https://www.facebook.com/106248868978201/

DNYL Sa Kanyang Pagliham, Paombong (2026)

25/07/2025

Oportunidad — madami rito ay akin nang nakita, natagpuan, ngunit patuloy na tinalikuran.

Sa larangan ng pagsulat, hindi ko alam kung ako ay para saan, ano ang pakinabang, at ano ang nais patunayan.

Marami nang oportunidad ang kumatok sa'king pintuan, ngunit tila marami pa ring hadlang, marami pa ring dahilan upang hindi ko ito pagbuksan.

Hindi ko rin alam kung ano ang aking estilo, kung may nagkakainteres ba sa'king mga gawa. Wala akong ideya kung para saan ba talaga 'ko, at hindi pa rin alam kung may kinabukasan ba'ko rito.

Isa lang naman ang dahilan kung bakit, sa kabila nito, ay patuloy pa ring nagpapatuloy — nais ko lamang maging magaling, kahit sa iisang bagay. Maging inspirasyon sa iba, at makamit ang pinanghawakang salita: na ako ay balang araw makikilala bilang isang magaling na manunulat.

Marami na'kong sinayang — at ilan pa kaya ang tatangkaing sasayangin?
Hindi ko ito binibilang, dahil ayoko nang isipin.
Sa larangang ito, isa lamang ang aking katanungan:

Para rito nga ba ako?

11/07/2025

Malungkot ang Buwan

Ang kanyang pinagkukunan ng Liwanag ay 'di n'ya makita't makasama ng malapitan.

Malungkot ito, pero patuloy na nagbibigay ng bahagyang buhay kapag ang mundo'y tinalikuran ng Liwanag

Malungkot ito, ngunit sa kabila ng marka ng mga galos at sugat na dinanas n'ya ay patuloy na tinitingila — nais abutin.

Ikaw sana'y maging tulad din ng buwan, Minsan ma'y malungkot, patuloy ka pa rin sanang maging liwanag ng iba — maging inspirasyon.

Patuloy kang maging gabay, sa kabila ng mga markang nakuha sa sugat ng pagkakamali, sa galos ng reyalidad.

Patuloy kang maging gabay, sa sarili mo at sa iba — talikuran ka man ng liwanag.

02/02/2025

gustong tumakas, tumakbo papalayo sa katotohanan;
matakasan ang reyalidad, upang makalayo na sa isinumpang kinabukasan.
Sa patuloy na paglakbay, sa paghahanap ng daan;
ang tamang direksyon, at tamang patutunguhan, hindi pa rin tiyak, kung saan ang dapat puntahan.
Walang kasiguraduhan kung saan dapat pumunta, kung ano ang kailangan, at kung ano ang dapat pang malaman. Sa patuloy na pagnanais makalayo, sa tingin ko'y imbis na mapalapit sa payapang patutunguhan, ako'y lalong napapalayo.

Hiling sa Ama'y bigyan ng lakas ng loob,
upang sa pagkakagapos, ako'y makawala,
mahanap sana ang lakas ng loob,
upang bigat sa'king dibdib ay masabi, at kumawala.

09/01/2025

Hindi alam kung para kanino ang mga akdang sinusulat
Ginagawa lamang, sapagkat ito ang tanging kakayanan.
sarili'y tila kung sino, patuloy pa rin na kinikilala
hindi pa rin mawari, ano ang s'yang tunay na halaga.

Sa oras ng aking pananahimik, iginugol ang oras sa pagkilala,
hindi sa ibang tao, ngunit sa sarili.

hindi pa rin nagtatagumpay — hinahanap pa rin ang piraso ng pagkatao, ang tunay na halaga at talento
upang masabi, na kilala ko ang aking sarili — bilang Ako.

14/12/2024

Tanaw agad, pagbukas mo ng pinto.
Sa dulo, bandang kaliwa, nakaupo ang isang bata,
May pangarap s'ya, ngunit walang nakakaalam kung ano.
Tahimik kung minsan, madalas ay misteryoso
Madalang magkwento, palagi kung magtanong
Mahilig ngumiti, mata'y 'di makuhang magloko

Malalim ang iniisip, kung iyong papansinin
Madalas nakatulala at malayo ang tingin
Meron namang kaibigan, ngunit pili ang nilalapitan
Kung nanaisin man sana, nais ko s'yang maging kaibigan.

Sa Room 201, dulo, bandang kaliwa
Natagpuan ang sarili,
Nakakulong, ang pagkakagapos nais kitilin
Nais kumawala sa hawla ng pagkabalisa
Pagkatakot, at pagkahiya.

