30/10/2026
នៅពេលដែលមនុស្សនិយាយថា ចូរមនុស្សស្រីថែរក្សារាងកាយរបស់ខ្លួនឱ្យនៅបរិសុទ្ធសម្រាប់ស្វាមី ប៉ុន្តែមនុស្សមិនដែលនិយាយថា ចូរមនុស្សប្រុសកុំលួងលោមចាប់រំលោភកូនស្រីគេ ឬកុំនៅជាមួយដៃគូច្រើនដើម្បីរក្សាបរិសុទ្ធសម្រាប់ប្រពន្ធនោះទេ។
នៅមានដែលមនុស្សនិយាយថា ខូចខ្លួនអស់ហើយ មនុស្សស្រីត្រូវមានព្រហ្មចារី ប៉ុន្តែច្បាប់រដ្ឋធម្មនុញ្ញមិនបានចែងថា មិនមានព្រហ្មចារី ត្រូវក្លាយជាទាសករ ឬជាមនុស្សស្រីមិនល្អ ឬក៏សង្គមកំណត់ហៅម្យ៉ាងទៀតថា «សំផឹង»នោះទេ។ ដូច្នោះពួកគេកំពុងចាត់តាំងខ្លួនឯងជាតុលាការកាត់ក្ដី និងជាអ្នកវាយតម្លៃតាមផ្នត់គំនិតជ្រុលនិយមរៀងៗខ្លួន! សូមចាំថា ខ្លួនប្រាណរបស់បុគ្គល «គឺជាសិទ្ធិបុគ្គល» ហើយសេរីភាពរាងកាយរបស់មនុស្ស ពួកគេចង់ស្លៀកពាក់បែបណា ពួកគេចង់ទទួលបានពណ៌សម្បុរអ្វី ចង់រក្សាព្រហ្មចារីឬអត់ជាជម្រើសរបស់ពួកគេដូចគ្នា។
នៅពេលដែលមនុស្សនិយាយថា មនុស្សស្រីខូចខ្លួនខ្លះត្រូវបង្កើតកូនចោល ខ្លះទៀតត្រូវឆ្លងជំងឺកាមរោគឬ អេដស៍ពីដៃគូ «នាំឱ្យប៉ះពាល់សង្គម» ចុះហេតុអ្វីបានជាគេមិននិយាយពីដើមហេតុ ឬអ្នកចម្លង? មិនអប់រំទៅអ្នកចម្លងមិនឱ្យចម្លងគេ? បែរជាមកស្ដីបន្ទោសជនរងគ្រោះ និងប្រាប់ជនងាយរងគ្រោះឱ្យការពារខ្លួន មិនខុសអីពីមិនព្រមចាប់ចោរ មកឃុំឃាំងមនុស្សទេ៕
