Jargal's Wildlife Photography

Startseite
Deutschland
Berlin
Jargal's Wildlife Photography

Жигүүртэн шувуу сонирхдог хүмүүст зориулсан монгол тайлбартай хуудас юм, сэтгэгдэл, мэдээлэл хуваалцаж, сонирхсонд талархлаа !

15/06/2026

Отгот шунгуурын хайрын вальс тогоруунаас дутахгүй үзэсгэлэнтэй, олон үзэгдэл үзүүлбэртэй. Ганган гэзгээ гайхууулна, далавчаа дэвж ижлээ урьна, ургамлаар бэлэг өргөнө, тэгээд усны мандалд босч хослон бүжнэ. Усан дээр навтайж хэвтээд эргэх, далавчаа үл ялиг өргөж хөдөлгөх зэрэг шинэ үзүүлбэр энэ удаад анх надад харуулав. Тэгээд үүрээ барьж, үр төлөө өсгөнө. Ийм бүжгийн үе их удаан ч, гоё ч. Отгот шунгуур (Podiceps cristatus) Хун нуур

13/06/2026

ОМИДЫН ГУНИГТ ТҮҮХ.
Сибирийн хүйтэн бүсэд зусдаг цагаан тогоруу нэн ховор шувуу. Ази тивийн гурван нутагт өвөлждөг тусдаа сүргүүд байсан ч Энэтхэг, Ираных ан гөрөө, амьдрах орчноо алдсаар устаж, өдгөө гол гайгүй тооны сүрэг нь Хятадад үлджээ. Цагаан тогоруу үзэсгэлэнтэйгээс гадна түүний түүх гунигтай. Каспийн тэнгисийн өмнөд эрэгт 1978 оноос 12-14 бодгаль байсан бол хорогдсоор 1990 оноос ганц хос үлдэж, 2007 онд эмэгчин нь алуулсан гэнэ. Үлдсэн ганц эр шувууг Омид (перс хэлээр “итгэл найдвар”) хэмээн нэрийдэж, хоёр хамгаалагч гаргаж өгчээ. Хөөрхий тэр тогоруу 15 жилийн туршид намар бүр умардын тайгаас руу 5000 км алс нүүж ирднэ. 2023 онд тогоруу хамгаалах олон улсын байгууллага Омидод европын үржүүлгийн газраас Роя нэртэй (персээр “Мөөрөдөл”) ижил олж өгч, тэд сар гаруй хугацааны дараа нүүдэлд гараад Омид сураг алдарсан гэнээ. Баруун нутгийн сүүлчийн цагаан тогорууны эмгэнэлт түүх олон улсад түгж, энэ шувууны устаж буй амьтны мөхлийн нэр домог болсон ажээ. Манайд бол дээхнэ нэг ийм ховор тогорууг буудаж алсан, хэргийг дарсан гэж сонссон. Тоодог, хотон, зээр, мазаалай, хавтгай зэрэг нэн ховордсон амьтан шувууг болвол агнахаас буцахгүй. Цагаан тогоруу (Leucogeranus leucogeranus)

09/06/2026

Бөөвөлжин өвөөлж тун завгүй, хэдэн ангаахайгаа эхлээд хооллоно, хань ижилдээ хорхой шавьжаар хайрын бэлэг барьж амжуулна. Хүн амьтан харвал үүрнээсээ зүг бууруулан холдож гэр бүлээ хамгаална. Өвөөлжийн алаг улбар дэвүүр мэт залаа олон үүрэгтэй. Орооны үед гангараа, дайсан ирвэл дайны туг. Зөвхөн сэтгэл хөдлөх үед дэлгэдэг гэж бодсон чинь бас өөрсдийн дохио харилцаанд ашиглах юм. Эмэгчиндээ хоолоо идээч гэж хошуундаа хорхой зуучаад хашгиралтай биш дээ. Тэр залааг зүгээр дарцаглахад өнөөх нь идэж явснаа яаравчлан ирэх юмаа. (Дууг нь нэмж оруулав) Eurasian Hoopoes (Upupa epops)

