07/05/2026
ڕۆژێک باڵندەیەک بە باڵێکی شکاوەوە دەچێتە لای حەزرەتی سولەیمان (کە وەک دەزانرێت زمانی هەموو گیانەوەرانی زانیوە) و سکاڵا دەکات. باڵندەکە دەڵێت: «ئەی پێغەمبەری خودا، دەروێشێک بێ هیچ هۆکارێک بە بەردێک باڵی شکاندم.»
حەزرەتی سولەیمان فەرمان دەکات دەروێشەکە بانگ بکەن. کاتێک دەروێشەکە دێت، حەزرەتی سولەیمان لێی دەپرسێت: «بۆچی باڵی ئەم باڵندە بێزمانەت شکاندووە؟»
دەروێشەکە دەڵێت: «ئەی پاشا، من ویستم ڕاوی بکەم، بەڵام ئەو نەکەوتە داوەکەمەوە. ئەگەر ڕایبکردایە هیچی لێ نەدەهات، بەڵام ئەو زۆر بێباک وەستابوو، منیش بەردێکم تێگرت و باڵی شکا.»
حەزرەتی سولەیمان ڕوو دەکاتە باڵندەکە و دەڵێت: «دەروێشەکە ڕاست دەکات، تۆ بۆچی ڕات نەکرد؟»
باڵندەکە وەڵامێکی زۆر قووڵ دەداتەوە و دەڵێت:
«ئەی پێغەمبەر، من کە بینیم ئەو کەسە جلی دەروێشی لەبەرە و سیمایەکی ئایینی هەیە، دڵنیا بووم کە ئازاری من نادات. وتم ئەمە پیاوی خودایە و نایەوێت خوێن بڕێژێت، بۆیە نەترسام و ڕام نەکرد. ئەگەر ئەو کەسە جلی ڕاوچی لەبەر بوایە، بێگومان زوو دەفڕیم و خۆم دەپاراست، بەڵام من فریووی سیمای ئەو دەروێشەم خوارد.»
حەزرەتی سولەیمان بڕیاری دا کە دەستی دەروێشەکە بشکێنرێت وەک تۆڵەیەک (قیساس). بەڵام باڵندەکە داوایەکی سەیر دەکات و دەڵێت:
«نا، دەستی مەشکێنە، چونکە ئەگەر دەستی بشکێنی و چاک ببێتەوە، دیسان هەر دەروێشە. بەڵکو جلی دەروێشی لەبەر داکەنە و ڕێگەی مەدەن ئەو جلانە بپۆشێت. چونکە خەڵکی تر و باڵندەی تریش بە بینینی ئەو جلانە هەڵدەخەڵەتێن و وادەزانن ئەو کەسە پارێزراوە، لە کاتێکدا لە ناوەوە وانییە.»
