11/05/2026
ဒီ သုံးသပ်ချက်လေး ကြိုက်လို့ပါဗျာ
သတ္တ ဂင်္ဂါ
ပွဲပြီးအတွေးအမြင်များ … (၁၉၈)
ဝက်ဟမ်း ၀-၁ အာဆင်နယ်
အင်မတန်ကို ရင်ခုန်စိတ်လှုပ်ရှားစရာအခိုက်အတန့်တွေ ပေါင်းစပ်ထားတဲ့ပွဲတစ်ပွဲပါ။
ဒီလိုပွဲမျိုးက အမြဲတမ်းမမြင်ရဘူး။ ဝက်ဟမ်းက တန်းဆင်းဇုန်တိုက်ပွဲအတွက် အိမ်ကွင်းအားနဲ့ ကစားသမားတိုင်းက ပေးဆပ်မှုအပြည့်နဲ့ကစားတယ်။ အာဆင်နယ်ကလည်း မဖြစ်မနေအနိုင်ရဖို့လိုတာကြောင့် အမှားအယွင်းမရှိအောင်ကြိုးစားရတယ်။
ဒီပွဲကို နည်းပြတွေရဲ့ ဗျူဟာတွေဘာတွေကို မေ့ထားချင်လောက်အောင်ကို ပွဲအတွင်း အရှိန်အဟုန်က အရမ်းပြင်းထန်လွန်းတယ်။ ဆိုလိုချင်တာက တိုက်စစ်ကစားပုံအလန်းစားတွေနဲ့ သွင်းဂိုးတွေ မြိုင်မြိုင်ဆိုင်ဆိုင်မမြင်ရပေမဲ့ ဒီတရာသီလုံး အတိုင်းအတာအရ ဒီပွဲက နှစ်သင်းစလုံးအတွက် အဆုံးအဖြတ်လိုပုံစံဖြစ်နေတယ်။ အာဆင်နယ်က သရေကျရင်တောင် ကိုယ့်ကြမ္မာကိုယ်ဖန်တီးခွင့်ရှိသေးတယ်ဆိုပေမဲ့ သူတို့ အနိုင်ရဖို့တကယ်ကို လိုအပ်တယ်။
ဝက်ဟမ်းကလည်း ဒီပွဲနိုင်မှကို ဖြစ်မှာ။
ပထမပိုင်းမှာ ဝက်ဟမ်းက ခပ်ကြမ်းကြမ်းကစားတယ်၊ အာဆင်နယ်က တိုက်စစ်ကိုအလွန်အကျွံမဆင်ရဲဘူး။
ပွဲက အဝေးဘောတွေများတယ်၊ ထောင့်ကန်တွေက ဂိုးရဖို့ကြိုးစားကြတယ်။
ဒုတိယပိုင်းမှာလည်း ဝက်ဟမ်းရဲ့တုန့်ပြန်မှုက အတော်လေးကောင်းတာကြောင့် အာဆင်နယ်အခက်တွေ့နေရတယ်။ ဒီနေရာမှာ အာတီတာကိုတော့ တကယ်ချီးကျူးချင်တယ်။ ပွဲအတွင်းမှာ မိနစ်တိုင်း၊ စက္ကန့်တိုင်းကို အာတီတာ က အလုပ်လုပ်သွားတာလို့ဆိုရမယ်။
ပထမပိုင်းမှာ ဘန်ဝှိုက်နာသွားတော့ ဘန်ဝှိုက်နေရာ ဇူဘီမန်ဒီထည့်ပြီး ရိုက်ကို ညာခြမ်းဆင်းကစားစေတယ်။ ကွင်းလယ်မှာ စကယ်လီနဲ့ ဇူဘီမန်ဒီတို့က Physical အရ ဝက်ဟမ်းကွင်းလယ်ကို မယှဉ်နိုင်ဘူး။
ဝက်ဟမ်းကွင်းလယ်မှာက ဆောက်ရှက်ခ်နဲ့ဖာနန်ဒက်တို့က အတော်လေး Physical မြင့်မားကြတာကြောင့် ဘန်ဝှိုက်ထွက်ပြီးနောက်ပိုင်းမှာ အာဆင်နယ်က ရုန်းကန်ရတယ်။ ဒုတိယပိုင်းမှာ ကာလာဖီအိုရီကိုထုတ်တယ်၊ မော့စကွဲယားထည့်တယ်၊ စကယ်လီကို ဘယ်ခြမ်းပို့လိုက်တယ်။ ရိုက်စ်က ကွင်းလယ်ထဲပြန်ရောက်ပြီး ကွင်းလယ်က ပြန်ငြိမ်သွားတယ်။
