03/09/2026
【放低門派 ・重新為攝影走埋一齊】
近年香港攝影生態改變咗好多。社交媒體同演算法令攝影討論愈來愈集中喺器材規格、品牌立場同 KOL 評測之上。開箱、新機測試、品牌比較，往往比作品本身更容易得到關注；而唔同品牌、創作者同粉絲之間，亦慢慢形成各自陣營，令攝影圈出現「門派化」現象。
作為攝影人，我對呢種情況感到可惜。攝影本來應該係關於光影、構圖、故事、觀察同情感，而唔應該只係變成品牌優劣、器材高低，甚至網絡上嘅互相攻擊。器材當然重要，但始終只係工具；真正打動人嘅，係攝影人如何用鏡頭去觀看世界、表達自己。
所以，我好期待 Canon PhotoMarathon Hong Kong 佳能攝影馬拉松香港站嘅回歸。呢個活動自 2009 年開始舉辦，對上一次已經係 2018 年第十屆比賽，多年來吸引逾萬名參加者，係香港最具歷史嘅大型攝影活動之一。今次一日限定賽事將於 2026 年 11 月 8 日 喺 馬灣1868 舉行，參加者需要根據即日公佈嘅主題，在限時內創作並提交作品，由出題、拍攝、評審到頒獎均於同日完成，極具挑戰。
對我而言，佳能攝影馬拉松亦有特別意義。我曾於 2014 年及 2015 年擔任分享嘉賓，亦曾於 2017 年擔任評判；今年再次有幸擔任評判，希望可以將自己對攝影嘅一點看法，帶俾更多參加者。
我真心希望大家可以趁住呢次活動，放低品牌門派、放低器材比較，重新為攝影本身走埋一齊。攝影唔應該令人分化，而應該令人交流、分享同互相啟發。希望大家用作品說話，搵返最初拎起相機嗰份熱情。
#佳能攝影馬拉松2026香港站 #攝影馬拉松
#點解我後生可以咁肥嘅🤣
