29/10/2026
किनारमा बसेर नदीको गहिराइ नाप्न सकिँदैन
किनारमा बसेर नदीको गहिराइबारे अनुमान लगाउन सजिलो हुन्छ। पानीको बहाव हेरेर त्यसको गति, गहिराइ र जोखिमबारे अनेक तर्क गर्न सकिन्छ।
तर नदीमा नपसी, त्यसको बहावसँग जुध्ने अनुभव नगरी, त्यसको वास्तविक गहिराइ कति छ भनेर ठोकुवा गर्न सकिँदैन। जीवन पनि त्यस्तै हो।
अरूको जीवन, संघर्ष, उतारचढाव, परिस्थिति, कमजोरी तथा असफलताबारे टिप्पणी गर्न सजिलो हुन्छ। बाहिरबाट हेर्दा उनीहरूले के गर्नुपर्थ्यो र के गर्नु हुँदैनथ्यो भन्ने कुरा पनि प्रस्ट देखिएजस्तो लाग्छ। तर त्यो परिस्थितिमा उभिएको व्यक्तिले के भोगिरहेको छ, उसले कस्ता चुनौतीसँग जुधिरहेको छ र भित्रभित्रै कति संघर्ष गरिरहेको छ भन्ने कुरा बाहिरबाट सधैँ देखिँदैन।
मैदानमा नउत्रिएकालाई खेलको रणनीति बताउन सजिलो होला, तर मैदानमा उत्रिएपछि मात्रै जित्नका लागि कति मेहनत, धैर्य र साहस चाहिन्छ भन्ने महसुस हुन्छ।
यसको अर्थ अरूको काममा प्रश्न उठाउनै हुँदैन भन्ने होइन। तर कुनै निष्कर्षमा पुग्नुअघि हामीले एउटा कुरा सम्झनुपर्छ, हामीले देखेको दृश्य नै सम्पूर्ण वास्तविकता नहुन सक्छ।
किनारामा बसेर नदीको गहिराइको अनुमान लगाउन सकिन्छ, तर त्यसको वास्तविकता बुझ्न अनुभव पनि चाहिन्छ।
त्यसैले, अरूको यात्राको मूल्याङ्कन गर्नुअघि उनीहरूले हिँडिरहेको बाटो र भोगिरहेको परिस्थितिलाई बुझ्ने प्रयास गरौँ। किनकि बाहिरबाट देखिने सहजता र भित्रबाट भोगिने वास्तविकताबीच धेरै फरक हुन सक्छ।
