16/05/2024
کولواہ ایجوکیشنل فیسٹیول پنام شھید نجمہ بلوچ 22 جون 2024 ءَ ماں بوائز ہائیر سکینڈری اسکول گیشکور ءَ برجم دارگ بیت۔
مڑاھداریں واجہ ءُ سنگینیں بانُکاں!
انُچشکہ شُما سرپد اِت چیزے وھد ءَ پیسر ما یک زانشتی مراگاھے ماں کولواہ ایجوکیشنل فیسٹیول ءِ نام ءَ جار جتگ اَت۔ ما وتی گوستگیں درشانانی تہ ءَ تچک ءَ اے گپ گُشتگ کہ کولواہ ھما ھند اِنت کہ اُد ءَ زانشتی ءُ ایمنیں چاگردے ءِ نہ بؤگ ءِ سوب ءَ کسان ءُ مزنیں چاگردی نادُراھیاں دوارے جوڈ بوتگ۔ ما ھمے سرپد بہ ایں کہ ھمک راج ءُ چاگرد ءِ دیمروئی ءِ روتگ گوں علم ءُ زانت ءُ پگر ءُ عمل ءَ گون بندوک اَنت بلے مئے چاگرد ءِ تہ ءَ علم ءُ زانتی ھچ رنگیں چست ءُ ایر نیست ھمے سوب ءَ مئے کسانیں گونڈوانی زند چہ وانگجاھاں دور گوزگ ءَ اِنت ھمے گونڈو جتا جتائیں چاگردی سلکاری یاں بھر بؤگ ءَ اَنت ءُ زوتاں ما گند ایں نشہ رنگیں شومکے مئے چاگرد ءَ مان کپتگ ءُ مردماں مجگی ءُ جسدی ھستانکی ءَ زبھر کنان اِنت اے درستیں وھیل ءُ سکیاں ھونڈال گوں علم ءُ زانت ءَ پیوست اَنت ءُ ھمے علم ءُ زانتی چاگرد ءِ نیستی ءِ سوب ءَ مئے گونڈو چہ کتاباں دور رواں اَنت ءُ کسان اُمبری ءَ ڈرائیوری ءُ دگے دابیں پوریاگری ءُ مزدوری ءِ پڑا سر کشان اَنت کہ پہ ما ءُ مئے باندات ءَ اے مزنیں توانے۔
سوھویں راج ءُ ھمبلیں نودربراں!
ھمے جیڑہ ءُ جنجالانی سوب ءَ کولواہ ءِ نودربر ماں عملی پڑا اے اولی گام ءِ زورگ ءَ جاڑی بوتگ اَنت کہ ما وتی ھند ءُ دمگانی مردم ءُ نودربرانی ھاترا یک اُمیتے ءِ درشم ءَ کار کنیں آوانی جیڑھاں آوانی دیم ءَ پدر کنیں ءُ ھمے جیڑھانی گیشوار کنگ ءِ ھاترا ما گوں وتی ھند ءِ مردماں ھمتوار بہ ایں اے درگت ءَ مئے اولی گام کہ کولواہ ایجوکیشنل فیسٹیول ئیگ اِنت کہ اشی ءِ وسیلہ ءَ ما کولواہ ءِ کسانیں نودربر بچک ءُ جنکانی ھاترا یک زانشتی چاگردے اڈ دئیگ ءِ باوست ودی کنیں۔ مئے اے زانشتی مراگاہ ءِ کار گوں تُرندی ءَ جُنزگ ءَ اَنت اے میان ءَ ما وتی ھند ءُ دمگانی مردماں گون جوانیں نزیکی یے جوڈ کُرتگ مردمانی اخلاقی ءُ مالی کُمک ءُ توان ءِ ھاترا اوں مئے سُر ءُ پُر برجاہ اَنت اشان چہ ابید مئے سنگت وتی ھند ءُ دمگانی کُلیں وانگجاھاں شُتگ اَنت ءُ اود ءَ اے مرگاہ ءِ کلوہ سر کُتگ اَت۔ دومی نیمگ ءَ کولواہ ءُ کش ءُ کر ءِ باسما ءُ وانندگیں ٹیچر ءُ اے دگے پڑاں گون سیادی داروکیں مھلوک ءِ پلہ مرزی ءِ گرگ ءَ اوں سوبمند بوتگ ایں۔
کولواہ ءِ مھلوک ءُ بلوچ راج!
اے درستیں گاماں چہ سر گوزگ ءَ پد ما اے آسر اتکگ ءُ سر بوتگیں کہ ائید پنچمی روچ 22 جون 2024 ءَ کولواہ زانشتی مراگاہ ماں بوائز ہائیر سیکنڈری اسکول گیشکور ءَ شھید نجمہ بلوچ ءِ یات ءَ برجم دارگ بیت اے مراگاہ بھرانی تہ ءَ کتاب میڑہ ، تران ، پینل ڈسکشن، بلوچی ربیدگی اسٹال ، بلوچی چاپ، کسمانک ، شئیر ءُ شائری ءُ ڈاکومنٹری ھوار اَنت۔
مئے کار ءُ تیاری انگت جُنزگ ءَ اَنت پمیشکہ اے میان ءَ مارا کُلیں بلوچ راج ءِ کمک ءُ توان ءُ دلبڑی پکار بیت ما چہ شُما ھمے اُمیت دار ایں کہ شُما گوں ما ھمکوپگ ءُ ھمگام بہ اِت ءُ اے کار ءِ تہ ءَ سوبمندی ءَ گوں دیم پہ دیم بؤگ ءَ مئے توکل جوڈ بہ اِت۔
ائید ءِ پنچمی روچ بزانکہ 22 جون 2024 ءَ ما شُمئے راھچار بہ ایں ءُ امیت کنیں کہ شُما الم بھر زور اِت ءُ مارا شرپ بکش اِت۔
