25/08/2026
𝐁𝐀𝐍𝐓𝐀𝐘 𝐃𝐀𝐆𝐀𝐓 𝐍𝐀𝐁𝐒 '𝐇𝐔𝐋𝐁𝐎𝐓-𝐇𝐔𝐋𝐁𝐎𝐓' 𝐈𝐍 𝐂𝐀𝐑𝐋𝐄𝐒
Na-dakpan sang joint elements sang Iloilo Provincial Bantay Dagat Task Force (IPBDTF), Second Iloilo Provincial Mobile Force Company, kag Regional Intelligence Unit (RIU) 6 ang isa ka fishing vessel nga nagapangisda gamit ang illegal nga Danish Seine ukon "hulbot-hulbot" sa baybayon sang Brgy. Lantangan, Carles sang Agosto 1, 2026.
Ginkilala ang boat captain nga si John Alberto Pasaporte Jr., 42 anyos, taga-Brgy. Botongon, Estancia, upod ang 15 niya ka crew members nga na-intercept sa operasyon.
Gin-impound sang IPBDTF ang fishing boat kag ang mga gamit sini bangud sa paglapas sa Section 97 sang Republic Act 10654 kag Fisheries Administrative Order (FAO) 246-1 nga nagadumili sang operasyon sang Danish Seines kag Modified Danish Seines sa Philippine waters.
Si Pasaporte ang detinado sa Carles Municipal Police Station, samtang gin-release ang iya mga crew bangud indi sila sakop sang penal provisions sang amo nga layi.
Ini nga accomplishment kabahin sang hugot nga kampanya sang Iloilo Provincial Government kontra illegal fishing sa idalum sang direktiba ni Governor Arthur Defensor, Jr.
📍 Carles, Iloilo
📸 Iloilo Provincial Bantay Dagat Task Force