22/05/2022
ບໍລິສັດລ້ານຊ້າງມີເນໂຣນສ໌ ລິມິເຕັດ ເປີດນໍາໃຊ້ອຸມົງເພື່ອເຈາະສໍາຫຼວດແຮ່ໃຕ້ດິນ ທີ່ທັນສະໄໝ ຢູ່ທີ່ໂຄງການຂຸດຄົ້ນຄໍາ-ທອງເຊໂປນ.
------------000------------
ພິທີເປີດນໍາໃຊ້ອຸມົງສໍາຫຼວດແຮ່ໃຕ້ດິນ ຢູ່ທີ່ບໍ່ຄໍາ-ທອງເຊໂປນ ຂອງບໍລິສັດລ້ານຊ້າງ ມີເນໂຣນສ໌ ລິມິເຕັດ ແມ່ນໄດ້ຈັດຂຶ້ນຢ່າງເປັນທາງການ ໃນຄັ້ງວັນທີ 16 ພຶດສະພາ 2022 ຜ່ານມານີ້ ໂດຍການເປັນກຽດເຂົ້າຮ່ວມໃນພິທີຂອງທ່ານ ທອງພັດ ອິນທະວົງ ຮອງລັດຖະມົນຕີີ ກະຊວງພະລັງງານ ແລະ ບໍ່ແຮ່, ທ່ານນາງ ທິບພະກອນ ຈັນທະວົງສາ ຮອງລັດຖະມົນຕີ ປະຈໍາສໍານັກງານນາຍົກລັດຖະມົນຕີ, ທ່ານ ວຽງທະວີສອນ ເທບພະຈັນ ຮອງເຈົ້າແຂວງສະຫວັນນະເຂດ, ທ່ານ ຝູ ເຊຍເຊິນ ປະທານບໍລິສັດລ້ານຊ້າງ ມີເນໂຣນລິມິເຕັດ, ທ່ານ ສະໝານ ອາເນກາ ຜູ້ອໍານວຍການໃຫຍ່, ທ່ານ ພໍ ແຮຣິສ໌ ຜູ້ຈັດການໃຫຍ່ ບໍລິສັດລ້ານຊ້າງ ມີເນໂຣນສ໌ ລິມິເຕັດ, ໂດຍມີການນໍາຂອງເມືອງວິລະບູລີ, ຫົວໜ້າກົມຮອງກົມ, ພະແນກການຂອງແຂວງ, ຂອງເມືອງ ແລະ ບໍລິສັດລ້ານຊ້າງມີເນໂຣນສ໌ ລິມິເຕັດ ໄດ້ເຂົ້າຮ່ວມຢ່າງພ້ອມພຽງ. ກ່ອນຈະກ້າວເຂົ້າສູ່ພິທີການເປີດນໍາໃຊ້ອຸໂມງຢ່າງເປັນທາງການນັ້ນ ທາງການນໍາຂັ້ນສູງຂອງສູນກາງ, ຂອງແຂວງ ແລະ ເມືອງພ້ອມແຂກທີ່ຖືກເຊີນ ກໍ່ໄດ້ຮັບຟັງການລາຍງານໃຫ້ຮູ້ໂດຍຫຍໍ້ກ່ຽວກັບແຜນດໍາເນີນງານໃນຜ່ານມາ, ປະຈຸບັນ ແລະ ໃນອະນາຄົດ ຂອງບໍ່ຄໍາ-ທອງເຊໂປນ ຈາກທ່ານ ພໍ ແຮຣິສ໌ ຜູ້ຈັດການໃຫຍ່ຂອງບໍລິສັດລ້ານຊ້າງມີເນໂຣນ ລິມິເຕັດ, ຈາກນັ້ນກໍ່ໄດ້ເຂົ້າສູ່ພິທີເປີດນໍາໃຊ້ອຸມົງຢ່າງເປັນທາງການ; ໃນໂອກາດທີ່ມີຄວາມໝາຍສໍາຄັນນີ້ ທ່ານ ພໍ ແຮຣິສ໌ ກໍ່ໄດ້ມີຄໍາເຫັນກ່າວເປີດພິທີຢ່າງເປັນທາງການວ່າ : ໃນມື້ນີ້, ພວກເຮົາຈະເປັນສັກຂີພິຍານ ພິທີເປີດ ທາງເຂົ້າອຸມົງເພື່ອເຈາະສຳຫຼວດຢ່າງເປັນທາງການ. ການສຳຫຼວດຈາກອຸມົງໃຕ້ດິນ ຈະເປັນບາດກ້າວທຳອິດ ໃນການພັດທະນາການຂຸດຄົ້ນແຮ່ໃຕ້ດິນ. ອຸມົງໃຕ້ດິນຈະເຮັດໃຫ້ພວກເຮົາຍັບເຂົາໃກ້ແຫຼ່ງສິນແຮ່ ທີ່ຢູ່ເລິກລົງໄປ ເພື່ອໃຫ້ພວກເຮົາສາມາດສຳຫຼວດເພີ່ມຕື່ມ ແລະ ເຈາະວິເຄາະປະລິມານສະສົມແຮ່ ຊຶ່ງຈະສະໜອງຂໍ້ມູນລະອຽດທີ່ມີຄຸນຄ່າ ເພື່ອໃຊ້ເຂົ້າໃນການປັບປຸງ ແລະ ປະເມີນການອອກແບບ ແລະ ພັດທະນາແຜນການຂຸດຄົ້ນແຮ່ໃຕ້ດິນ; ປະຈຸບັນນີ້ ບໍ່ດີສໂຄເວີຣີດີບສ໌ ແຫ່ງນີ້ ມີປະລິມານແຮ່ສະສົມປະມານ 9,5 ລ້ານໂຕນ ແລະ ຄາດຄະເນການຜະລິດແຮ່ 400,000 ໂຕນໃນໄລຍະເຄິ່ງຫຼັງຂອງປີ 2023 ແລ້ວເພີ່ມຂື້ນເປັນ 1,2 ລ້ານໂຕນ ຕໍ່ປີຫຼັງຈາກນັ້ນ. ບໍ່ໃຕ້ດິນຈະເປັນແຫຼ່ງແຮ່ຫຼັກ ໃນການສະໜອງແຮ່ໃນອະນາຄົດຂອງໂຄງການເຊໂປນ ແລະ ຄາດວ່າຈະຍືດອາຍຸບໍ່ແຮ່ ຂອງບໍ່ຄຳ-ທອງ ເຊໂປນ ໄປອີກຢ່າງໜ້ອຍ 7 ປີ, ຮອດປີ 2030. ການຂຸດຄົ້ນບໍ່ແຮ່ໃຕ້ດິນ ແມ່ນຈະເປັນເສດຖະກິດກວ່າ ສຳລັບແຫຼ່ງສິນແຮ່ທີ່ຢູ່ເລິກລົງໄປ ຊຶ່ງມີຜົນກະທົບຕໍ່ສິ່ງແວດລ້ອມ ແລະ ສັງຄົມ ທີ່ໜ້ອຍກວ່າສົມຄວນ ເມື່ອສົມທຽບໃສ່ການຂຸດຄົ້ນບໍ່ແຮ່ແບບເປີດໜ້າດິນ. ພວກເຮົາຈະນຳໃຊ້ເຕັກນິກທັນສະໄໝໃນການຂຸດຄົ້ນບໍ່ແຮ່ໃຕ້ດິນ ທີ່ມີສດຕະຖານດ້ານຄວາມປອດໄພ ແລະ ການຜະລິດ ທຽບເທົ່າ ບໍ່ແຮ່ໃຕ້ດິນທີ່ທັນສະໄໝໃນປະເທດອົດສະຕຣາລີ ແລະ ຫຼາຍໆບໍ່ແຮ່ໃຫຍ່ໆທີ່ນຳໜ້າໃນໂລກ. ບໍລິສັດ ລຊມລ ຈະຕັ້ງມາດຕະຖານທີ່ສູງສຸດ ໃນຖານະ ບໍລິສັດບໍ່ແຮ່ແບບຢ່າງ ທີ່ຈະພັດທະນາບໍ່ແຮ່ໃຕ້ດິນທັນສະໄໝແຫ່ງທຳອິດ ໃນ ສປປ ລາວ ແລະ ໃນຖານະ ຄູ່ຮ່ວມພັດທະນາທີ່ແໜ້ນແຟ້ນ ໃນການພັດທະນາອຸດສະຫະກຳບໍ່ແຮ່ຂອງ ສປປ ລາວ. ຈາກນັ້ນທ່ານ ທ່ານ ທອງພັດ ອິນທະວົງ ຮອງລັດຖະມົນຕີີ ກະຊວງພະລັງງານ ແລະ ບໍ່ແຮ່ ກໍ່ໄດ້ໃຫ້ກຽດກ່າວມີຄໍາເຫັນຕໍ່ພິທີວ່າ : ໂດຍຜັນຂະຫຍາຍແນວທາງຫັນເປັນອຸດສາຫະກຳ ແລະ ທັນສະໄໝຂອງພັກ ແລະ ຍຸດທະສາດ ການພັດທະນາປະເທດຊາດໃນໄລຍະໃໝ່ ໂດຍສະເພາະແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກເຂົ້າໃນການຫັນເປັນອັນລະອຽດນັ້ນ. ໃນຊຸມປີທີ່ຜ່ານມາ, ກະຊວງພະລັງງານ ແລະ ບໍ່ແຮ່ ໃນຖານະທີ່ເປັນເສນາທິການໃຫ້ລັດຖະບານ ໄດ້ວາງວິໄສທັດ, ຍຸດທະສາດ ແລະ ແຜນພັດທະນາອຸດສາຫະກໍາແຮ່ທາດໂດຍສະເພາະແມ່ນການຂຸດຄົ້ນທ່າແຮງບົ່ມຊ້ອນແຫຼ່ງແຮ່ທຳມະຊາດເພື່ອຜະລິດ ແລະ ສະໜອງຂາຍພາຍໃນແລະຕ່າງປະເທດ ໃຫ້ພຽງພໍກັບຄວາມຕ້ອງການ ໃຫ້ນັບມື້ຫຼາຍຂຶ້ນ, ບົນພື້ນຖານຮັບປະກັນການພັດທະນາ ທີ່ເປັນມິດກັບສິ່ງແວດລ້ອມ, ມີລັກສະນະຍືນຍົງ. ພວກເຮົາມີຄວາມພາກພູມໃຈເປັນຢ່າງຍິ່ງທີ່ເຫັນວ່າ : ຜ່ານການຈັດຕັ້ງປະຕິບັດຕົວຈິງໃນຊຸມປີທີ່ຜ່ານມາ, ການພັດທະນາອຸດສາຫະກຳແຮ່ທາດ ຢູ່ ສປປ ລາວ ສາມາດບັນລຸຜົນສຳເລັດທີ່ມີລັກສະນະພົ້ນເດັ່ນ, ອຸດສາຫະກຳແຮ່ທາດ ໄດ້ປະກອບສ່ວນຢ່າງຕັ້ງໜ້າ ແລະ ກາຍເປັນເປັນພື້ນຖານທີ່ສຳຄັນປະກອບສ່ວນເຂົ້າໃນການພັດທະນາເສດຖະກິດ - ສັງຄົມຂອງຊາດເປັນຕົ້ນແມ່ນການປະກອບສ່ວນເຂົ້າໃນການຫັນເປັນອຸດສາຫະກຳ ແລະ ທັນສະໄໝ, ການຫັນຈາກເສດຖະກິດທຳມະຊາດໄປສູ່ເປັນເສດຖະກິດຜະລິດເປັນສິນຄ້າ, ການຫັນປ່ຽນແບບວິທີການຜະລິດ, ການດຳລົງຊີວິດ ແລະ ການແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງຕັ້ງໜ້າ ໂດຍສະເພາະແມ່ນແກ້ໄຂ 2 ວາລະແຫ່ງຊາດ. ພ້ອມດຽວກັນນີ້, ກໍໄດ້ຮັບການສະໜັບສະໜູນ,ການຮ່ວມມືເພື່ອພັດທະນາຈາກບັນດາປະເທດເພື່ອນມິດ, ອົງການຈັດຕັ້ງສາກົນ ແລະ ນັກລົງທຶນຕ່າງປະເທດເປັນຢ່າງດີ. ໃນອຸມົງເຂົ້າບໍ່ດິສໂຄເວີຣີດີບສ໌ ເພື່ອເຈາະສຳຫຼວດບໍ່ແຮ່ໃຕ້ດິນ ຂອງບໍລິສັດ ລ້ານຊ້າງມີນາໂຣນສ໌ ລີມີເຕັດ ຊຶ່ງແມ່ນໂຄງການ ບໍ່ແຮ່ໃຕ້ດິນທີ່ທັນສະໄໝແຫ່ງທຳອິດໃນ ສປປ ລາວ. ຜົນການສຳຫຼວດ ໄດ້ຊີ້ໃຫ້ເຫັນວ່າ ຢູ່ໃຕ້ດິນບ່ອນນີ້ ແມ່ນມີປະລິມານແຮ່ຄຳເຖິງ 90% ເພື່ອສຳຫຼວດ ທີ່ຈະຍືດອາຍຸບໍ່ແຮ່ ຂອງບໍ່ຄຳ-ທອງ ເຊໂປນ ໄປອີກ 7 ປີ, ຮອດປີ 2030. ການຫັນໄປສູ່ການຂຸດຄົ້ນບໍ່ໃຕ້ດິນຈະ ສ້າງຜົນປະໂຫຍດດ້ານບວກໃຫ້ແກ່ຜູ້ມີສ່ວນຮ່ວມ ແລະ ປະກອບສ່ວນໃນການຫຼຸດຜ່ອນຄວາມທຸກຍາກ ແລະ ການພັດທະນາທີ່ຍືນຍົງໃນຊຸມຊົນເຈົ້າພາບ ແລະ ປະເທດລາວຂອງພວກເຮົາ.
ພາບ-ຂ່າວ : ຫ້ອງການ ຖວທ ເມືອງວິລະບູລີ
