27/10/2025
✅မကွေးတိုင်း၊ဂန့်ဂေါ မှာ အသံတိတ်လှုံ့ဆော်မှု✅
ဂန့်ဂေါမြို့ပေါ်တွင် စစ်အုပ်စု လုံခြုံရေး တင်းကျပ်ထားသည့်ကြားက အတုအယောင်ရွေးကောက်ပွဲကို လက်မခံကြောင်း ရွေးကောက်ပွဲကန့်ကွက်စာရွက်များ ကပ်ပြီး အသံတိတ်ဆန္ဒပြ...
အောက်တိုဘာ ၂၇ ၊ ၂၀၂၅
မကွေးတိုင်း၊ ဂန့်ဂေါမြို့ပေါ်မှာ လုံခြုံရေးတင်းကျပ်ထားတဲ့ကြားက အကြမ်းဖက်စစ်အုပ်စုရဲ့ အတုအယောင်ရွေးကောက်ပွဲလက်မခံကြောင်း စာရွက်တွေကို မြို့ထဲက နေရာအချို့မှာ ကပ်ပြီး အသံတိတ်ဆန္ဒပြမှုတစ်ခု ပြုလုပ်ခဲ့တယ်လို့ သိရပါတယ်။
အောက်တိုဘာလ ၂၅ ရက်က ရွေးကောက်ပွဲကို "သင့်မဲဖြင့် လူသတ်ခွင့်မပေးနဲ့" ၊ "တရားမဝင်တဲ့အတုအယောင်ရွေးကောက်ပွဲကို လူထုအားနဲ့တိုက်ဖျက်ကြ" အစရှိတဲ့စာသားတွေပါတဲ့ စာရွက်တွေကို ဂန့်ဂေါမြို့ထဲက အမှတ်(၄)ရက်ကွက်ရှိ ရပ်ကွက်အုပ်ချုပ်ရေးမှုးရုံးအနီး၊အမှတ်(၂)ရပ်ကွက်ရှိ ဗိုလ်ချုပ်လမ်းမကြီးပေါ်တစ်နေရာအပြင် မြို့တောင်ဖက်အထွက်ရှိ We loveစစ်ဆေးရေးဂိတ်အနီး အစရှိတဲ့နေရာတွေမှာ ကပ်ပြီး အသံတိတ်ဆန္ဒပြမှုကို ပြုလုပ်ခဲ့တယ်လို့ ယောအလင်းတန်းဆီက သိရပါတယ်။
မြို့ထဲက အခြားနေရာတွေမှာလည်း ရွေးကောက်ပွဲ လက်မခံကြောင်း စာရွက်တွေကပ်ဖို့ လုပ်ဆောင်ခဲ့ပေမယ့် အကြမ်းဖက်စစ်အုပ်စုရဲ့ လုံခြုံရေးတွေက အချိန်ပြည့်ရှိနေတာကြောင့် လုပ်ဆောင်လို့ရတဲ့နေရာတွေမှာပဲ ပြုလုပ်ပြီး မှတ်တမ်းတင်ခဲ့တာဖြစ်တယ်လို့ သိရပါတယ်။
ဂန့်ဂေါမြို့မှာ အခုလို စစ်အုပ်စုရဲ့ရွေးကောက်ပွဲကို ဆန့်ကျင်ကန့်ကွက်ကြောင်း စာရွက်တွေကပ်ပြီး အသံတိတ်ဆန္ဒပြမှုပြီးတဲ့နောက် မြို့လုံခြုံရေးကို ပိုမိုတင်းကြပ်ထားတယ်လို့လည်း မြို့ခံပြည်သူတွေဆီက သိရပါတယ်။
`"ဂန့်ဂေါမြို့ပေါ်မှာ ရွေးကောက်ပွဲကိုဆန့်ကျင်ကြောင်းစာရွက်တွေကပ်ပြီး လုပ်ဆောင်ပြတာဟာ ဂန့်ဂေါမြို့နယ်က ပြည်သူတွေကလည်း ၎င်းတို့ရဲ့အတုအယောင်ရွေးကောက်ပွဲကို လက်မခံဘူးဆိုတာကို ပြတာပါပဲ။ စစ်ကောင်စီရဲ့ ရွေးကောက်ပွဲနဲ့ပတ်သက်လို့ နောက်ထပ်ပြီးလည်း ရတဲ့နည်းလမ်းဖြင့် ဆန့်ကျင်ကြောင်းလုပ်ဆောင်မှုများကို ထပ်မံလုပ်ဆောင်သွားဖို့ ရှိတယ်။ နောက်ကိုတော့ ဒီထက်ပိုကောင်းတဲ့နည်းလမ်းတွေပြုလုပ်ဖို့ စီစဥ်ထားပါတယ်" လို့ အခုအသံတိတ်သပိတ်လှုပ်ရှားမှုကို ဦးဆောင်စီစဥ်သူတစ်ယောက် ပြောကြောင်း ယောအလင်းတန်းမှာ ဖော်ပြထားပါတယ်။
အကြမ်းဖက်စစ်အုပ်အနေနဲ့ ဂန့်ဂေါမြို့နယ်မှာ ရွေးကောက်ပွဲပြုလုပ်ဖို့အတွက် နယ်မြေစိုးမိုးရေး လုပ်ဆောင်ဖို့ ရှိနေတဲ့အတွက် ပြည်သူတွေအနေနဲ့လည်း ရွေးကောက်ပွဲပြုလုပ်ဖို့ နီးကပ်လာချိန်တွေမှယ စစ်ရေးအထူးသတိရှိဖို့လည်း လိုအပ်တယ်လို့ ဒေသတွင်းတော်လှန်ရေးရဲဘော်တစ်ယောက်က ပြောဆိုချက်ကို ယောအလင်းတန်းက သတင်းဖော်ပြထားပါတယ်။
ဂန့်ဂေါမြို့နယ်မှာ အကြမ်းဖက်စစ်အုပ်စုက မြို့ပေါ်ရပ်ကွက်တွေနဲ့ အောင်မြင်ရွာ(ရှောက်ပင်)အထိုင်ချကာကင်းစခန်း၊ မြစ်သာဆည်တမံလုံခြုံရေးကာကင်းစခန်း၊ မြို့ မြောက်ပိုင်းရှိ ပျုစောထီးတွေ အားကောင်းရာကျေးရွာတွေမှာသာ နယ်မြေစိုးမိုးထားနိုင်တာ ဖြစ်တယ်လို့ သိရပါတယ်။
#မောင်း page မှ ကူးယူဖော်ပြခြင်းဖြစ်ပါတယ်
゚viralシfypシ゚ ゚viralシfypシ゚viralシalシ #ဂန့်ဂေါမြို့
