15/08/2026
𝗣𝗔𝗡𝗔𝗟𝗔𝗡𝗚𝗜𝗡 𝗦𝗔 𝗠𝗔𝗛𝗔𝗟 𝗡𝗔 𝗕𝗜𝗥𝗛𝗘𝗡 𝗡𝗚 𝗔𝗦𝗨𝗡𝗖𝗜𝗢𝗡
Panginoong Hesukristo, hindi Mo pinahintulutan na mauwi sa pagkabulok ang katawan ng Iyong pinakamamahal na Ina. Sa halip, kung paanong ikaw ay muling nabuhay at umakyat sa langit, gayundin naman ay minarapat Mo siyang makasalo sa kaluwalhatian Mo kaya't iniakyat Mo siya sa langit.
Ang Pag-aakyat Mo sa Mahal na Birhen sa langit ay nagbibigay sa amin ng pag-asa na may kaluwalhatian sa piling Mo na naghihintay para sa lahat ng tapat sa Iyo. Kaya naman, kami ay dumadalangin na sa tulong ng Mahal na Birhen ay ipagkaloob Mo ang biyaya na aming hinihiling upang sa takdang panahon, ang kaluwalhatian Mo'y amin ding tamasahin, (banggitin ang biyayang hinihiling).
Ang imahen nawa ng Mahal na Birhen ng Asuncion ay magsilbing tanda at tagapagpaala-ala sa amin na pinagpala Mo ang mga tapat sa Iyo at ginagawa silang kasalo sa kaluwalhatian Mo sa langit. Ikaw ang aming Panginoon at Tagapagligtas, noon, ngayon, at magpasawalang hanggan.
Amen.
