16/08/2026
في حاجة بقت بتحصل في أفراح كتير ومحتاجة وقفة بجد…
ناس بتدخل الفرح تصوّر، والعريس والعروسة وأهلهم ممكن أصلًا ما يعرفوش مين دول ولا تابعين لمين.
المشكلة مش بس في التصوير… المشكلة إن الناس دي ساعات بتاخد Tips أو فلوس من أهل العريس والعروسة، والأهل طبيعي يفتكروا إنهم جزء من فريق التصوير الرسمي وإن الصور دي هتوصل لهم بعد الفرح.
وفي نفس الوقت، وجود مصورين مش تابعين للفريق الأساسي ممكن يعمل لخبطة كبيرة. المصور الرسمي ممكن يشوف إن حد تاني بيصوّر أهل العريس أو أهل العروسة فيفتكر إن الصور دي اتعملت بالفعل، وفي الآخر تكتشف إن صور مهمة جدًا للعيلة ما اتصورتش مع الفريق اللي أنت أصلًا متفق معاه!
والأصعب إن بعد الفرح ممكن محدش يعرف المصور ده مين، ولا الصور راحت فين، ولا إزاي أصلًا تقدر توصل لها.
الموضوع هنا مش منافسة بين مصورين… الموضوع مسؤولية وخصوصية وذكريات يوم مش هيتكرر.
أي حد بيدخل فرح يصوّر لازم يكون معروف هو مين، تابع لمين، ومصرح له من أصحاب الفرح.
فرحك مش مكان مفتوح لأي حد يدخل بكاميرا.
وصور أهلك وذكرياتك أهم من أي Tips.
