08/04/2026
https://www.facebook.com/share/p/1AZQ47x3kB/
👉 "လူတိုင်း သေချာ မသိကြသေးတဲ့ Baby Photography"
👶📸 Baby Photography ဆိုတာ ဘာလဲ။
အလွယ်ဆုံးပြောရရင်တော့ ကလေးဓါတ်ပုံရိုက်တာပေါ့။ ကလေးဓါတ်ပုံရိုက်တာ သိပ်မခက်ဘူးထင်တယ်ဆိုရင်တော့ ခုရေးထားတာလေးဖတ်ပြီးရင် Baby photography ရဲ့ ကြီးကျယ်ခမ်းနားမှုကို သဘောပေါက်သွားပါလိမ့်မယ်။
"စိတ်ရှည်ခြင်း"
ကလေးပုံရိုက်တဲ့အခါ စိတ်ရှည်ရှည်ထားနိုင်ဖို့လိုပါတယ်။ ကလေးဆိုတာ စိတ်ထဲရှိတဲ့အတိုင်း နေတတ်တာဖြစ်တဲ့အတွက် ဓါတ်ပုံရိုက်နေရင်းလည်း ထငိုရင် ငိုနေမှာပါ။ ဓါတ်ပုံရိုက်တော့မှ ဟိုဘက်လှည့်သွားတာ၊ လှုပ်သွားတာမျိုးလည်း ကြုံရတတ်တဲ့အတွက် ကလေးပုံရိုက်ရင် လိုချင်တာက ပုံအနည်းငယ်ဆိုပေမယ့် တကယ်ရိုက်ရတာက ပုံငါးဆယ်လောက် ဖြစ်ရင် ဖြစ်သွားတတ်ပါတယ်။ ကလေးပုံရိုက်ရင် စိတ်ရှည်ရှည်ထားနိုင်မှ အဆင်ပြေပါတယ်။
"ဘေးကင်းလုံခြုံခြင်း"
ဓါတ်ပုံရိုက်တဲ့အခါ ပုံကောင်းတစ်ခုရဖို့လည်း အရေးကြီးသလို ဘေဘီလေးတွေအတွက် အန္တရာယ်ကင်းလုံခြုံမှုရှိဖို့လည်း အရေးကြီးပါတယ်။ ဘေဘီလေးတွေအတွက် သုံးရတဲ့ပစ္စည်းတွေကအစ ပိုးကင်းစင်ပြီး သန့်ရှင်းနေရပါမယ်။ လှုပ်ရှားသွားလာနိုင်ပြီဖြစ်တဲ့ ဘေဘီလေးတွေဆို လျှောက်သွားရင်း မတော်တဆထိခိုက်မိတာမျိုး မရှိအောင် အမြဲတစေ ဂရုစိုက်ကြည့်နေပေးရပါတယ်။
"အထာသိခြင်း"
ဘေဘီလေးတွေရဲ့ အသက်အရွယ်ကိုလိုက်ပြီး ရိုက်ပေးရတဲ့ ပုံအမျိုးအစားလေးတွေလည်း ရှိပါတယ်။ မွေးကင်းစ နှစ်ပတ်အရွယ်လေးကို ရိုက်ပေးရတာနဲ့ ရက်တစ်ရာအရွယ်လေးကို ရိုက်ပေးရတာနဲ့ အနေအထားချင်း မတူပါဘူး။ မွေးကင်းစအရွယ်လေးဆိုတာ အရိုးအဆစ်လေးတွေက ပျော့ပြောင်းနေသေးတဲ့အတွက် အမိဝမ်းထဲက ထွက်ခါစပုံမျိုး ကိုယ်နေဟန်ထားကွေးကွေးလေးတွေနဲ့ ရိုက်ပေးလို့ရပါတယ်။ အနှီးစလေးတွေနဲ့ ထုပ်ပြီး ရိုက်ပေးရတာလည်း မွေးကင်းစအရွယ်လေးတွေပါပဲ။ သုံးလ ဒါမှမဟုတ် ရက်တစ်ရာဘေဘီလေးတွေကျတော့ အရိုးအဆစ်လေးတွေ ပြောင်းလဲလာတဲ့အတွက် မွေးကင်းစ ရိုက်ပေးရတဲ့ ကိုယ်နေဟန်ထားမျိုး ရဖို့ အဆင်မပြေတော့ပါဘူး။ ဒီအကြောင်းလေးတွေကို သိထားပါမှ ဘယ်အရွယ်လေးတွေဆို ဘယ်လိုပုံမျိုးလေးက ပိုသင့်တော်လဲဆိုတာ စဥ်းစားချင့်ချိန်ပြီး အဆင်ပြေပြေ ရိုက်နိုင်မှာဖြစ်ပါတယ်။
"ကိုယ်ပိုင် Idea နဲ့ ဆက်တင်တစ်ခု ဖန်တီးခြင်း"
Baby photo ရိုက်တဲ့အခါ ဟိုးအရင်ကလို အိပ်ယာပေါ်ပက်လက်ထားရိုက်တာမျိုး မဟုတ်တော့ပါဘူး။ ဘေဘီလေးတွေအတွက် သီးသန့်ထုတ်ထားတဲ့ ပစ္စည်းလေးတွေ၊ ထိုင်ခုံလေးတွေ၊ နောက်ခံ background လေးတွေနဲ့ ကျကျနနလေး ဆင်ရိုက်ပေးတာမျိုးလေးဖြစ်သွားပါပြီ။
"Child Psychology ကို နားလည်ထားခြင်း"
ကလေးလေးတွေရဲ့ အသက်အရွယ်အလိုက် ပြုမူလှုပ်ရှားပုံတွေ၊ ပတ်ဝန်းကျင်ဆီက လေ့လာမှတ်သားပြီး တုံ့ပြန်ပုံတွေ နားလည်ထားရပါမယ်။ မွေးကင်းစလေးကို ချော့မြူပုံနဲ့ သုံးလအရွယ်လေးကို ချော့မြူပုံတောင် မတူပါဘူး။ ဒီသဘောတရားလေးတွေကို နားလည်သဘောပေါက်ထားရတာလည်း Baby photography အတွက် အထောက်အကူဖြစ်ပါတယ်။
"Mindset"
ဘေဘီလေးတွေကို ဓါတ်ပုံရိုက်တော့မယ်ဆိုရင် ဘေဘီလေးတွေကို ချစ်တတ်တဲ့စိတ်လေးလည်း ရှိရပါမယ်။ ကလေးတွေမှာလည်း အာရုံသိစိတ်ရှိတဲ့အတွက် ကိုယ်က မေတ္တာပေးနေမှန်း ဘေဘီလေးတွေက ခံစားလို့ရပါတယ်။
ဒါကတော့ Baby Photography နဲ့ ပတ်သက်ပြီး လူတိုင်း သေချာမသိသေးတာလေးတွေပါ။ နောက်ထပ်လည်း ဘယ်အရွယ်ဆို ဓါတ်ပုံရိုက်လို့ရပြီလဲ၊ ဘယ်အရွယ်ဆို ဘယ်လိုပုံမျိုးလေးမှ ပိုအဆင်ပြေသလဲ၊ ဓါတ်ပုံမရိုက်ခင် ဘေဘီလေးတွေရဲ့ ဖေဖေမေမေတို့နဲ့ ဘယ်လိုလေးတွေ ဆွေးနွေးတိုင်ပင်ရမလဲဆိုတာလေးတွေပါ သီးသန့် ထပ်ပြောပြဦးမှာဖြစ်လို့ ဆက်ဆက် စောင့်မျှော်ပေးကြပါဦးနော်။
