09/04/2026
ພິທີສະຫຼຸບການລົງຝຶກງານ ແບບຄຣີນິກກົດໝາຍ ແລະ ຮັບນັກສຶກສາກັບຄືນສະຖາບັນ
ໃນຕອນເຊົ້າວັນທີ 9 ເມສາ 2026, ທີ່ພະແນກຍຸຕິທຳ ແຂວງຄໍາມ່ວນ ໄດ້ຈັດພິທີສະຫຼຸບການລົງຝຶກງານ ໃນຮູບແບບຄຣີນິກກົດໝາຍ ແລະ ຮັບນັກສຶກສາຝຶກງານກັບຄືນສະຖາບັນ ຢ່າງເປັນທາງການ ໂດຍໄດ້ຮັບກຽດຈາກ ທ່ານ ວຽງວີໄລ ພົມມະວົງ ຮອງຫົວໜ້າພະແນກຍຸຕິທຳ ແຂວງຄໍາມ່ວນ ເປັນປະທານໃນພິທີດັ່ງກ່າວ ພ້ອມດ້ວຍການເຂົ້າຮ່ວມຂອງຄະນະສະຖາບັນຍຸຕິທຳແຫ່ງຊາດ ສາຂາ ສະຫວັນນະເຂດ, ຕ່າງໜ້າໂຄງການແບັບຊິໂຄ ແລະ ນັກສຶກສາຝຶກງານ.
ການລົງຝຶກງານໃນຮູບແບບຄຣີນິກກົດໝາຍຄັ້ງນີ້ ມີຈຸດປະສົງເພື່ອໃຫ້ນັກສຶກສາໄດ້ນໍາທິດສະດີທາງກົດໝາຍ ທີ່ໄດ້ຮໍ່າຮຽນຢູ່ໃນຫ້ອງຮຽນ ໄປປຽບທຽບກັບການປະຕິບັດງານຕົວຈິງ ໂດຍຜ່ານການໃຫ້ຄໍາປຶກສາທາງກົດໝາຍ ແກ່ປະຊາຊົນໃນທ້ອງຖິ່ນ, ການສຶກສາຄົດຕົວຈິງ ແລະ ການເຂົ້າຮ່ວມຂະບວນການຍຸຕິທຳ ຢູ່ ແຂວງຄໍາມ່ວນ.
ໃນລະຫວ່າງການຝຶກງານ, ນັກສຶກສາໄດ້ຮຽນຮູ້ ແລະ ເກັບກໍາປະສົບການ ທັງດ້ານການດໍາເນີນຄະດີ, ການໃຫ້ຄໍາປຶກສາທາງກົດໝາຍ, ການໄກ່ເກ່ຍຂໍ້ຂັດແຍ່ງ ຕະຫຼອດຈົນການໃຫ້ຄວາມຮູ້ທາງກົດໝາຍ ແກ່ຊຸມຊົນ ຊຶ່ງຖືວ່າ ເປັນໂອກາດທີ່ລ້ໍາຄ່າ ໃນການສ້າງຄວາມພ້ອມ ທາງດ້ານວິຊາຊີບ ກ່ອນສໍາເລັດການສຶກສາ.
ທ່ານ ວຽງວີໄລ ພົມມະວົງ ໄດ້ຊົມເຊີຍ ແລະ ຂອບໃຈນັກສຶກສາທຸກຄົນ ທີ່ໄດ້ທຸ້ມເທ ແລະ ຮັບຜິດຊອບຕໍ່ໜ້າທີ່ ຕະຫຼອດໄລຍະການຝຶກງານ ພ້ອມທັງເນັ້ນວ່າ ການຝຶກງານໃນຮູບແບບຄຣີນິກກົດໝາຍ ຖືເປັນສິ່ງສໍາຄັນ ໃນການສ້າງຊັບພະຍາກອນມະນຸດ ດ້ານກົດໝາຍ ທີ່ມີຄຸນນະພາບ ຮັບໃຊ້ ສປປ ລາວ ໃນໄລຍະຕໍ່ໄປ.
ພິທີດັ່ງກ່າວ ສໍາເລັດລົງດ້ວຍຄວາມອົບອຸ່ນ ໂດຍທຸກຝ່າຍໄດ້ຝາກຄວາມຄາດຫວັງ ໃຫ້ນັກສຶກສານໍາຄວາມຮູ້ ແລະ ປະສົບການທີ່ໄດ້ຮັບ ໄປຮັບໃຊ້ສັງຄົມ ແລະ ປະກອບສ່ວນ ໃນການສ້າງສາລະບົບຍຸຕິທຳ ຂອງ ສປປ ລາວ ຢ່າງມີປະສິດທິຜົນ.
