04/07/2026
📢 NJOFTIM I RËNDËSISHËM PËR TË GJITHË TREGTARËT
Të nderuar tregtarë që do të shërbeni me produktet tuaja në Festën e Bjeshkëve të Topojanit, e cila mbahet ditën e diel, më 5 korrik, ju lutemi të respektoni këto udhëzime:
✅ Siguria, cilësia dhe garancia e produkteve janë mbi gjithçka. Mos abuzoni me çmimet dhe mos ulni cilësinë e produkteve. Vizitorët e mbajnë mend shumë mirë sjelljen dhe shërbimin që marrin. Një veprim i papërgjegjshëm dëmton jo vetëm biznesin tuaj, por edhe emrin dhe mikpritjen e gjithë zonës së Topojanit.
🥩 Tregtarët e mish*t duhet të përgatiten për një numër të madh pjesëmarrësish dhe të sigurojnë cilësi dhe sasi të mjaftueshme për të përballuar kërkesat. Në asnjë rast nuk duhet të shërbehet mish i pa zier mirë ose gjysmë i pjekur për shkak të ngutjes. Çdo shkelje do të evidentohet dhe personat përgjegjës nuk do të lejohen të ushtrojnë aktivitet në edicionet e ardhshme.
🤝 Në festë marrin pjesë vizitorë nga të gjitha trojet shqiptare. Sjellja juaj, korrektësia dhe respekti ndaj çdo mysafiri përfaqësojnë jo vetëm biznesin tuaj, por edhe kulturën, traditën dhe mikpritjen e Topojanit. Le të përmendemi vetëm për vlera dhe shembull të mirë.
❄️ Gjeneratorët dhe frigoriferët duhet të jenë në funksion gjatë gjithë kohës, për të garantuar ruajtjen e produkteve në kushte të sigurta. Shërbeni vetëm produkte të freskëta dhe cilësore, ashtu si vetë bjeshkët tona.
🧹 Pastërtia është detyrim për të gjithë. Ashtu siç i gjetëm bjeshkët tona të pastra, ashtu duhet t'i lëmë edhe pas përfundimit të festës. Gabimet e vitit të kaluar nuk duhet të përsëriten.
🎥 Në përfundim të aktivitetit, çdo hapësirë tregtimi do të kontrollohet dhe dokumentohet. Tregtarët që do të dallohen për pastërti dhe korrektësi do të vlerësohen dhe do të shpërblehen nga organizatorët. Ndërsa shkeljet do të bëhen publike si shembuj që nuk duhet të përsëriten më,
dhe të mos ken të drejtë tregëtimi në edicionet tjera.
🗑️ Organizatorët kanë siguruar kosha mbeturinash dhe qese plastike për mijëra pjesëmarrës. Çdo tregtar është përgjegjës për pastërtinë e vendit ku ushtron aktivitetin.
📌 Organizatorët kanë pasur mundësinë të angazhonin restorante dhe zgara me emër dhe përvojë në zonën tonë , të cilat do ta menaxhonin të gjithë shërbimin pa ndihmën dhe pranin e askujt tjetër.
Megjithatë, u vendos që përparësi t'u jepej banorëve dhe tregtarëve të zonës sonë, në mënyrë që përfitimi të mbetej në Topojan.
Prandaj ju kërkojmë të mos e zhgënjeni këtë besim. Çmimet e drejta, cilësia, siguria dhe pastërtia janë përgjegjësi e secilit prej jush. Përndryshe, në vitet e ardhshme organizatorët do të jenë të detyruar t'ua besojnë këtë shërbim operatorëve profesionistë.
🙏 Le të punojmë së bashku që Festa e Bjeshkëve të Topojanit të mbetet një shembull i organizimit, mikpritjes dhe traditës shqiptare🇦🇱
Me respekt,
Grupi Organizator 🤝
