25/02/2026
फागुनको हावासँगै
मतका रंगहरू उड्लान्,
तर हाम्रो सम्बन्धको आकाश
धमिलो नहोस्।
हामी यही माटोका सन्तान हौं,
यही बाटोका सहयात्री।
आज तर्क फरक होला,
तर भोलि फेरि यही चौतारीमा भेट हुनैपर्छ।
मतपत्रको रेखाले
मनको दूरी नकोरियोस्,
शब्दका तीरले
स्नेहको छाती नछेडियोस्।
लोकतन्त्र भनेको
घृणाको ज्वाला होइन,
संवादको उज्यालो हो।
विचार फरक हुन सक्छ,
तर हृदय किन टाढा बनाउने?
फागुन बित्ला, चुनाव सकिएला,
तर सम्बन्धहरूको ऋतु
सधैं हरियाली रहोस्।
