سندس ٽن معصوم ٻارن کي قتل ڪندڙ جوابدار کي گرفتار ڪري ورتو آهي.
14 سيپٽمبر تي سيڪٽر 7-D جي هڪ گهر اندر 34 ورهين جي مهوش، سندس 8 ورهين جو پٽ مير هاد، 6 ورهين جو پٽ حسنين ۽ رڳو 2 ورهين جي معصوم ڌيءَ اشميرہ کي مٿي تي ڳري شيءِ جا وار ڪري بي رحماڻي نموني قتل ڪيو ويو هو.
هن دل ڏاريندڙ واقعي جو ڪيس مقتولا عورت جي سهري جي فرياد تي سرجاني ٿاڻي ۾ داخل ڪيو ويو هو.
ڊي آءِ جي ويسٽ زون عرفان بلوچ جي جوڙيل ٽيم، ايس ايس پي ويسٽ طارق الاهي مستوئي جي سربراهي ۾ ٽيڪنيڪل ۽ انساني ذريعن کان مليل ڄاڻ جي بنياد تي ڪارروائي ڪندي مقتولا مهوش جي نندوئي محمد همايون خان ولد محمد حسن خان کي گرفتار ڪري ورتو.
پوليس موجب، جوابدار واقعي واري ڏينهن عام ملاقات جي بهاني دانش جي گهر ان وقت ويو، جڏهن مهوش جو مڙس ۽ ٻارن جو والد دانش گهر ۾ موجود نه هو.
ڪجهه وقت گهر ۾ رهڻ کان پوءِ جوابدار مبينا طور مهوش سان زبردستي ڪرڻ جي ڪوشش ڪئي، پر مزاحمت ڪرڻ تي گهر ۾ موجود لوهي سريي سان وار ڪري پهريان مهوش کي قتل ڪيو ۽ پوءِ رڳو ٻن ورهين جي معصوم اشميرہ کي به موت جي ننڊ سمهاري ڇڏيو.
هو جڏهن قتل ۾ استعمال ٿيل راڊ کڻي گهر مان نڪرڻ لاءِ دروازو کولڻ لڳو ته ان ئي وقت مهوش جا ٻئي وڏا ٻار ٽيُوشن تان واپس اچي ويا. پوليس موجب، جوابدار انهن ٻنهي معصوم ٻارن کي به ساڳئي راڊ سان وار ڪري قتل ڪري ڇڏيو ۽ هٿيار کڻي فرار ٿي ويو.
سوچڻ جي ڳالهه آهي ته اهي معصوم ٻار پنهنجي ماءُ سان ملڻ، گهر اچڻ ۽ شايد پنهنجي معمول جي زندگي ڏانهن موٽڻ لاءِ آيا هئا، پر کين خبر ئي نه هئي ته سندن انتظار ۾ موت بيٺل آهي...
پوليس موجب، جوابدار فرار ٿيڻ کان پوءِ قتل ۾ استعمال ٿيل لوهي راڊ رستي ۾ هڪ نالي ۾ اڇلائي ڇڏيو. سندس نشاندهي تي هٿيار جي برآمدگي لاءِ ڪارروائي جاري آهي.
جاچ دوران جوابدار اهو به ٻڌايو ته واقعي کان هڪ ڏينهن اڳ به هو رات جو مهوش جي گهر ويو هو، پر مهوش جي مڙس دروازي تان اهو چئي کيس واپس موڪلي ڇڏيو هو ته گهر ۾ سڀئي سمهي رهيا آهن.
هڪ ئي گهر مان هڪ ماءُ ۽ ٽي معصوم ٻار هميشه لاءِ هليا ويا...
هڪ خاندان جون خوشيون اجڙي ويون، هڪ گهر ۾ چار لاش وڇائجي ويا، ۽ ٽن معصوم ٻارن جون زندگيون انهن جي عمر کان اڳ ئي ختم ٿي ويون.
پوليس طرفان جوابدار کي وڌيڪ قانوني ڪارروائي ۽ جاچ لاءِ جاچ آفيسرن حوالي ڪيو پيو وڃي، ته جيئن واقعي جا سمورا پاسا، قتل جو سبب، استعمال ٿيل هٿيار ۽ ٻيا ممڪن ثبوت سامهون اچي سگهن.
الله پاڪ مهوش ۽ سندس ٽنهي معصوم ٻارن جي مغفرت فرمائي ۽ سندن وارثن کي هي ناقابلِ برداشت صدمو سھڻ جي همت عطا فرمائي. آمين.
Copied
