10/10/2025
မြန်မာလူမျိုးတို့၏ ရှေးအစဉ်လာလောကီမင်္ဂလာ (၁၂)ပါး
××××××××××××××××
မြန်မာတို့သည် မင်္ဂလာ ဆိုသည့် စကားကို အလွန်နှစ်သက်ကြသည်။
တစ်ဦးနှင့်တစ်ဦး တွေ့ဆုံကြသောအခါများတွင် မင်္ဂလာပါ ဟု နှုတ်ဆက်ကြသည်။
တချို့အိမ်များ စျေးဆိုင်များတွင် မင်္ဂလာပါ ဟူသော စာတမ်းများ ချိတ်ဆွဲထားကြသည်။
မင်္ဂလာဆိုသည်မှာ အလွန် ကျက်သရေရှိခြင်း ဖြစ်သည်။
မြန်မာတို့၏ဘဝတစ်သက်တာတွင်
ပြုလုပ်ကျင်းပနိုင်သော
မင်္ဂလာ တစ်ဆယ့်နှစ်မျိုး ရှိသည်။ ၎င်းတို့မှာ -
(၁) ပဋိသန္ဓေ အချိန်အခါ လရက်စေ့ရောက်သဖြင့် ဖွားမြောက်အောင်မြင်ခြင်း မင်္ဂလာ၊
(၂) ဖွားသည်မှ နောက်၃ရက်မြောက်နေ့၌ ရတနာသုံးပါး ဘိုးဘွားများကို ရှိခိုးခြင်း မင်္ဂလာ၊
(၃) ဖွားသည်မှ ၇ရက်မြောက်နေ့၌ ခေါင်းဆေး ဆံရိတ်ခြင်း ဟူသော မင်္ဂလာ၊
(၄) ရှေးလူကြီးသူမတို့ သတ်မှတ်ထားသော ရက်ကောင်းရက်မြတ်၌ ပုခက်ဧယာဉ်တင်ခြင်း မင်္ဂလာ၊
(၅) ဖွားသည်မှ နောက် ၇၅ရက်မြောက်သောနေ့၌ ကွမ်းဦးခွံ့ခြင်း မင်္ဂလာ၊
(၆) ဖွားသည်မှ နောက် ၃လမြောက်သောနေ့၌ နေ၊လ တို့ကို ပြသကြည့်ရှုစေခြင်း မင်္ဂလာ၊
(၇) ဖွားသည်မှနောက် ရက်ပေါင်း ၁၀၀ မြောက်၌ အမည်သညာမှည့်ခြင်း မင်္ဂလာ၊
(၈) ဖွားသည်မှ ၆လမြောက်၌ ထမင်းဦးခွံ့ခြင်း ဟူသော မင်္ဂလာ၊
(၉) သင့်တင့်လျောက်ပတ် အချိန်အရွယ် ကျရောက်လတ်သောအခါ ဆံထုံးဖွဲ့ခြင်း မင်္ဂလာ၊
(၁၀) သင့်တင့်လျောက်ပတ် အချိန်အရွယ် ကျရောက်လတ်သောအခါ နားထွင်းခြင်း မင်္ဂလာ၊
(၁၁) သင့်တင့်လျောက်ပတ် အချိန်အရွယ် ကျရောက်လတ်သောအခါ သာသနာတော် အတွင်းသို့ သွတ်သွင်းချီးမြှင့်ခြင်း ဟူသော ရှင်ပြု မင်္ဂလာ၊
(၁၂) သင့်တင့်လျောက်ပတ် အချိန်အရွယ် ကျရောက်လတ်သောအခါ မျိုးနွယ်ဂုဏ်ရည် တူသော သတို့သား သတို့သမီးတို့ လက်ထပ်ထိမ်းမြားရခြင်း မင်္ဂလာ စသည်တို့ဖြစ်သည်။
ထိုမင်္ဂလာ ၁၂ပါးကို လောကီမင်္ဂလာ ၁၂ပါး ဟုလည်း ခေါ်ကြသည်။ အများအားဖြင့် အမည်ပေးကင်ပွန်းတပ်မင်္ဂလာ၊ ခေါင်းဆေးမင်္ဂလာ၊ ရှင်ပြုမင်္ဂလာနှင့် လက်ထပ်မင်္ဂလာတို့သာ မြန်မာတို့ အလေးအနက်ထား ပြုလုပ်တတ်ကြသည်။
၁။ ဖွားမြောက်အောင်မြင်ခြင်း ဝိဇာတမင်္ဂလာ။
၂။ မွေးဖွားပြီး ၃ရက်မြောက်နေ့၌ ရတနာသုံးပါးမိဘဘိုးဘွားတို့အား နန္ဒိမုခနတ်တို့အား ပူဇော်ရှစ်ခိုးခြင်း မုခဒဿ နမင်္ဂလာ။
၃။ မွေးဖွားပြီး ၇ရက်မြောက်နေ့၌ ဆံရိတ်ခြင်း ကေသစ္ဆဒနမင်္ဂလာ။
၄။ ရှေးထုံးအရ သင့်မြတ်သောနေ့တွင် ပုခက်တင်ခြင်း ကရဏမင်္ဂလာ။
၅။ မွေးဖွားပြီး ၇၅ရက်မြောက်၌ ကွမ်းဦးခွန့်ခြင်း တမ္ဗုလပတ္တမင်္ဂလာ။
၆။ မွေးဖွားပြီး ၃လပြည့်နေ့၌ နေ လ တ်ု့ကို ပြသကြည့်ရှုစေသော ရဝိန္ဒုဒဿ နမင်္ဂလာ။
၇။ မွေးဖွားပြီး ရက်ပေါင်း၁၀၀ပြည့်၌ အမည်သညာမှည့်ခေါ်ခြင်း နာမကရဏမင်္ဂလာ။
၈။ မွေးဖွားပြီး ၆လပြည့်နေ့၌ ထမင်းဦးခွန့်ခြင်း ပဌမဘတ္တမင်္ဂလာ။
၉။ သင့်တင့်သောအချိန်ကာလတွင် ဆံထုံးဥသျှောင်ထုံးဖွဲ့ခြင်း ကေသဗန္နနမင်္ဂလာ။
၁၀။သင့်တင့်သောအချိန်ကာလတွင် နားထွင်းခြင်း ကဏ္ဏဝိဇ္ဈနမင်္ဂလာ။
၁၁။သင့်တင့်သောအချိန်ကာလတွင် သာသနာတော်သို့ ပို့ဆောင်ခြင်း သာသနာ နဂ္ဂဟမင်္ဂလာ(ပဗ္ဗဇ္ဇမင်္ဂလာ)။
၁၂။သင့်တင့်သောအချိန်ကာလတွင် လက်ထပ်ထိန်းမြားပေးခြင်း အာဝါဟဝိဝါဟမင်္ဂလာ တို့ဖြစ်ပါသည်။
မူရင်း📃 Credit
✏ ✏ ✏ ✏ ✏
#စစ်မှန်သောချစ်ခြင်းအားဖြင့်
#ပြန်လည်မျှဝေပါသည်
