26/08/2026
रसुवामा भीषण बाढी : टिमुरे बजार तहसनहस
रसुवा — रसुवाको गोसाइँकुण्ड गाउँपालिका–२ टिमुरेस्थित भोटेकोशी नदीमा बुधबार बिहान आएको भीषण बाढीले तटीय क्षेत्रमा ठूलो क्षति पुर्याएको छ। बिहान करिब साढे ८ बजे अचानक ठूलो आवाजसहित आएको बाढीले टिमुरे बजारका घर, पसल तथा अन्य संरचनामा क्षति पुर्याएको स्थानीयले बताएका छन्।गोसाइँकुण्ड गाउँपालिका–२ का वडा सदस्य पेमा दोर्जे घलेका अनुसार, बाढीले सयभन्दा बढी घर रहेको टिमुरे बजारको ठूलो भाग बगाएको छ। अचानक आएको बाढीका कारण स्थानीयले सामान तथा अन्य सामग्री सुरक्षित गर्ने समयसमेत पाएनन्।“बिहान साढे ८ बजे ठूलो आवाजका साथ बाढी आयो। हामीले केही सोच्नसमेत पाएनौँ। जो जस्तो अवस्थामा थियौँ, भागेर माथि डाँडामा आएर बसेका छौँ,” वडा सदस्य घलेले बताएका छन्।बाढीका कारण भोटेकोशी नदी आसपासका बस्तीमा त्रास फैलिएको छ। तटीय क्षेत्रमा रहेका स्थानीयहरू सुरक्षित स्थानतर्फ सर्न थालेका छन्।
