13/06/2026
تكون عايش مع والديك وأهلك فرحان حتى يجيك في بالك تفكير الموت، تقول انا كون يموت بابا نهبل، كون تموت أمي نهبل خلاص مانقدرش نعيش، مكانش واحد يقولك لا انا نقدر نصبر لانه حاجة عظيمة ومستحيل ننساها.
بعد الموت تع انسان عزيز، شفت الأفكار لي كانو يجوك من قبل، رح تشوف أنهم كلهم مجرد تسرع منك ولحظة كنت فيها تتخيل الموقف برك، ربي سبحانو رح يصب عليك صبر عظيم نتا وتنخلع، قادر ماتبكيش من الصدمة، قادر تبكي، قادر تقلب الدنيا خاصة البنات يخرجو الحزن تعهم بشكل واضح أكثر من الرجال، ماتقولش هذا ضعف إيمان ولا حاجة عيانة إنسان لي يفقد عزيز عليه في لحظة ضعف قادر يدير كلش.
الحال هذا أكيد صعب على الجميع، بصح من رحمة ربي بعباده انو بعد ايام قليلة فقط رح يرزقك صبر وهدوء ماتقدرش تتخيلو قبل الوفاة، تشوف واحد فقد شخص منذ أيام بصح تلقاه يضحك ويڨصر، مرحش تلقاه مهبول كيما كان يقول مالڨري من الداخل يكون في حالة يرثى لها صح.
الم.وت أكيد مصيبة تحل بالبيوت، وحزن كبير ومشاعر جد سلبية في قلوب الناس، كي تشوف واحد يبكي خليه يفرغ حزنو ماتقولوش ماتبكيش، خفف على الناس بصح ماتخليش الشعور كأنه ماكان والو، ساعفو الناس في أحزانهم وادعولهم ربي يصبرهم،
في الأخير الله يشفي كل مرضى المسلمين ويرحم الأموات منهم ويحفظ الأحياء ويقبض أرواحنا على صورة نرضاها لنا ولهم