အာဆင်နယ်က တည်ငြိမ်ဖို့ကိုပဲ လုပ်နေရပြီး တိုက်စစ်ကိုမမြှင့်နိုင်သေးဘူး။
ဝက်ဟမ်းကွင်းလယ်က ဖာနန်ဒက်ကလည်း လုပ်အားနှုန်းလည်းကောင်းသလို၊ ဘောလုံးဖြန့်တာတွေလည်း အတော်လေးကောင်းမွန်တာကြောင့် အာဆင်နယ်ကို ရဲရဲ မဆင်ရဲဘူး။ မိနစ် ၇၀ နဲ့ ၈၀ ကြားမှာ အာဆင်နယ်တောက်လျှောက်အဖိခံရပြီး ဖာနန်ဒက်လွတ်လွတ်ကျွတ်ကျွတ်ကန်ခွင့်ရတယ်။
အတော်လေးကို အသည်းယားစရာကောင်းတဲ့အခြေအနေ။
ဒါပေမဲ့ ဖာနန်ဒက်က တိုက်စစ်မှုးတယောက်မဟုတ်တာကြောင့် ဆုံးဖြတ်ချက်က မပြတ်သားဘူး။ မလိုအပ်ဘဲ နောက်တချက်တို့လိုက်ကြောင့် ဂိုးသမားနဲ့နီးသွားပြီး ကန်သွင်းချက်က ရာယာကိုထိပြီး ထောင့်ကန်ဘောဖြစ်သွားတယ်။ အဲဒီအလုံးသာ ဂိုးလိုက်ရင် အာဆင်နယ်အတော်ကို ခက်ခဲသွားမှာ။
အာဆင်နယ်ရဲ့ သွင်းဂိုးကတော့ အဆင့်မြင့်ပါတယ်။ ဟာဗက်ရဲ့ တချက်ထိနဲ့ အိုဒီဂတ်ပြေးလမ်းကြောင်းပေါ်ခင်းလိုက်တာက အတော်လေးကောင်းပြီး အိုဒီဂတ်ကလည်း ဘောလုံးကို ပိုင်ပိုင်ဆိုင်ဆိုင်ပဲ ဆွဲလာပြီး ထရော့ဆက်ကို အပိုင်ခင်းပေးလိုက်တာ ထရော့ဆက်က တဂိုးတည်းသော အနိုင်ဂိုးကိုသွင်းလိုက်တယ်။
ဒါက အလှည့်အပြောင်းတခုဆိုပေမဲ့ အာဆင်နယ်တောင့်ခံခဲ့ရတဲ့ အပိုင်းတွေကလည်းအရမ်းစိတ်လှုပ်ရှားစရာကောင်းတယ်။
၉၀+၄ မိနစ်မှာ ဝက်ဟမ်း ထောင့်ကန်ဘောကနေ ပြန်ကျလာတာကို ဝီဆင်လ်က အပြင်းကန်သွင်းပြီး ချေပဂိုးသွင်းလိုက်တယ်။ အာဆင်နယ်အတွက် တကယ့်ကို ကမ္ဘာပျက်မယ့်ချေပဂိုး။
ဘာဖြစ်လို့လည်းဆိုတော့ လက်ကျန် ၂မိနစ်ပဲရှိတော့တဲ့အချိန်ကိုး။
ဒါပေမဲ့ VAR ရဲ့ အကျိုးကျေးဇူးက ဒီနေရာမှာ အတော်လေးအလုပ်ဖြစ်တယ်။
တကယ်လို့များ VAR သာ မရှိခဲ့ဘူးဆိုပါစို့။ ကွင်းလယ်ဒိုင်ကလည်း ဂိုးပေးလိုက်ပြီးပြီ။ ၁-၁ ရလဒ်နဲ့လည်း ပြီးသွားမယ်။ အဆုံးသတ်မှာ အာဆင်နယ်က ဂိုးကွာခြားချက်နဲ့ ချန်ပီယံဆုဖလားကို လက်လွှတ်လိုက်မယ်။ တဖက်မှာ ဝက်ဟမ်းကလည်း ဒီက ရတဲ့ တစ်မှတ်နဲ့ စပါးကို အသာရပြီး တန်းကျန်ရစ်ခဲ့မယ်ဆိုရင် ..
