07/08/2026
أنا أمس كنت مفروض نحكي على العرس...
ع العروس... ع الفستان...
ع الفرح...
العرس جميل جداً كان، وعندي حجز vip , ومن الصبح وأنا نصور...
بدون مبالغه مفيش دقيقة وحده بريك.
حتى غدا ما تغديتش😅✌️
ف خذيت عشر دقايق قبل ما يخش العريس قلت نشرب ونرد..
طلعت ل الإنتظار وأول ما جلست...
شفت بنوتة مراهقه يمكن 16،17 سنه قاعدة بروحها على الكنبة، متكية على المسند، وحاطة يدها الأخرى على وذنها
قلت يمكن تعبانة... مريضه
أو تستنى ف حد..
جلست ع كرسي بعيد عنها، نشوفلها لاحظت
البنت كلما ينفتح باب القاعه، أتسكر على وذانها بقوة، وأول ما يسكر الباب، تهدى شوي وترخي يدها ل على وذنها
صبيت قربت منها...
وفجأءه أنفتح الباب الرئيسي للقاعة وتمى صوت الطلق والألعاب النارية قالب صالة الإنتظار، والمشرفة تبحت فيا وتقول:
"العريس يبي يخش"
ويجيبني صوت عياط البنت
تمت تعيط بكل قوتها، وتسكر في وذانها بتخبيط بيديها الإثنين، وتلف ف عيونها في المكان كله، وترتعش.
والله العظيم... المشهد هذا ما طلعش من بالي بكل 💔
طول طلبت من المشرفة تسكر الباب وقلت: "مزال... أخروه شوي أو خششيه غرفة الإنتظار"
ما كانش يهمني العريس ولا الزفة لحظتها...
كان كل همي إن الباب يسكر، لأن البنت كانت في حالة رعب بمعنى الكلمه💔
قربت منها، حاولت نهديها، لكن كانت خايفه حتى نلمسها..🥹
قربت منها بالقوه ومسكت يدها بهدوء، وخليتها تجلس على الكنبة، وقعدت نمشي بإيدي على ظهرها بدون كلام..
بعد شوية بدأت تهدى...
وبدأت تثق فيا🥹❤️
ومن تصرفاتها عرفت إنها على الأغلب عندها إضطراب طيف التوحد
في اللحظة هذي نسيت تعبي...
وهانن عليا كل مشاكلي ل عانيت منهن اليوم
مفيش ف عقلي إلا بنت مراهقه 17،16 سنه، جميلة جداً..
عيونها عسلية فاتحة، وشعرها طويل وجميل...
لكن جواها كان فيه خوف أكبر من عمرها💔
قعدت معاها وما تحركتش ومستمره نحرك ف يدي على ظهرها وساكته..
بعد حوالي عشر دقايق خشت وحدة تضحك ومعاها وحدة أخرى وقالت للبنت:
"ها يا عمري... تعشيتي؟ جابولك عشاء؟"
وبعدين سألت المضيفة:
"جابولها عشاء؟"
أنا سكت...
قلت يمكن أختها
سألتها بيش تقربلك قالت:
"بنتي"
بغض النظر عن حرارتي ل رقت ألف
وكيف جايه تضحكي وبنتك برا بروحها كانت تنهار..💔 سألتها بهدوء:
"بنتك تعاني من الأصوات والزحمة؟"
قالتلي: "أها هذا حالها"
قتلها: عندها توحد، أنتي أكيد عارفه أنها تبي معامله خاصه ومكانات خاصه"
قالت لي:"والله ما عرفت وين نسيبها... كل هلي وأهل زوجي حاضرين"
وقتها فهمت إن المشكلة مش قلة حب...
المشكلة جهل وقلة معرفة💔
سألتها: "باهي عندها سماعات كاتمة للصوت؟"
قالت:
"صح في حاجه هكي؟ والله ما نعرف وين يبيعوا فيهن"
عطيتها اسم مؤسسة متخصصة في التوحد، وقلت لها إن عندهم مختصين يساعدوها ويوجهوها، وحكيتلها ع الموضوع بتوسع لأن حضرت ندوه توعويه للمركز وعندي ف أقاربي حالات توحد أطفال.
لكن بعدها قالت جملة وجعتني جداً:
"بوها مش مقتنع بالحاجات هذين"
سكت...💔💔💔💔
لأن مرات الصدمة تسكت الإنسان وتخليه عاجز عن الرد
شن يعني "الحاجات هذين"؟
العلاج؟
التأهيل؟
فهم حالة بنتك؟
هذين مش حاجات...!!!!!!!!
هذي حياة إنسان💔
أنا ما نبيش حد يهاجم الأم أو الأب🙏🥲
يمكن هم ما يعرفوش الأضرار التابعه لتصرفاتهم
ويمكن محدش وعاهم على الكارثه ل يديروا فيها ف حق البنت..
والجهل يتعالج بالعلم، مش بالإهانة..
ف لطفاً محد يهاجم الأب والأم.
وتذكرت كلام المختصين ف المؤسسة...
قالوا إن أكبر كارثة مش التوحد نفسه... أكبر كارثة يواجهوا فيها هي جهل الأهل بأعراض التوحد
الجهل بعلاماته...
الجهل بطريقة التعامل معه...
والخوف من كلام الناس وإعتباره وصمة عار أو عيب.
لأنك هنا ما تضرش ف نفسك وبس...
أنت ممكن تضيع في سنوات ثمينة من حياة إنسان كامل بسبب إنكار أو خوف من نظرة مجتمع أو قلة وعي.
وأكدوا إن توعية وتثقيف الأهل من أهم خطوات التعامل مع التوحد، وإن التدخل المبكر يساعد على تطوير المهارات، وتحسين السلوكيات، وزيادة قدرة الشخص على التواصل والاندماج في المجتمع حسب حالته.
لهذا...
إذا قريت منشوري أو سمعت عن التوحد...
ما تخليش المعلومة توقف عندك..🥹🙏🙏
أحكوا لأهلكم... لأصحابكم... لكل أب وأم تعرفوهم...
ولكل شخص مقبل على الزواج..🙏
يمكن كلمة منك تكون سبب، بعد فضل الله، في تغيير حياة طفل🥹❤️
وأقسم بالله...
أنا ما روحتش للحوش وأنا نتذكر العروس ولا الفستان ولا الزفة...
روحت وأنا نذكر ف بنت كانت قاعدة برا بروحها...
في عز الفرح... ناس كلها تضحك وتلعب
وهي قاعده تعيش أصعب لحظات يومها..💔
وكل اللي كانت تحتاجه... مش شيء كبير
كانت بس تحتاج شخص يفهم وضعها ويطمنها..
قال رسول الله (ص):
"كلكم راعٍ وكلكم مسؤول عن رعيته."
ربي إستأمنكم على أطفالكم...
فكونوا قد الأمانة🙏
أنشروا الوعي...❤️
يمكن منشور واحد يكون سبب في إنقاذ إنسان من سنوات من المعاناة🥹
اللهم بلغت، اللهم فأشهد☝️
#توحد #علاج #طفل #فرح
