05/10/2026
खल्लो दशैँ........
खै, कसरी सुरु गरौं यो दशैँ? दशैँ त आँगनमै आइसक्यो, तर यो मनलाई कसरी खुसी बनाउनु?
आज प्रायः हरेक घरका सदस्यहरू देश बाहिर छन्। कसैका बुवा, कसैका छोरा, कसैका श्रीमान् त कसैका बुहारीहरू रोजीरोटीको खोजीमा साउदी अरब, मलेसिया, कतार, दुबई, ओमान, कुवेत—जताततै परदेशको भूमिमा पसिना बगाइरहेका छन्। घरमा चाडपर्व आए पनि सँगै चाड मनाउने आफ्ना मान्छेहरू टाढा परदेशमा छन्, जसले गर्दा हरेक घरका आँगनहरू सुनसान र अधुरा बनेका छन्।
यसैबीचमा, बाढी र पहिरोको दर्दनाक विपत्तिमा परेर हजारौं दाजुभाइ तथा दिदीबहिनीहरू घरबारविहीन भएका छन्। जसले आफ्नो सर्वस्व गुमाए, उनीहरूको आँसु अहिलेसम्म सुकेको छैन। अझ विडम्बना त यो छ कि, विपत्तिले बगाएर लैजाँदा कतिपय प्रियजनहरूको लासको अत्तोपत्तोसमेत छैन। जिउँदो वा मृत शरीर भेटिने कुनै टुंगो नभएपछि, दशैँ रोकिने भयो, चाडको जुठो पर्ला वा कर्म गर्नुपर्ला भनेर आफन्तहरूले कुशको लास बनाएर दाहसंस्कार गर्न बाध्य छन्। अहिले उनीहरू त्यही कुशको लासलाई साक्षी राखेर किरियापुत्री बस्न, काजक्रिया गर्न र खास्टो ओढेर बस्न विवश छन्।
घरबारसहित परिवारका सबै सदस्यहरू गुमाएकाहरू आज खुला आकाशमुनि रित्तो हात बाँचिरहेका छन्। कतिपयका घरमा त यी सब विपत्ति देख्ने कोही आफ्ना छैनन्, घरका मुख्य मान्छेहरू परदेशमा छन् त कोही यस धर्तीबाट अस्ताइसकेका छन्। चाडपर्वको खुसी साट्ने घर र परिवार नै बाँकी नभएपछि, आफन्तको लासको टुंगो नभएर कुशको लास जलाउनुपर्ने यो कहालीलाग्दो पीडा बोकेर यो मन कसरी खुसी हुन्छ? रगत र आँसुले भिज्एको यो दशैँ इतिहासकै सबैभन्दा बढी खल्लो र नरमाइलो बनेको छ।
हामीले चाडपर्व मनाउनै हुन्न भन्ने होइन। घरपरिवार साथमै हुनेहरूले आफ्नै घरभित्र सामान्य रूपमा मनाउनुहोस्, परिवारसँग रमाइलो गर्नुस्। तर, दायाँबायाँ टोल-छिमेकमा कुनै पनि किसिमको तडकभडक र चर्को रमाइलो नगर्नुहोस्। किनकि, हाम्रै छिमेकीहरू अहिले रोइरहेका छन्। सँगै रहेका, सुखदुःखमा साथ दिनुपर्ने परिवारहरू आज पीडामा छन्। उनीहरूको यो मर्माहत अवस्था र आँसुका सामु हामी कसरी खुला रूपमा नाच्न र रमाइलो गर्न सकौला र? कृपया, उहाँहरूको पीडाप्रति केही समवेदना र लचकता अपनाइदिनुहोस्।
वास्तवमा, एउटा छिमेकीलाई दुख्दा अवश्य पनि अर्को छिमेकी रुनुपर्छ, र एक जना छिमेकी रोएको देख्दा अर्को छिमेकीले धाप मारेर सान्त्वना दिनुपर्छ। यही नै हाम्रो साँचो मानवीय धर्म र छिमेकीको कर्तव्य हो।
#दशैं #आयो #तर #खल्लो fans
