28/09/2026
በጉራጌ ዞን አገና ከተማ በመንግስትና በባለሀብት ትብብር ከ60 ሚሊየን ብር በላይ ወጪ በማድረግ እጅግ ዘመናዊ የገበያ ስፍራ ለመገባት የመሰረት ድንጋይ ተቀመጠ።
የጉራጌ ዞን ዋና አስተዳዳሪ ክቡር አቶ ላጫ ጋሩማ የመሰረት ድንጋዩን ባኖሩበት ወቅት እንዳሉት ተወላጅ ባለሀብቶቻችን የተወለዱበት አካባቢን በማልማት እያሳዩት ያለው ቁርጠኝነት እጅግ በጣም የሚበረታታና የሚያስመሰግናቸው ነው።
በዞኑ በሁሉም አካባቢዎች ከባለሀብቶችና ከአጋር አካላት ጋር በመቀናጀት የጉራጌ እናቶችን የሚመጥኑ ገበያዎችን ለመገንባት በቁርጠኝነት እየሰራን እንገኛለን ብለዋል።
የቲናው አበባ እርሻ ልማት መስራችና ባለቤት አቶ ተስፋዬ ገብረህይወት በዞኑ ኢንቨስትመንት ብዙም ባልተስፋፋበት ወቅት ወደ ዞኑ በመምጣት በአበባ እርሻ ልማት በመሰማራት ለብዙ ዜጎች የስራ እድል ከመፍጠርም ባሻገር ህብረተሰቡ በተለያዩ ልማታዊ ስራዎች እያገዙ መሆናቸውን በመግለፅ ዛሬም ከባልደረባቸው ሸነን አጅየት አብነት ቴኒ ጋር በመሆን በአገና ከተማ የጉራጌ እናቶችን የሚመጥን ገበያ ለመገንባት በመወሰናቸው አመስግነዋል።
ሸነን አጅየት አብነት ቴኒ የጉራጌ እናቶችን ስቃይ የኔም ስቃይ ነው በማለት የጉራጌ እናቶች ሲሸጡም ሆነ ሲሸምቱ ጭቃ፣አቧራ፣ፀሃይም ሆነ ዝናብ ሊያሳቃያቸው አይገባም በማለት ከወንድማቸው ተስፋዬ ጋር በመሆን ይሄንን ሞዴል ስራ ለመስራት በመወሰናቸው በእናቶች ስም ምስጋና ይገባቸዋል ብለዋል።
የጉራጌ እናት የኢትዮጵያ እናት ናት ያሉት ክቡር አስተዳዳሪው ለእኛ የሚገባንን ሰጥታን የሚገባትን ያልሰጠናት ናት በማለት በቁጭት ተናግረዋል።
ዛሬ የእናቶቻችን ስቃይን የሚቀንስና ክብራቸውን የሚመልስ ተግባር ለመስራት በተነሳሳችሁ ባለሀብቶች ኮርተንባችኋል በማለት ሌሎችም ባለሀብቶቻችን በትውልድ አካባቢያቸው ተመሳሳይ ስራዎችን እንዲሰሩ በእናቶች ስም ጥሪ አቅርበዋል።
የአገና ከተማ ከንቲባ አቶ ሀብቴ ዘርጋ በበኩላቸው የዞኑ ዋና አስተዳዳሪ የጉራጌ እናቶችን የሚመጥኑ ገበያዎች በሁሉም አካባቢዎች እንዲሰሩ ባስቀመጡት አቅጣጫ መሰረት በከተማችን እውን እንዲሆን ለጀመሩ ባለሀብቶች አመስግነዋል።
የአገና ገበያ ታዋቂና የብዙ እድሜ ባለፀጋ ቢሆንም በሚፈለገው መጠን ባለመልማቱ እናቶች ሲቸገሩ እንደነበርም አውስተዋል።
ባለሀብቶቹ አቶ ተስፋዬ ገብረህይወትና ሸነን አጅየት አብነት ቴኒ በበኩላቸው በቀጣይ በዞኑ ህዝብን ተጠቃሚ በሚያደርጉ በልማት ስራዎችና በኢንቨስትመንት በስፋት እንደሚሰማሩ በመግለፅ ሌሎችም ባለሀብቶች ህብረተሰቡን ሊያግዙ እንደሚገባ ጠቁመዋል።
