08/03/2026
ایک پردیسی کی زندگی آسان نہیں ہوتی۔ وہ اپنا گھر، اپنے لوگ اور اپنی مٹی چھوڑ کر صرف اس امید پر نکلتا ہے کہ کہیں ایسی جگہ مل جائے جہاں وہ عزت سے کما سکے اور اپنے خاندان کا مستقبل بہتر بنا سکے۔
جب کوئی ملک آپ کو اپنے دروازے کھول کر جگہ دیتا ہے، آپ کو کام دیتا ہے، سڑکوں پر تحفظ دیتا ہے، اور آپ کو یہ احساس دلاتا ہے کہ آپ اکیلے نہیں ہیں… تو وہ سرزمین صرف کام کی جگہ نہیں رہتی، وہ آپ کی زندگی کا سہارا بن جاتی ہے۔
ایسے میں اگر کبھی اس ملک پر مشکل وقت آئے تو ایک سچے انسان کی پہچان یہی ہوتی ہے کہ وہ نمک حلال ثابت ہو۔ جس زمین نے آپ کو روٹی دی، جس قانون نے آپ کو تحفظ دیا، جس معاشرے نے آپ کو پناہ دی… اس کے خلاف جانا لکھنا برا بھلا کہنا دراصل اپنے ضمیر کے خلاف جانا ہے۔
وفاداری صرف لفظ نہیں، یہ کردار کا امتحان ہے۔ چاہے وہ سعودی عرب ہو، قطر ہو بحرین ہو متحدہ عرب امارات ہو یا دنیا کا کوئی بھی ملک جہاں آپ رزق کے لیے رہتے ہیں… اس سرزمین کے لیے دل میں احترام رکھنا، اس کے قوانین کا ساتھ دینا اور اس کے خلاف کسی نفرت یا سازش کا حصہ نہ بننا ایک مہذب انسان کی پہچان ہے۔
پردیس میں کمایا ہوا ہر لقمہ ہمیں یاد دلاتا ہے کہ ہم کسی کے احسان تلے ہیں۔ اس لیے انسان کی اصل عظمت یہی ہے کہ وہ جس ملک کی مٹی سے فائدہ اٹھا رہا ہو، اس کے ساتھ وفاداری اور احترام کا رشتہ کبھی نہ توڑے۔