Sa dulo, bandang kaliwa,
Sarili'y doon lang pala matatagpuan,
Nahanap na ang dahilan upang tuluyang makawala sa hawla na gawa
ng takot at kawalan ng tiwala't paniniwala.

23/11/2024

Nang magmahal ang isang manunulat,
sa pagsulat s'ya'y walang kapaguran.
Ang daming salita ang kan'yang napaglalaruan,
ang daming salita ang kan'yang naipagtutugma,
at marami s'yang nagagawang akda,
na kung iisipin, nagmistula s'yang halaman na biglang namulaklak, nang matamaan ng sikat ng araw.

At may pangalawang manunulat, nang s'ya ay magmahal,
hinanap n'ya ang pahinga.
Sa isip n'ya'y walang salitang mapaglaruan at maipagtugma.
Ni hindi manlang makagawa ng panibagong akda, at s'ya ay nagmistulang halaman na dumating na sa oras ng kan'yang pagkakalanta.

Nang magmahal ang pangalawang manunulat,
kabiguan at pagkadismaya ang kan'yang naramdaman.
Ni hindi manlang s'ya makapagsulat,
hindi kagaya ng ibang manunulat.

Ang tinutukoy ko ay Ako,
Ang pangalawang manunulat.

29/10/2024

Nabaling ang atensyon,
nang matanaw ang isang salamin,
Isang dalaga ang kan'yang repleksyon,
"Maganda s'ya", 'yon na lamang ang aking naitugon
tanging salitang, lumabas sa aking bibig,
tanging salita na nakapagbibigay larawan,
sa kung paanong ako, ay nahulog, sa isang repleksyon..

Isang misteryosong salamin,
nais kong muli kang magpakita sa akin,
'pagkat hindi na maalis sa'king isipan,
ang repleksyon ng dalagang nasilayan,
sa huli'y 'di pa rin malimutan..

Ngunit baka iyon,
ay isang guni-guni lamang,
isang misteryosong salamin
sa isipa'y sumagi rin lang,
dala na rin siguro ng aking imahinasyon,
kaya't pumasok sa isipan
na ito'y mayro'ng katotohanan.

Ngunit alam n'yo ba kung ano ang katotohanan?

Ang salamin ay ang kanyang mga mata,
at ang repleksyon nito ay ang kagandahan n'yang dinadala.
Dahilan upang sa kan'ya,
sa isang misteryosong salamin, ako ay — tuluyang mahulog

At ' yon ay aking hindi na ipagkakaila.

24/10/2024

Hindi Ikaw, Hindi Kayo — Ako, Sarili ko.

04/10/2024

Maligayang araw ng mga G**o!!!

Parte Kayo sa kung paanong Ako, ay naging Ako..

29/09/2024

Ikaw at ako, pinagtagpo
ngunit hindi pinagtugma
nagkatagpo, ngunit kailanma'y
hindi magtutugma..

23/09/2024

Hindi Sapat ang Nararapat

Paano makakausad
kung marami pang dahilan
upang patuloy na manatili

paano makakausad
kung ang susi upang mahanap ang sagot sa aking mga katanungan
ay ang pananatili lamang

saan huhugutin ang lakas ng loob
upang kalimutan na lamang
ang pag-ibig na minsa'y
hindi manlang nakuhang
ipagtapat

Kung madali lang sana ang lahat
Kahit pa hindi na ipagtapat
kakalimutan na lamang kita
dahil alam kong iyon naman talaga
ang s'yang nararapat..

14/09/2024

Paksa ng Akda na Binalewala

Isa itong tula
hindi pormal
at walang dating
tula na baka muli lamang mabalewala..

Hindi ako magaling magsulat
Hindi bukas ang aking isip sa mga ideya
sarado ang mata sa mga oportunidad
kaya't umaasang darating ang oras
na ito'y mamumulat

Hindi ako mahilig magsulat
ngunit heto ako, pinaglalaruan ang mga salita
at muling nagsusulat ng tula
dahil para sa'kin,
ito lamang ang nakikitang paraan,
at natatanging kakayahan.

Ito ang aking mga kataga
mula sa aking panaginip
sapagkat ako ay nagising na
at dumating na ang oras na namulat,
ang nakapikit kong mga mata.

Isa lamang ang aking paalala..

Normal ang magtaka
Normal ang mabalewala
at Normal ang magduda
ang hindi normal,
ay mawalan ng tiwala't pag-asa

Tandaan mo

May halaga ka,
at karapat dapat kang gawing paksa
sa isang akda na nakakaakit ng atensyon
at 'di nararapat na mabalewala.

DNYL Sa Kanyang Pagliham