13/08/2025
" بسم الله الرحمن الرحيم "
السلام عليكم ورحمة الله وبركاته،
- تحية تقدير واحترام لأهلي في مدينة العجيلات، مدينة الأصالة والمواقف المشرفة.
- أهلي في المدينة …
انا اليوم مش جاي نبارك، ولا باش نلمّع صور، ولا باش نرفع شعارات.
أنا جاي نحكي كلمة حق… كلمة من واحد شاف السياسة على أصولها، وعارف كيف الدولة تُبنى، وكيف تُسرق.
شفت قوائم الترشيحات في مدينتي، وشفت وجوه نعرفها قبل الانتخابات… منهم النظيف ربي معاه وحني معاه ان شاءالله ، ومنهم اللي داخل وكأنه جاي على مائدة عامرة، ناوي يقسمها قبل ما توصل للشعب.
⸻
أقولها واضحة:
يوم تكتمل الانتخابات، ويجلس الشخص المناسب على كرسي البلدية، أنا أول من سيطلب منه أن يجلس معي أمام الكاميرا، في بودكاست علني، يواجه 10 أسئلة أمام اهله والشعب… لا لفّ، لا دوران، ولا شعارات فارغة.
إن وافق ونجح في اضهار مايملك من خبرة وعلاقات يستفيذ منها المواطن والمنطقة، سأضع له خطة استراتيجية إعلامية لمدة ستة أشهر، تشجيعاً مني، تجعله يثبت لليبيا أن العجيلات قادرة أن تقف على قدميها.
⸻
أما باقي “المترشحين” اللي جايين للبلدية وكأنها لعبة أو خزنة مفتوحة…
اللي ما يعرفوش حتى يكتبوا بيان، لكن يعرفوا يقسموا الكعكة قبل ما توصل الطاولة…
هذوما مكانهم مش الكرسي، مكانهم الحوش او مزرعة يتفرجوا من خلال هواتفهم .
⸻
من يسرق من قوت الناس، ويعبث بثقة أهل العجيلات، لن يختبئ خلف لافتة ولا وراء مكتب.
التاريخ لا يرحم… والناس فاقت. واللي يحسب السياسة لعبة، حيعرف قريب إن الميدان ما يرحمش الصغار والجهلة.
تحياتي .
#ليبيا
#العجيلات
#فـرعـون
