23/04/2026
ប្រវត្តិសង្ខេបនៃកម្មវិធីបំបោលក្របី សេះ គោ និងរទេះក្របី-គោ-សេះ របស់អ្នកឃុំបារាយណ៍ ស្រុកស្រីសន្ធរ ខេត្តកំង់ចាម។
====+====
ជាទំនៀមទម្លាប់តាំងពីបុរាណកាលមកតាមចាស់ៗតំណាលតគ្នាពីមួយជំនាន់ទៅមួយជំនាន់ថាពួកគាត់កើតមកឃើញគេបំបោលក្របីចឹងដែរ ដូចនេះកម្មវិធីបំបោលក្របីអាចប្រារព្ធរាប់រយឆ្នាំមកហើយ ខ្លះទៀតថាប្រហែលនៅសម័យព្រះបាទ ពញាយ៉ាត ដែលផ្លាស់រាជធានីពីអង្គរមកទួលបាសានម្ល៉េះ ខ្លះថាមុននេះទៅទៀត តាមសក្ខីភាពខាងលើ និងការអនុត្តន៍ជាក់ស្តែងតាមប្រពៃណីបំបោលក្របីតៗគ្នាពីមួយជំនាន់ទៅមួយជំនាន់ ប្រជាកសិករនៅឃុំបារាយណ៍ ស្រុកស្រីសន្ធរ ខេត្តកំពង់ចាម តែងប្រារព្ធកម្មវិធីបំបោលក្របី សេះ គោ ជ្រូក និងរទេះក្របី-សេះ ក្នុង គោលបំណង ១-ដើម្បីប្រមូលផ្តុំជួបជុំក្របីគ្រប់ផ្ទះជាលក្ខណៈសាមគ្គីភាពនិងអបអរឆ្នាំថ្មីថ្ងៃវារះឡើងស័ក(ផ្លាស់ពីស័កឆ្នាំចាស់មកស័កឆ្នាំថ្មី) ថ្ងៃចូលឆ្នាំទី៣
២-ថ្វាយដល់ទសបារមីព្រះអង្គព្រះជីវ៍ធំ ដើម្បីឱ្យព្រះអង្គថែរក្សាមុនពេលរដូវធ្វើស្រែចូលមកដល់
៣-កាលពីបុរាណ ក្រោយពីចូលឆ្នាំរួច ប្រជាកសិករត្រូវចាប់ផ្តើមធ្វើស្រែចម្ការ ដោយប្រើក្របីសម្រាប់ភ្ជួររាស់ទាំងស្រុង ម្លោះហើយទើបប្រជាកសិករអ្នកបារាយណ៍បានយកក្របីមកបំបោលថ្វាយទសបារមីព្រះអង្គព្រះជីវ៍ធំដើម្បីសុំសេចក្តីសុខ។
៤-ក្រោយរំដោះថ្ងៃ៧មករាឆ្នាំ១៩៧៩ ព្រះចៅអធិការ ព្រះនាម តៃ បានជម្រុញលើកទឹកចិត្តប្រជាកសិកឱ្យប្រារព្ធកម្មវិធីនេះឡើងវិញបានយ៉ាងអធិកអធម រហូតមកទល់បច្ចុប្បន្ននេះ។
៥-ក្រោមម្លប់សន្តិភាព និងអរគុណសន្តិភាព មានសន្តិភាពទើបមានអ្វីៗគ្រប់យ៉ាង រួមទាំងកម្មវិធីបំបោលក្របី នៅមុខវត្តបារាយណ៍ ឃុំបារាយណ៍ ស្រុកស្រីសន្ធរ ខេត្តកំពង់ចាម ។ ដោយមានការចូលរួមពីអាជ្ញាធរគ្រប់ជាន់ថ្នាក់ និងមហាជនចូលរួមយ៉ាងច្រើនកុះករជារៀងរាល់ឆ្នាំ (ស្រាវជ្រាវដោយ៖ លោកគ្រូ យឺន ឃុនយ៉ាន)
————————————
-រូបថត៖ Cameraman វត្តបារាយណ៍
-កែរូប៖ លោកចន្ទ វីរៈបុត្រ
-ផ្សាយដោយ៖ ពូរៀនថត
