عين المسافر - صلاح الدين

06/09/2026

ممكن حد يقولي ايه ده ؟

06/09/2026

المتحف المصري الكبير من تصويري ❤️🇪🇬

06/09/2026

عمرك شفت توابيت الملك توت عنخ آمون بالدقة دي؟
الذهب والألوان لسة زي ما هي من آلاف السنين!
اكتبولي في الكومنتات إيه أكتر حاجة بهرتكم في الفيديو؟ :

#مصر #فراعنة

06/09/2026

البوست ده للسوريين المحترمين فقط، اللي عاوزين يفهموا الحكاية بهدوء واحترام.

أما الدواعش، فزي ما اتعودت: بلوك من أول ثانية، ومش هضيع وقتي معاهم.

أنا مصري بقدم محتوى بسيط جدًا: بروح الاماكن الجميله في مصر، أصورها وأنزلها للناس عشان تستمتع بيها وتتعرف على بلدها.

متاحف، أماكن أثرية، مساجد، كنائس قديمة، شوارع ومناطق تاريخية، ومشاريع جديدة بتتعمل في مصر... إلخ.

ولا عمري في حياتي قدمت محتوى عن سوريا، ولا دخلت في مشاكل سوريا، ولا ليا علاقة بالسياسة السورية من الأساس.

ومع ذلك، على مدار سنتين تقريبًا، بتجيلي بشكل مستمر تعليقات ورسائل من بعض السوريين فيها تطرف وتكفير وشتائم لمصر والمصريين.

علي سبيل المثال أنزل فيديو في متحف، ألاقي حد بيقولي:
"دي أصنام، وإنت بتدعو لعبادة الأصنام وفرعون!"

وحد تاني يقولي:
"والله لألعن الديانة الفرعونية."

وانا مش عارف أصلًا إيه هي "الديانة الفرعونية" دي 😅

أنزل خبر عن مشروع كويس بيتعمل في بلدي أو افتتاح مكان جديد، ألاقي شتائم لمصر ورئيس مصر، وكأن الشخص ده عنده مشكلة شخصية مع بلد نص شعبه عايش فيها عشان جيشنا اللي بيشتم فيه يحميه

أنزل فيديو لمسجد سيدنا الحسين في القاهرة، يقولو انت شيعي، وصور داعشية في التعليقات.

أنزل فيديو لكنيسة مصرية قديمة وعريقة، ألاقي:
"يا كافر يا عبد القسيس!" 😅

أنزل فيديو لمسجد الحاكم بأمر الله، ألاقي:
"ربنا يحشرك معاه!"

وفيديوهات كتير جدًا على نفس المنوال.

أنا طول الوقت كنت بعمل حاجة بسيطة:
أمسح التعليق، أعمل بلوك، وأسكت.

لأني ببساطة مش داخل أعمل معركة مع حد.

لكن الموضوع وصل لدرجة إن الرسائل والتهديدات بقت بالمئات أحيانًا، لمجرد إني مصري طبيعي، بحب بلدي، وبقدم محتوى عن تاريخها وحضارتها، ومش ماشي على نفس أفكارهم المتطرفة.

ومن كام يوم، كعادتي، دخلت واحدة بعتتلي نفس النوع من الكلام اللي اتعودت أشوفه: تكفير وتطرف وشتائم.

مفيش مشكلة... أنا تقريبًا بقيت متعود وبقول ربنا يشفيهم وبس

لكن الصدمة الحقيقية كانت لما اكتشفت إنها طفلة مصرية، عندها 13 سنة فقط!

وهنا كانت المشكلة بالنسبالي أكبر بكتير من مجرد رسالة.

سألت نفسي:
إزاي طفلة مصرية عندها 13 سنة تعرف تقول كلام الدواعش ده؟
مين اللي بيأثر عليها؟
ومين اللي بيوصل لها الأفكار دي؟
وياترى عملو كده مع كام طفل وطفله في مصر ؟

عشان كده كتبت البوست السابق.

مش عشان أهاجم السوريين.
ومش عشان أتكلم عن سوريا.
ومش عشان أدخل في خلاف مع حد.

أنا كتبته عشان أولاد بلدي، وعشان أقول للأهالي: خلو بالكم من أولادكم، واعرفوا هم بيتابعوا مين وبيسمعوا إيه، ومين بيأثر على عقولهم.

أنا مش عاوز أشوف مصر في يوم من الأيام تعاني من نفس نتائج التطرف والعنف والكراهية اللي شفته ولسه بشوفو في دول تانية.

وبعد البوست، كالعادة، حصل هجوم بالالاف من بعض الحسابات السورية 😅

وانا كده كده بعمل ليهم بلوكات فقط .. لأني مش عاوز صفحتي تتلوث بناس متطرفه مهما كانت جنسيته
و بختار الناس اللي بتابعني بعناية

بالنسبالي الموضوع واضح:
أنا مركز مع بلدي، ومشغول بمحتوايا، ومعنديش أي رغبة في الدخول في مشاكل مع أي شعب.

أما اللي بيختار الشتيمة والتكفير والتهديد، فده اختياره هو، مش اختياري.