07/06/2026

Амьтны бага нь гэнэн сониуч. Залуу цагаан тогоруу энд тэнд хог хатгаж заваараад л, эх эцгээсээ далийж тэнээд л. Хавтгалж, хилэнжигүүрийн довтолгоонд илт сандрах нь хөөрхөн. Аюул агаараас ирнэ гэж зөнгөөрөө мэддэг юм уу, эсвэл намгийн бусад шувууны үүр дээр гишгэчихсэндээ "гэмт хүн гилбэлзэнэ" гэдэг болсон ч юм уу гэж инээд хүрч байлаа. Амьтан шувууны зан авир ажиглах сонирхолтой. Цагаан тогоруу (Leucogeranus leucogeranus)

04/06/2026

Өчигдөр Гүнгалуутайн нуур орж шувуу харлаа. Залуу өвөгт тогорууны том сүрэг нааш цааш нисэж буугаад байж л байна. Энэ хавьд зусдаг хээр талын шувуу. Цэн тогоруу нуурын хөвөөгөөр идээшлэж байснаа биднээс холдоод нуурын зэгс рүү орлоо. Сүүлийн жилүүдэд энд хараагүй Цагаан тогоруу иржээ. Гандуу, нуурын ус их татарсан учир жижигхэн горхины хөвөө бараадаад дов сондуулын дунд идэш хайх ч мал, хүн амьтан үргээгээд амар заяа үзүүлэхгүй. Тэгсгээд үргээд уурхай, нуурын дунд зурвасхан газар буусан. Энэ ховор тогорууны идэш тэжээл явцуу, голдуу усны ургамлын булцуу, үндэс, навч өвс иддэг гэж уншсан санагдлаа. Түүний хорогдолд хүний үйл ажиллагаа, мал аж ахуй сөргөөр нөлөөлж, зусах байтугай түр саатах газаргүй байгааг хараад сэтгэл эмзэглээд, холоос хэдэн бичлэг хийсэн болоод буцлаа. Гүнгалуутай 2026.6.3.

04/06/2026

Товч ярилцлагаас
https://www.facebook.com/share/v/1CsVB7yJxx/

30/05/2026

"Хэн ирэв, юу болов !" Галуу жигтэйхэн сониуч, гялаан цагаан юм шүүрдэг, хүний нүүр царайг ч таньдаг гэнэ. Удаах сониуч нь нутгийн эр, удахгүй мотоотой давхиж ирнээ 🙂 Бор галуу (Anser anser) Баян нуур

29/05/2026

Хос жунгаа үүр барихаар болж сүртэй чанга зарласнаа нэгийгээ үүрний өвсөнд явуулчихаад, нөгөөх нь зүүгдчихээд зүгээрийг хийж билээ. Хожим шөнөжин өдөржин нойр хоолгүй ажилласан гэж ярьна даа 🙂Улаан хошуут жунгаа (Pyrrhocorax pyrrhocorax) 2024 Өгий нуур

27/05/2026

Өглөөний нарны улаан гэрэлд усны улаан давалгаанд улаан хошуутай, хөлтэй Эгэл хилэн жигүүр дэргэд ирж буув. Black-winged Stilt (Himantopus himantopus)

27/05/2026

Гүүрний дор хараацайн том сүрэг олон гэр үүр хаяа нийлүүлэн босгож, шинээр ч барьж л байх юм. Үржлийн цаг дуусч байхад ийм их үүрээр яадаг юм бол гэвэл жилдээ хоёр ч удаа өндөглөдөг, залууст шинэ гэр орон хэрэгтэй ажээ. Том сүргийн амьдрал буцалж, хөөцөлдөж, үнсэлдэж эвцэлдэж, үр төлөө хооллох зуур шавар зөөж, зарим нь хөршийн байрны бэлдцээс хумсалж, зай завсаргүй нисэлдэхийг хараа үл гүйцнэ. Гүүрэн дээгүүр өнгөрөх машины чимээ их болохоос биш зогсоо зайгүй жиргэж дуулж байдаг гэнэ. Хүрээний хараацай (Delichon urbicum)

Adresse

Am Tierpark 125
Berlin
10319

Webseite

https://www.flickr.com/people/jargals004/

Benachrichtigungen

Lassen Sie sich von uns eine E-Mail senden und seien Sie der erste der Neuigkeiten und Aktionen von Jargal's Wildlife Photography erfährt. Ihre E-Mail-Adresse wird nicht für andere Zwecke verwendet und Sie können sich jederzeit abmelden.