13/01/2026
Zo fantastisch, zo leuk, zo enorm blij met een prinses en ook nog eens in de straat 🐸💛🐸🩷CV de Kwekkerte Boekoel
H.D.H Prinses Evelien I (Evers) nuje veurgengster 2026 en eerste prinses biej CV De Kwekkerte Boekoel
Veur es Kwekkerte wore d’r organizatories al ’n tiedje veur klaor. Veurig jaor in de optoch kóste v’r zeen det de Boekoel d’r ouch meer den klaor veur is (neet weitende waat d’r al in de pieplien zoot). En op zaoterdig 10 jannewarie 2026 woor ’t den eindelik zover.
Eers waerde ex-jubelejumprins Dominique I nag opgenaome biej de Aad-prinse en moogt d’r zich noe Aad-prins Dominique numme.
Mer toen…. De sjpanning in de zaal sjteeg, d’r kwome van versjillende kenj verdèkte miense de zaal ingeloupe. Ein van die luuj mós ’t toch zin? En jao. Nao de Hoeskwakers en de Kuulköpkes höbbe ouch eindelik de Kwekkerte ’n prinses. Prinses Evelien I (Evers) ónthulde zichzelf es de eerste prinses biej de Kwekkerte op de Boekoel. Het zal gaon regere mit de sjpreuk: “Maak van geweun bezónjer!”
En mit de eerste keer ’n prinses veurop zal ’t den ouch zeker ’n bezónjer sezoen waere. Prinses Evelien I is zeker gènne ónbekènde zin, ’t is al 15 jaor biej de garde van de Kwekkerte, sins 2017 bestjuurslid en óngertösse ouch sentefoekser. Ouch neet ónbekènd in 't vastelaoveslaeve is häöre vrundj Dennis es vors van de Nachtegale en dit jaor dao ouch adjudant van jubelejumprins Loek II.
Veurdet Prinses Evelien veur de 1e keer in de polonaise veurop kós, maakte het eers häör adjudante bekènd: Eefke op den Camp, Lotte op den Camp en Michelle Beeren. En ouch veur häör adjudante beteinde det zie de eerste vrouwelijke adjudante biej de Kwekkerte zin.
Naodet ’t geheel vrouwelik gezelsjap kómpleet woor, waerde d’r nag ’n sjoon fees gevierd in de Kwekkertepool!
Op zónjig 08 fibberwarie zal de resepsie van Prinses Evelien I plaatsvinje en zit g’r van herte oetgeneujd óm Prinses Evelien I en häör adjudante ’n hendje te kómme gaeve.
