http://www.elkhodaryphotography.blogspot.com/

Elkhodary Photography, Giza (2026)

19/12/2020

رسمت على السريع قدام الماتش :)

03/12/2019

نصيحتي عن تجربة شخصية للناس اللي بحبهم دايما عبارة عن كلمة واحدة بالعامية بس في الفصحى هكتبها كلمتين "لا تيأس"!

كتير قوي كان بيني وبين اليأس خطوة، سنتيمتر، وببقى عامل ذي أفلام الأكشن لما يكون الباب بيقفل على البطل علشان يحبسه والحل الوحيد انه يرمي نفسه برا، إما الباب يقفل عليه ويفعصه، أو يعدي ويخرج من القفص، فالبطل يرمي نفسه وهووب يلاقي نفسه برا والباب قفل!

مواقف كتير قوي في الدراسة، في الشغلل، في العلاقات أو حتي في الحاجات البسيطة ذي انك تلحق باص SWVL أو تعمل آخر هجمة في ماتش PlayStation ، بعمل اللي عليا وبغمض وبرمي نفسي وباب التحدي بيقفل بالتدريج علشان يحبسني جوا قفص اني مش هقدر، او مش هنجح، أو مش هكمل أو ألحق، وربنا يكتبلي النجاة وبعَدي!

دايما بتعَدي؟
لا طبعا، ساعات بيفعصني وبيكسر عضمي وبقعد جانب الباب اللي قفل عليا وحبسني وسابني عبارة عن مكعبات ليجو اتفركشت أبكي شوية من الوجع وبعدها أجمع نفسي من تاني.

بس دايما بكتشف اني لما جمعت نفسي كونت إنسان تاني أقوى من الأول وتبدأ رحلة البحث عن باب جديد في الأوضة اللي محبوس فيها وأنا أقوى من الأول.

الفكرة انك متندمش انك حاولت، وماتقولش ياريتني، وابدأ دور من تاني علشان يادوب هتلاقي باب جديد بيقفل ومحتاج ترمي نفسك بسرعة علشان يا إما هتعدي أو هتتكسر من تاني وهكذا.

نصيحتي دايما انك "لا تيأس" مهما كان باين قدامك ان الباب هيقفل، روح وجرب واعمل اللي عليك وسيب الباقي على ربنا وحاول مرة واتنين وتلاتة، لحد آخر لحظة في عمرك.

إخرج برا قفص مخك اللي بيحسبها ويقولك مش هتقدر، وحاول بغض النظر عن عمليات مخك الملعبكة اللي بتحط احتمالات الفشل قبل إحتمالات النجاح. إكسر قفص مخك اللي بيقلل من قدراتك واسعى.

انت أقوي، واللي جاي أحسن وكده..

11/07/2016

أشارك غدا مع مجموعة رائعة من الفنانين بملتقى الفنانين التشكيليين العرب الحادي العاشر بعنوان "مصر في عيون الفنانين" و ذلك في أتيليه القاهرة بميدان طلعت حرب في الفترة من غدا و حتى 28 يوليو 2016 و الدعوة عامة :)