16/06/2026
चुरेगाउँका स्थानीयद्वारा भीमदत्त राजमार्ग विस्तारमा १५/१५ मिटर मात्रै कायम गर्न प्रधानमन्त्रीसमक्ष माग
धनगढी : कैलालीको चुरेगाउँ क्षेत्रका स्थानीयवासीले भीमदत्त राजमार्ग विस्तारका क्रममा सडकको दायाँ-बायाँ १५/१५ मिटर मात्रै क्षेत्र कायम गर्न माग गर्दै प्रधानमन्त्री तथा मन्त्रिपरिषद्को कार्यालयमा ज्ञापनपत्र पठाएका छन्।
स्थानीयवासीको तर्फबाट युवा नेता तथा व्यवसायी राम भाट नरबहादुर तामाङ लगायतले कैलालीका प्रमुख जिल्ला अधिकारी हिरालाल रेग्मीमार्फत प्रधानमन्त्री कार्यालयमा ज्ञापनपत्र पठाएका हुन्।
ज्ञापनपत्रमा भीमदत्त राजमार्गसँग जोडिएका कैलाली, डोटी र डडेल्धुराका बासिन्दाको दैनिक जनजीवन, बसोबास तथा व्यवसाय सडक विस्तारको वर्तमान निर्णयबाट प्रभावित हुन सक्ने उल्लेख गरिएको छ। हाल कायम रहेका बस्ती, घर, पसल तथा अन्य संरचनालाई जोगाउने गरी सडकको दायाँ बायाँ १५/१५ मिटर मात्रै विस्तार गर्नुपर्ने स्थानीयको माग छ।
स्थानीयवासीले सडक विस्तारका नाममा आवश्यकताभन्दा बढी क्षेत्र खाली गराउँदा हजारौं नागरिक विस्थापित हुने, ठूलो आर्थिक क्षति पुग्ने तथा सामाजिक असरसमेत पर्ने बताएका छन्। उनीहरूले सडक स्तरोन्नति र यातायात व्यवस्थापनलाई प्रभावकारी बनाउने पक्षमा आफूहरू रहेको जनाउँदै जनताको हित र यथार्थ अवस्थालाई ध्यानमा राखी व्यावहारिक निर्णय गर्न सरकारसँग आग्रह गरेका छन्।
ज्ञापनपत्रमा सम्बन्धित निकायले स्थानीयको भावना, आवश्यकता र विद्यमान बस्तीको अवस्थालाई ध्यानमा राखेर सडक विस्तारसम्बन्धी मापदण्ड पुनरावलोकन गर्न तथा भीमदत्त राजमार्गको दायाँ-बायाँ १५/१५ मिटर मात्रै विस्तार हुने व्यवस्था मिलाउन माग गरिएको छ।
उक्त ज्ञापनपत्र प्रमुख जिल्ला अधिकारी रेग्मीलाई बुझाइएको थियो। ज्ञापनपत्र प्रधानमन्त्री तथा मन्त्रिपरिषद्को कार्यालयमा पठाइने जानकारी दिइएको छ।
