08/02/2026
MON PÉÏ
Mon péï fine mélanzé kom in kafé o lait.
Nout mizik ék nout fét tradysionél la fine ariv olé, olé.
Mon péï tér d’akey pou band réfuzié, kank mon prop pép lilé déporté.
Y mizol nout gél pou pa kozé, kan boug koulér koton la pou kozé.
Lo ron maloya la lwa y vyen férmé, kar mésié ék madam la bozwin, ropozé.
Nout gép nou giny pi shasé, dopi mr Bernar y import pou nou ashté.
Nout band ravine lé détourné pou ranmpli piscine natirel boug byin plasé.
pendan, pou nou dan lé ba, y di a nou la séshréss la débarké.
Mon péï lé mavouzé sanm la poud ék lo dou ki rand pa nout vi pli sikré.
Nout band protéktér la kriminalité BAC +2,
y préfér sov lo shien pou zournal kotidyan, ké véy si nout gramoun dan nout kartyé.
Mon péï pou gaté, kom in riz shofé la fine tourné.
Na telman pou di! ké mi préfér arét kozé.
La di mon péï bato fou, ou sa bana y rale anou?
Astér mi di mon péï bato fou, bana la fine… oubli anou.
Somanké! La fine ariv lér, Pou nou…LÉV IN KOU!
Somanké! La fine ariv lér, Pou nou…DOBOUT IN KOU!
Text: Dimi Laïon
