06/06/2026
ചമ്പക്കുളം: ചമ്പക്കുളം മൂലം ജലോത്സവം 2026 ഭാഗ്യചിഹ്നം തിരഞ്ഞെടുത്തു
നിർമ്മിത ബുദ്ധിയുടെ (AI) കാലഘട്ടത്തിൽ, ഒരു ഒൻപതാം ക്ലാസുകാരൻ കൈകൊണ്ട് വരച്ച ചിത്രമാണ് ചമ്പക്കുളം മൂലം ജലോത്സവം 2026-ന്റെ ഭാഗ്യചിഹ്നമായി തിരഞ്ഞെടുക്കപ്പെട്ടത്.
മൂലം ജലോത്സവം പബ്ലിസിറ്റി കമ്മിറ്റിയുടെ നേതൃത്വത്തിലാണ് തിരഞ്ഞെടുപ്പ് നടത്തിയത്.
എടത്വ പച്ച സ്വദേശിയായ ഇഷാൻ എം. ജോസഫ് പടിഞ്ഞാറേകാട്ടുങ്കൽ വരച്ച ചിത്രമാണ് ഭാഗ്യചിഹ്നമായി തിരഞ്ഞെടുക്കപ്പെട്ടത്. ലൂർദ് മാതാ ഹൈസ്കൂൾ, പച്ചയിലെ ഒമ്പതാം ക്ലാസ് വിദ്യാർത്ഥിയാണ് ഇഷാൻ.
കുട്ടനാടിന്റെ ജലകായിക സംസ്കാരത്തെയും ചമ്പക്കുളം മൂലം ജലോത്സവത്തിന്റെ പൈതൃകത്തെയും പ്രതിനിധീകരിക്കുന്ന തരത്തിൽ "കൊതുമ്പ് വള്ളം തുഴയുന്ന പരുന്ത്" ആണ് ഭാഗ്യചിഹ്നമായി തിരഞ്ഞെടുക്കപ്പെട്ടിരിക്കുന്നത്. AI സാങ്കേതികവിദ്യ അതിവേഗം വളരുന്ന ഈ കാലഘട്ടത്തിൽ, ഒരു വിദ്യാർത്ഥിയുടെ കരവിരുതിൽ വിരിഞ്ഞ ഈ സൃഷ്ടി തിരഞ്ഞെടുക്കപ്പെട്ടത് അദ്ദേഹത്തിന്റെ കലാപ്രതിഭയ്ക്ക് ലഭിച്ച വലിയ അംഗീകാരമാണ്.
ലോഗോ തിരഞ്ഞെടുപ്പ് പ്രഖ്യാപന ചടങ്ങിൽ ചമ്പക്കുളം ഗ്രാമപഞ്ചായത്ത് പ്രസിഡന്റും മൂലം ജലോത്സവ കൺവീനറുമായ ശ്രീ. കെ. എം. മാത്യു കൂലിപ്പുരയ്ക്കൽ, റേസ് കമ്മിറ്റി ചെയർമാൻ ശ്രീ. ജോസ് കാവനാടൻ, പബ്ലിസിറ്റി കമ്മിറ്റി ചെയർമാൻ ശ്രീ. ഗോകുൽ ഷാജി, പബ്ലിസിറ്റി കമ്മിറ്റി കൺവീനർ ശ്രീ. ഉല്ലാസ് ബാലകൃഷ്ണൻ, ഡെപ്യൂട്ടി തഹസിൽദാർ ശ്രീ. മനോജ് എന്നിവരെ കൂടാതെ മറ്റ് പബ്ലിസിറ്റി കമ്മിറ്റി അംഗങ്ങളും പങ്കെടുത്തു.
ഇഷാൻ എം. ജോസഫിന് ഹൃദയം നിറഞ്ഞ അഭിനന്ദനങ്ങൾ.