ဒီဖြစ်ရပ်ကြီးက အမြဲတမ်း နှမျောတသသပြောနေရမှာပါ။
အခုတော့ VAR ရဲ့ မှန်ကန်တဲ့ဆုံးဖြတ်ချက်ကြောင့် အာဆင်နယ်က မပေးသင့်တဲ့ ဂိုးကို မပေးလိုက်ရဘဲ ၃မှတ်ရသွားတယ်။ ဝက်ဟမ်းရှုံးပွဲကြောင့် စပါးကလည်း တန်းဆင်းဇုန်တိုက်ပွဲမှာ တင်ကျန်ရစ်ဖို့အလေးသာသွားတယ်။
ဝက်ဟမ်းဂိုးဖြစ်ရပ်ကို သေချာပြန်ကြည့်တဲ့အခါမှာ ဝက်ဟမ်းက နှစ်ယောက်တောင် အာဆင်နယ်ဂိုးသမားရာယာကို ဥပဒေပ တားဆီးဖို့ကြိုးစားခဲ့တာ အထင်အရှားမြင်နိုင်ပါတယ်။
ဒါကြောင့် ကွင်းလယ်ဒိုင်အနေနဲ့ VAR ပြန်ကြည့်ဖို့ပဲ ဆုတောင်းနေရပြီး တကယ်ပြန်ကြည့်တဲ့အခါမှာလည်း မှန်ကန်တဲ့ဆုံးဖြတ်ချက်ကို ချမှတ်နိုင်ခဲ့တာပဲ ဖြစ်တယ်။
အာဆင်နယ်က ဒီနိုင်ပွဲကြောင့် ချန်ပီယံဖြစ်ဖို့ နှစ်ပွဲသာ အနိုင်ကစားဖို့လိုတော့မယ်။
အိမ်ကွင်းမှာ တန်းဆင်းပြီးသား ဘန်လေကို ဧည့်ခံရမယ်။
အဝေးကွင်းမှာ အမှတ်လိုအပ်ချက်မရှိတဲ့ ပဲလေ့စ်ကို သွင်းရင်ဆိုင်ရမယ်။
ပဲလေ့စ်က အာဆင်နယ်နဲ့ ကစားပြီးလေးရက်အကြာမှာ ကွန့်ဖရန့်လိဂ်ဗိုလ်လုပွဲကစားဖို့ရှိတာဖြစ်လို့
အိမ်ကွင်းဆိုပေမဲ့ သူတို့အနေနဲ့ တစ်ရာရာခိုင်နှုန်း အားထုတ်မှာမဟုတ်တော့တာ အသေအချာပါပဲ။
ဒါပေမဲ့ အာဆင်နယ်အနေနဲ့တော့ မပေါ့ဆသင့်သေးပါဘူး။
ဒီအချိန်မှာ ပြိုင်ဘက်မန်စီးတီး အမှတ်လျော့နိင်တာတွေ ဘာတွေကို ထည့်ကို တွေးနေစရာမလိုဘူး။
ဘန်လေနဲ့ပဲလေ့စ်ကို အနိုင်ကန်ပြီး ဖလားယူဖို့ပဲ စဉ်းစားရတော့မှာပါ။
ဝက်ဟမ်းရဲ့ ဒီရှုံးပွဲကြောင့် အဆင့် လိဒ်နဲ့နော်တင်ဟမ်ဖောရက်တို့က တန်းဆင်းဇုန်က တရားဝင်လွတ်မြောက်သွားကြပြီး စပါးကလည်း အိမ်ကွင်းမှာ မနက်ဖြန်ပွဲကို အနိုင်ကန်လိုက်ရင်
ဝက်ဟမ်းကို လေးမှတ်အထိ ဖြတ်သွားနိုင်မှာဖြစ်လို့ တန်းကျန်ရစ်ဖို့ အကောင်းဆုံးအခြေအနေကို ပိုင်ဆိုင်သွားခဲ့ပြီလို့ပဲ ဆိုရမှာပါ။ ဒီပွဲရလဒ်က ..အတော်လေးကို သက်ရောက်မှုကြီးမားခဲ့တဲ့ပွဲလို့ ဆိုရမှာဖြစ်ပြီး
အာဆင်နယ်ကတော့ ဒီပွဲမှာ ချန်ပီယံခြေစွမ်းမျိုးမဟုတ်ပေမဲ့ ချန်ပီယံစိတ်ဓာတ်နဲ့ချန်ပီယံလပ်ကီးကို ပိုင်ဆိုင်နိုင်ခဲ့တာလို့ တင်စားချင်ပါတယ်။
ရေးသားသူ / ထွန်းဇော်ဝင်း
ဓာတ်ပုံ / Premierleague
