Ahmed Osama Mysteries Photography

26/12/2024

24/05/2023

22/05/2023

لو قلتلك تصور صورة للقمر كل يوم لمدة شهر ممكن تفكر شوية وتتردد وإحتمال إنك توافق وتحاول ، لكن لو قلتلك صور صورة للقمر كل يوم لكن بفاصل زمنى 50 دقيقة و29 ثانية ولو عدى الفرق ده التجربة كلها هتفشل ولازم تعيد من الأول .ساعتها هتتردد اكتر وتفكر اكتر وفى الاخر هتستبعد الفكرة لأن ده معناه إن حياتك هتتحول خلال الشهر ده لمنبه أو تايمر كل ثانية فيها بتفرق و لو عدت الثانية دى التجربة كلها فشلت وكل مجهودك راح.
ده اللى أنا عملته فى نفسى خلال شهر شوال 1444 هجريا عشان أصور ظاهرة lunar Analemma لأول مرة فى مصر و دى عبارة عن إنى أصور القمر كل يوم من بداية الشهر الهجرى ليوم 26 مع وجود فارق زمنى ما بين صورة كل يوم واليوم اللى بعده بحوالى 50 دقيقة و29 ثانية يعنى مثلا لو صورت القمر النهاردة الساعة 7 مساءا يبقى بكرة لازم أصوره الساعة 7:50:29 مساءا وإلا التجربة هتفشل و لما أجمع كل صور القمر على مدار الشهر العربى هتطلع شكل رقم 8 أو علامة المالانهاية . طيب ليه الصورة بتعمل الشكل ده ؟؟؟ عشان القمر مش بيشرق كل يوم فى نفس التوقيت و بيختلف وقت ظهوره فى السماء و عشان كده هو بيرجع لنفس موقعه فى السماء كل يوم بعد 50 دقيقة و29 ثانية من اليوم اللى قبله. طيب إحنا لو حاولنا نصور القمر بكاميرا ثابتة فى مكان ثابت كل يوم ودمجنا كل صور القمر دى مع بعض هيطلعلنا الشكل ده وبياخد شكل رقم 8 لأن مدار القمر إهليجى و مائل شوية حول الأرض فده بيسبب شكل رقم 8 اللى إحنا شايفينه.
التجربة دى كانت أصعب تجربة تصوير مرت علياه على الإطلاق لأنى قعدت أخر اسبوعين فى التجربة دى مش بنام حرفيا عشان أعرف اصور فى التوقيت المظبوط ، ده بالإضافة إن أخر أيام التجربة كان توقيت التصوير بالنهار مش بالليل فطبعا القمر لم يظهر فى الكاميرا وأنا إستحالة أعرف أشوفه بعينى فجالى فكرة إنى أستعمل جهاز الequatorial mount بتاعى بحيث إنه يوجه الكاميرا للمكان المفروض إنه يبقى فيه القمر وأصوره ورغم كده مكنش بيظهر برده إلا لما أعمل شوية معالجة للصور وعشان كده هتلاقوا بعض صور القمر فى الصورة دى لونها أزرق شوية لأنها متصورة بالنهار.
وأحب أشكر المستشار أحمد عبد المجيد اللى سمح لى أطلع مأذنة مسجد حدائق الجنة عشان أصور صورة الأهرامات دى أنا طلعت على السلم حوالى 50 متر عشان أعرف أصورها 😂
أتمنى تعجبكم وتشيروها فى كل مكان عندكم لأنها تجربة أول مرة يتم تصويرها فى مصر وتعبت فيها جدا جدا على مدار شهر بحاله .

#علومجى

21/10/2022

14/08/2022

10/07/2021

06/01/2021