والاستفزاز مفيش أسهل منه، وإنتوا شفتوا بنفسكم لما حبيت أضايقكم وأستفزكم عملت فيكم إيه. 😅

بس أنا مش ناوي اكمل في ده، عشان معنديش وقت. وعشان عندي شغل وحياه اعيشها وانتو للأسف معندكوش

وبالنسبة بقى لموضوع:
"إنت سني؟ شيعي؟ مسيحي؟ ملحد؟ علوي؟"

هقولكم حاجة يمكن تكون مختلفة عن اللي متعودين عليه:

إحنا في مصر، في ناس مختلفة في الدين والمذهب والأفكار، لكن في حياتنا اليومية بنعيش مع بعض.

أنا مسلم، لكن عادي جدًا يكون صاحبي أو جاري أو زميلي في الشغل مسيحي.

أروح بيته، وييجي بيتي.

نفرح مع بعض، ونتعامل مع بعض، وفي النهاية إحنا ولاد بلد واحدة.

مش بضرب في ابن بلدي عشان هو من طائفه تانيه
ولا بنروح نجيب عصابات من جميع دول العالم التالت زي الايغور و طاجيكستان و أوزبكستان و قرغيزستان وكازاخستان وأفغانستان باكستان و و و عشان يموتو ولاد بلدي ويعتدو علي نساء بلدي زي ما انتو بتعملو للأسف مع الشيعه والعلويين والدروز و و و
بشوف الفيديوهات دي دايما و هو شئ مؤسف بالنسبالي اني اشوف انسان يقتل ابن بلده لمجرد انه من طائفه تانيه او ديانه تانيه
زي ما كان شئ مؤسف بالنسبالي لما كنت بشوف بشار بيقصفكم

ورغم ذلك مشاكل أي دولة تانية، وصراعاتها السياسية والدينية، فهي تخص أهلها في المقام الأول، وأنا مش جاي أحلها ولا أدخل فيها.
انتو احرار طالما حالكم ده عاجبكم ودي طبيعتكم

لكن في نفس الوقت، محدش من حقه ينقل أفكار التطرف والكراهية والتكفير لمصر، وبعد كده يستغرب لما المصريين يرفضوها.

مصر بلد لها تاريخ وحضارة وهوية، وأنا هفضل أقدم المحتوى اللي بحبه عن بلدي، وأتكلم عن الأماكن اللي بشوف إنها تستحق إن الناس تعرفها.

واللي مش عاجبه المحتوى ببساطة:
مايتابعنيش .

لكن الشتيمة والتكفير والتهديد بالقتل مش هتخليني أغير رأيي، ولا هتخليني أبطل أحب بلدي.

وبالنسبة لرسائل التهديد اللي بتوصلني من الدواعش يوميا، واللي فيها كلام عن قتلي:

هو في أجمل من إن الإنسان يموت وهو واقف بيدافع عن بلده وعن حاجة بيؤمن بيها؟ ❤️🇪🇬

وفي النهاية، عاوز أشكر كل سوري محترم دخل كلمني باحترام، ورديت عليه بأحترام سواء اختلف معايا أو اتفق معايا.

ومن خلالكم عرفت إن سوريا لسه فيها ناس محترمة وواعية، وإن مش كل السوريين أصحاب أفكار متطرفة زي ما البعض بيحاول يثبت.

الاختلاف مش مشكلة.

المشكلة في الكراهية والتكفير والعنف.

وأنا هفضل مصري، وهفضل أحب بلدي، وهفضل أصور بلدي وأحكي عن تاريخها وحضارتها.

والمحترم أهلاً بيه ❤️🇪🇬

أما اللي داخل يشتم أو يهدد وينشر كلام متطرف ...

البلوك جاهز 😉

06/09/2026

مهندسة ماري صانعة محتوى ، تنتقد الاهدار و الإهمال في ذبح الأشجار و احلالها بنخل يموت بعد فترة نتيجة الإهمال ، لاسيما على طريق المحور

🪚🌳

05/09/2026

🌳 من القاهرة الخرسانية إلى القاهرة الخضراء.. مشروع جديد لتغيير وجه العاصمة

في خطوة جديدة لتطوير القاهرة وتحسين جودة الحياة، وجّه الرئيس عبد الفتاح السيسي اليوم بضرورة تبنّي مشروع لـ «تخضير القاهرة»، يستهدف تحويل أي مساحة يتم إخلاؤها إلى مسطحات خضراء.

الفكرة مش مجرد تجميل للشوارع، لكن زيادة المساحات الخضراء داخل القاهرة، وخلق أماكن أفضل للمواطنين، بالتزامن مع تطوير المناطق التاريخية والتراثية وإعادة إحياء العديد من معالم القاهرة القديمة.

🏛️🌳 قاهرة تجمع بين التاريخ والطبيعة...

تطوير القاهرة لا يتوقف عند المباني والطرق، وإنما يمتد للحفاظ على هويتها التاريخية، وفتح مسارات سياحية جديدة، وزيادة المساحات الخضراء داخل العاصمة.

هل تتمنى تشوف القاهرة مليانة حدائق ومساحات خضراء أكتر؟ 🌳❤️




#القاهرة
#مصر 🇪🇬

05/09/2026