09/01/2025
အရူးမကြီးလိုပဲ လုပ်ချင်ရာလုပ်နေရရင် ပျော်တယ်ကွယ်
" ဖြူဖြူကို တစ်ချို့ကပြောကြတယ် ဘာတွေလုပ်နေတာလဲ ဘာဖြစ်နေတာလဲပေါ့ ။ ဖြူဖြူက လက်တွေ့ဆန်ဆန်လုပ်ချင်တယ် ။အရူးမကြီးလိုပဲ ဖြူဖြူ ငိုချင်ရင် ငိုလိုက်မယ် ရယ်ချင်ရယ်လိုက်မယ် ။ ငါ့ရဲ့ ရေဗက္ကာကိုအသံသွင်းတော့ ငိုယိုရင်းဆိုပြီး အသံသွင်းခဲ့တယ် ။ အန္တာရယ်ကြောင်မလေးဆိုတော့ ရယ်ရင်းအသံသွင်းခဲ့တယ် ။ ဖြူဖြူ့ကြောကိုနပ်တဲ့ အသံဖမ်းအင်ဂျင်နီယာတစ်ယောက်တော့ အခန်းထဲထည့်ထားရတာပေါ့။ သူလုပ်ချင်တာသူလုပ်လိမ့်မယ် လွှတ်ထားပြီး ဆက်သွားဆိုတာမျိုးလေ ။
နောက်ပြီး ဘုရားပေးတဲ့ ထူးခြားတဲ့အသံတစ်ခုရှိမယ် ။ ဒါနဲ့ပဲ မရပ်နေချင်ဘူး Performance ကိုလုပ်ချင်တယ် ။ လူကတစ်ယောက်နဲ့ တစ်ယောက်မတူဘူးလေ ။ Performance ကို မလုပ်တဲ့သူတွေကိုလည်း မကောင်းပြောတာမျိုးမဟုတ်ပါဘူး ။ တစ်ယောက်နဲ့ တစ်ယောက်က တင်ဆက်ပြသပုံခြင်းမတူဘူး Interpretation ပုံစံကမတူဘူး ။ တစ်ချို့ကကျတော့လည်း မျက်လုံးလေးနဲ့စကားပြောတယ် တစ်ချို့ကတော့ နှုတ်ကလေးနဲ့ပြောတယ် တစ်ချို့က Visual Expression အနေနဲ့ ပြောတာရှိမယ် ဒီလိုပါပဲ ။
ဖြူဖြူကြိုက်ပြီးကြည့်ခဲ့ရတဲ့အထဲမှာ ပြည်တွင်း အနုပညာရှင်တွေအပြင် နိုင်ငံတကာ က သူတွေလည်းပါတယ် ။ Bon Jovi , Celine Dion , Madonna , Michael Jackson စသဖြင့် သူတို့အားလုံးမှာ ကိုယ်ပိုင်ဟန် ကိုယ်ပိုင်တင်ဆက်ပုံတွေရှိတယ် ။ စင်ပေါ်မှာ ဖျော်ဖြေတဲ့အခါ ဘယ်တော့မှ ဆပ်ပြာသည်လင်ပျောက်ပုံဖြစ်မနေကြဘူး သိတယ်မှတ်လား ။ ဖြူဖြူလည်း အလှအပ အတောင်တွေ အမြီးတွေ အတက်တွေအခတ်တွေ လုပ်ရတာ ဖြူဖြူသဘောကျတယ် အဲ့တာကြောင့် လုပ်တယ် ။ ဘာလို့လုပ်လဲဆိုရင် လုပ်ရတာပျော်တယ်ကွယ် ။ ဝါသနာအတိုင်းကိုယ်လုပ်ချင်တဲ့ အတိုင်း လုပ်တာပဲလေ ။ မကြိုက်ရင် လည်း မကြည့်လို့ရတယ်လေနော် အားမပေးလို့လည်း ရတယ် ဒါလူတိုင်းရဲ့ လွတ်လပ်ခွင့်ပဲ ။ မဖွယ်မရာတက်လုပ်ပြနေတာလည်း မဟုတ်ဘူးလေနော် ။ သူများ လက်ခလယ်ထောင်ဆဲပြီး မတော်မတရားတွေ ဖော်ချွတ်ပြသပြီး ဆိုပြနေတာလည်းမဟုတ် ပရိတ်သတ် ကို အဆိပ်အတောက်လုပ်ပြနေတာမှမဟုတ်တာ ။ အဲ့တော့ ကြည့်တဲ့သူတွေကလည်း ဟယ် ဒီတစ်ခါ ဖြူဖြူက ဒီတစ်ခါ အတောင်ကအမဲနော် နောက်တစ်ခါ ဘာများလုပ်ပြမလဲမသိဘူး ဆိုပြီး မျှော်ကြတဲ့ ပရိတ်သတ်လည်းရှိတာပဲ ။ အဲ့တာမို့လို့ ဖြူဖြူကလည်း အတောင်တွေအတက်တွေကို ရွှေရောင် အဝါရောင် အနီရောင် တွေ ပေါင်းစုံဝယ်ရပြန်ရော ။ "
(မ) ဖြူဖြူကျော်သိန်း ဖြေခဲ့ဖူးတဲ့ အင်တာဗျူး နဲ့ အစီအစဥ်တွေကနေ တစ်ခုစီ ကောက်နှုတ်ယူပြီး အဆင်ပြေသလို စာပြန်စီထားတာဖြစ်ပြီး အမှားပါခဲ့သည် ရှိသော် Major M ရဲ့ အမှားသာဖြစ်ပါတယ်
