07/03/2024
BABAE TAYO! MALAKAS, KAIBIG-IBIG AT KATANGI-TANGI.
Hindi nakabase sa haba ng iyong salawal
ang respetong dapat na sa iyo’y ibigay
nitong lipunang ikaw mismo ang nagluwal,
at pinag-aalayan mo ng purong pagmamahal.
Hindi nakabase sa papuri nilang mga lalaki
ang halaga at ambag ng iyong uri,
hindi sila ang magdidikta kung ano ang dapat mong pinta
at lalong hindi kung ano ang dapat mong hulma.
Hindi nakabase sa liit ng bewang,
at laki ng balakang
o tambok ng iyong dibdib at puwetan
ang taglay mong kagandahan,
at ang natatangi mong kalakasan.
Walang sinoman ang dapat na mangmata
ng tagumpay at mga sakit mong binata,
ang talino mo’y mula sa sariling isipan
at ang parangal ay para sa iyo lamang.
Tumindig ka’t umabante
sapagkat ikaw ay hindi lamang basta babae,
babae kang maganda’t malakas
bahagi ka ng pagsulong ng nakaraan
at ng ngayon patungo sa bukas.
--Malakas si Maganda (Jabo 03|02|21; 12:57pm)