16/07/2025
انا ركبت تمنايه في مدينة السادات مع الراجل المحترم ده والمفروض ان الأجرة الي كل بتوع التمنايه بياخدوها هيا ٧ جنيه وساعات بياخدو ١٠ جنيه بحجة ان مفيش فكه لكن اول ما ركبت مع الراجل ده قال الاجره ٦ جنيه يا جماعه زي ما الحكومة محدده مش ٧ جنيه والي مش معاه اجره ميدفعش خالص لان انا مش عايز ادخل علي عيالي جنيه حرام
الي دار في بالي ساعتها والي جه في دماغي ان الراجل ده ممكن يبقي مش محتاج فلوس او ان العربيه دي بتاعته او انه ممكن يكون شغال شغل تاني غير الشغل ده بس الي اكتشفته بعد ما اتكلمت معاه ان ولا حاجه من دول صح والراجل شغال ع العربيه والعربيه مش بتاعته وبيفضل شغال عليها طول النهار وبياخد فلوس حرفياً قليله جداً متنفعش تصرف علي اسره اليومين دول بس هوه قرر يتقي الله في كل جنيه بيدخل جيبه وقرر يسيب جنيه لله في كل راكب بيركب معاه
وقالي كمان يعني همشي مخالف وأخد زياده عن حقي وأجي علي الناس الغلابة الي ممكن ميكونش معاهم يدفعو اصلاً ولما يجي الظابط يمسكني هيدفعني الفلوس دي غرامه علشان انا ماشي غلط وكمان هخش النار _ لا كده هيبقي كتير عليا وانا ماستحملش نار يا عم علشان جنيه ملوش لازمه في الوقت الي احنا فيه ده
بصراحة انا كنت مبسوط وكنت حاسس بفخر والله وانا بقوله تسمحلي اتصور معاك 🤳📷
وفي النهايه:-أنا مبسوط اني قابلتك واتمني اقابلك تاني واتمني نشوف من أمثلة حضرتك ناس كتير في الشارع 💚🚃
(الراحمون يرحمهم الرحمن الرحيم)
